ማቴዎስ 22 FHB Father's Heart Bible™

22 ¹ኢየሱስ መሊሱ ብምሳሌ ኸምዙይ ኢሉ ተዛረቦም፦

²“መንግስቲ ኣቦና ንወዱ መርዓ ዘዳለዎ ንጉስ ትመስል። ³ነቶም ዕዱማት ናብ መርዓ ኽፅውዑ ድማ ኣገልገልቱ ለኣኸ፤ ንሳቶም ግና ክመፁ ኣበዩ። ⁴መሊሱ ኸዓ ኻልኦት ኣገልገልቲ ለኣኸ፥ ከምዙይ ኢሉ፦ ‘ነቶም ዕዱማት ከምዙይ በልዎም፦ እንሆ፥ ድራረይ ኣዳልየ ኣለኹ፤ ኣብዑረይን ስቡሓት ከፍተይን ተሓሪዶም፥ ኵሉ ተዳልዩ ኣሎ። ናብ መርዓ ንዑ።’ ⁵ንሳቶም ግና ዕሽሽ ኢሎም ከዱ፤ ሓደ ናብ ግራቱ፥ ካልእ ድማ ናብ ናይ ንግዲ ስራሑ። ⁶እቶም ዝተረፉ ኸዓ ነገልገልቱ ሒዞም ኣሳቐይዎምን፥ ቀተልዎምውን። ⁷እቲ ንጉስ ተቘጥዐ፤ ሰራዊቱ ልኢኹ ድማ ነቶም ቀተልቲ ኣጥፍኦም፥ ከተማኦምውን ኣንደዶ። ⁸ሽዑ ነገልገልቱ ኸምዙይ በሎም፦ ‘እቲ መርዓ ተዳልዩ ኣሎ፤ እቶም ዕዱማት ግና ኣይበቕዑን ነበሩ። ⁹ስለዙይ ናብ ኣውራ መንገድታት ኪዱ፤ ዝረኸብኩምዎም ኵሎም ድማ ናብ መርዓ ፅውዑ።’ ¹⁰እቶም ኣገልገልቲ ድማ ናብ መንገድታት ወፂኦም፥ ንዝረኸብዎም ዅሎም፥ ክፉኣትን ሰናያትን ኣከቡ፤ እቲ ኣዳራሽ መርዓ ኸዓ ብዕዱማት መልአ።

¹¹“እቲ ንጉስ ነቶም ዕዱማት ክርኢ ምስ ኣተወ ግና፥ ክዳን መርዓ ዘይተኸድነ ሰብ ረአየ። ¹²‘ኦ ዓርከይ፥ ክዳን መርዓ እንተይተኸደንካ ኸመይ ኢልካ ናብዙይ ኣቴኻ?’ በሎ፤ ንሱ ኸዓ ሱቕ ኢሉ ተረፈ። ¹³ሽዑ እቲ ንጉስ ነቶም ኣገልገልቲ ኸምዙይ በሎም፦ ‘ኣእዳውን ኣእጋርን ኣሲርኩም፥ ናብቲ ናይ ወፃኢ ፀልማት ደርቢይዎ፤ ኣብኡ ብኽያትን ሕርቃም ኣስናን ክኸውን እዩ።’ ¹⁴ፅዉዓት ብዙሓት፥ ሕሩያት ግና ሒደት እዮም እሞ።”

ነቲ ናይ ኣቦና ዝኾነ ንኣቦና ሃቡ

¹⁵ሽዑ ፈሪሳውያን ከይዶም፥ ብዘረባኡ ኸመይ ጌሮም ክሕዝዎ ተማኸሩ።

¹⁶ደቀ መዛሙርቶም ምስ ሄሮድሳውያን ናብኡ ልኢኾም ከምዙይ በልዎ፦ “መምህር፥ ንስኻ ሓቀኛ ምዃንካ መንገዲ እግዚኣብሄር ብሓቂ ኸም እትምህርን ንፈልጥ ኢና፤ ገፅ ሰብ ኣይትርእን ኢኻ እሞ፥ ንሓደ እኳ ኣይተዳልን ኢኻ። ¹⁷እምበኣር እንታይ ከም ዝመስለካ ንገረና፤ ንቄሳር ቐረፅ ምኽፋል ሕጋዊ ድዩ ኣይኮነን?”

¹⁸ኢየሱስ ግና እከዮም ፈሊጡ ኸምዙይ በሎም፦ “ኣቱም ግብዛት፥ ንምንታይ ትፍትኑኒ ኣለኹም? ¹⁹እታ ንቐረፅ እትኸፍሉላ ሳንቲም ኣርእዩኒ።” ንሳቶም ድማ ዲናር ኣምፅኡሉ።

²⁰ከምዙይ ድማ በሎም፦ “እዝ ምስልን ፅሕፈት ናይ መን እዩ?”

²¹“ናይ ቄሳር” በልዎ። ሽዑ ኸምዙይ በሎም፦ “እምበኣር ናይ ቄሳር ንቄሳር፥ ናይ ኣቦና ድማ ንኣቦና ሃቡ።”

²²እዙይ ምስ ሰምዑ ተገረሙ፤ ሓዲጎምዎ ኸዓ ኸዱ።

ኣቦና ኣምላኽ ህያዋን እዩ

²³በታ መዓልቲ እቲኣ፥ ትንሳኤ የለን ዝብሉ ሰዱቃውያን ናብኡ መፁ፤ ጠየቕዎ ድማ፥ ²⁴ከምዙይ በሉ፦ “መምህር፥ ሙሴ፥ ‘ሓደ ሰብ ውሉድ ዘይብሉ እንተ ሞተ፥ ሓዉ ነታ ሰበይቱ ኣእትዩ ንሓዉ ዘርኢ የተንስኣሉ’ ኢሉ ነበረ። ²⁵ኣብ ማእኸልና ድማ ሸውዓተ ኣሕዋት ነበሩ፤ እቲ ቐዳማይ ተመርዕዩ ሞተ፤ ውሉድ ስለ ዘይነበሮ ኸዓ ሰበይቱ ንሓዉ ሓደጋ። ²⁶ከምኡ ድማ እቲ ኻልኣይ፥ እቲ ሳልሳይ፥ ክሳዕ እቲ ሻብዓይ ኮኑ። ²⁷ኣብ መወዳእታ ኸዓ እታ ሰበይቲ ሞተት። ²⁸እምበኣር በቲ ትንሳኤ፥ ካብቶም ሸውዓተ ናይ መን ሰበይቲ ኽትከውን እያ? ኵላቶም ኣእትዮምዋ እዮም እሞ።”

²⁹ኢየሱስ ድማ ኸምዙይ ኢሉ መለሰሎም፦ “መፃሕፍቲ ኾነ ሓይሊ ኣቦና ስለ ዘይትፈልጡ ተጋጊኹም ኣለኹም። ³⁰በቲ ትንሳኤ ኣየእትዉ ኣይዋሃቡን እዮም እሞ፥ ከምቶም ኣብ ሰማይ ዘለዉ መላእኽቲ ደኣ እዮም። ³¹ሕዚ ኸዓ ብዛዕባ ትንሳኤ ምዉታት፥ ኣቦና ዝበለኩም ኣየንበብኩምንዶ፦

³²‘ኣነ ኣምላኽ ኣብርሃም፥ ኣምላኽ ይስሓቅ፥ ኣምላኽ ያእቆብ እየ’? ንሱ ኣምላኽ ህያዋን ደኣ እምበር፥ ኣምላኽ ምዉታት ኣይኮነን።”

³³እቶም ህዝቢ ምስ ሰምዑ ድማ፥ ብትምህርቱ ተገረሙ።

ንኣቦኻ ብዘለካ ዅሉ ኣፍቅሮ

³⁴ፈሪሳውያን ግና ንሰዱቃውያን ከም ዘፅቀጦም ምስ ሰምዑ፥ ብሓንሳእ ተኣከቡ። ³⁵ካብኣቶም ሓደ ሊቅ ሕጊ ድማ፥ ክፍትኖ ኢሉ ሓደ ነገር ጠየቖ፦ ³⁶“መምህር፥ እታ ዓባይ ትእዛዝ ኣብ ሕጊ ኣየነይቲ እያ?”

³⁷ከምዙይ ድማ በሎ፦ “ንኣቦኻ ብምሉእ ልብኻን ብምሉእ ነፍስኻን ብምሉእ ኣእምሮኻን ኣፍቅሮ። ³⁸እዛ ዓባይን ቀዳመይትን ትእዛዝ እዚኣ እያ። ³⁹እታ ኻልአይቲ ኸዓ ንእኡ ትመስል፦ ‘ንብፃይካ ኸም ነፍስኻ ኣፍቅሮ።’ ⁴⁰ኵሉ ሕግን ነቢያትን ኣብዘን ክልተ ትእዛዛት እዚኣተን ተንጠልጢሉ ኣሎ።”

ክርስቶስ ወዲ መን እዩ?

⁴¹ፈሪሳውያን ተኣኪቦም እንተለዉ፥ ኢየሱስ ጠየቖም፦ ⁴²“ብዛዕባ ክርስቶስ እንታይ ይመስለኩም? ወዲ መን እዩ?” ንሳቶም ድማ “ናይ ዳዊት” በልዎ።

⁴³ንሱ ድማ ከምዙይ በሎም፦ “እምበኣር ዳዊት ብመንፈስ ቅዱስ ኮይኑ፥ ከመይ ጐይታ ኢሉ ይፅውዖ፦

⁴⁴‘ኣቦና ንጐይታይ ከምዙይ በሎ፦ “ኣብ የማነይ ተቐመጥ፥ ንፀላእትኻ ኣብ ትሕቲ እግርኻ ክሳዕ ዘንብሮ።”’?

⁴⁵ዳዊት እምበኣር ንክርስቶስ ጐይታ ኢሉ እንተ ፀውዖ፥ ከመይ ኢሉ ክርስቶስ ወዲ ዳዊት ክኸውን ይኽእል?” በሎም።

⁴⁶ሓደ እኳ ቃል ክመልሰሉ ዝኸኣለ ኣይነበረን፤ ካብታ መዓልቲ እቲኣ ድማ፥ ደጊም ሓደ እኳ ገለ ክሓቶ ኣይደፈረን።