Mathayo 22

22 ¹Yesu akasema nao tena kwa mifano, akisema:

²"Ufalme wa Baba yetu unafanana na mfalme aliyemwandalia mwanawe karamu ya arusi. ³Akawatuma watumishi wake kuwaita wale walioalikwa waje kwenye karamu ya arusi, lakini wakakataa kuja. ⁴Akawatuma tena watumishi wengine, akisema, 'Waambieni wale walioalikwa: Tazama, nimeandaa chakula changu; ng'ombe wangu na wanyama walionona wamechinjwa, kila kitu kiko tayari. Njooni kwenye karamu ya arusi.' ⁵Lakini hawakujali, wakaenda zao, mmoja shambani mwake, mwingine kwenye biashara yake, ⁶na wengine wakawakamata watumishi wake, wakawatenda vibaya, na kuwaua. ⁷Mfalme akaghadhibika, akapeleka majeshi yake, akawaangamiza wauaji hao, na kuuchoma moto mji wao. ⁸Kisha akawaambia watumishi wake, 'Arusi iko tayari, lakini wale walioalikwa hawakustahili. ⁹Basi nendeni kwenye njia kuu, na wote mtakaowakuta waalikeni kwenye karamu ya arusi.' ¹⁰Wale watumishi wakatoka kwenda barabarani, wakawakusanya wote waliowakuta, wabaya na wema, nao ukumbi wa arusi ukajaa wageni.

¹¹"Lakini mfalme alipoingia kuwaona wageni, akamwona mtu mmoja ambaye hakuvaa vazi la arusi. ¹²Akamwuliza, 'Rafiki, uliingiaje humu bila vazi la arusi?' Naye akakosa la kusema. ¹³Ndipo mfalme akawaambia watumishi, 'Mfungeni mikono na miguu, mkamtupe katika giza la nje, ambako kutakuwa na kilio na kusaga meno.' ¹⁴Kwa maana walioitwa ni wengi, bali walioteuliwa ni wachache."

Mpeni Baba Yetu Kilicho Chake

¹⁵Ndipo Mafarisayo wakaenda na kufanya shauri jinsi ya kumtega kwa maneno yake mwenyewe.

¹⁶Wakawatuma kwake wanafunzi wao pamoja na Maherode, wakisema, "Mwalimu, twajua kwamba wewe ni mkweli, na kwamba wafundisha njia ya Mungu katika kweli; wala humhofu mtu yeyote, kwa kuwa huwatazami watu kwa vyeo vyao. ¹⁷Basi tuambie, wafikiriaje: Je, ni halali kumlipa Kaisari kodi, au sivyo?"

¹⁸Lakini Yesu, akijua uovu wao, akasema, "Mbona mnanijaribu, enyi wanafiki? ¹⁹Nionyesheni sarafu itumikayo kwa kodi." Nao wakamletea dinari.

²⁰Akawaambia, "Sura hii ni ya nani, na maandishi haya ni ya nani?"

²¹Wakamwambia, "Ni ya Kaisari." Ndipo akawaambia, "Basi mpeni Kaisari kilicho cha Kaisari, na Baba yetu kilicho cha Baba yetu."

²²Waliposikia hayo, walistaajabu; wakamwacha, wakaenda zao.

Baba Yetu Ni Mungu wa Walio Hai

²³Siku hiyo hiyo Masadukayo wakamjia, wale wasemao kwamba hakuna ufufuo, wakamwuliza, ²⁴wakisema, "Mwalimu, Musa alisema: mtu akifa hana watoto, ndugu yake amwoe mjane, na kumzalia ndugu yake uzao. ²⁵Basi kulikuwa na ndugu saba kwetu. Wa kwanza akaoa, akafa, na kwa kuwa hakuwa na watoto, akamwachia ndugu yake mkewe. ²⁶Vivyo hivyo wa pili na wa tatu, hata wa saba. ²⁷Mwisho wa wote, yule mwanamke akafa. ²⁸Basi katika ufufuo, atakuwa mke wa nani miongoni mwa hao saba? Kwa maana wote walikuwa naye."

²⁹Yesu akajibu, "Mmekosea—hamzijui Maandiko wala uweza wa Baba yetu. ³⁰Kwa maana katika ufufuo watu hawaoi wala hawaolewi, bali huwa kama malaika mbinguni. ³¹Basi kuhusu ufufuo wa wafu, je, hamkusoma yale Baba yetu aliyowaambia:

³²'Mimi ni Mungu wa Abrahamu, na Mungu wa Isaka, na Mungu wa Yakobo'? Yeye si Mungu wa wafu, bali wa walio hai."

³³Nao makutano waliposikia hayo, walishangaa kwa mafundisho yake.

Mpende Baba Yako kwa Kila Ulicho Nacho

³⁴Lakini Mafarisayo waliposikia kwamba amewanyamazisha Masadukayo, wakakusanyika pamoja. ³⁵Na mmoja wao, mwana-sheria, akamwuliza swali ili kumjaribu: ³⁶"Mwalimu, ni amri ipi iliyo kuu katika Sheria?"

³⁷Akamwambia, "Mpende Baba yako kwa moyo wako wote, na kwa roho yako yote, na kwa akili yako yote. ³⁸Hii ndiyo amri iliyo kuu na ya kwanza. ³⁹Na ya pili yafanana nayo: Mpende jirani yako kama nafsi yako. ⁴⁰Katika amri hizi mbili hutegemea Sheria yote na Manabii."

Kristo Ni Mwana wa Nani?

⁴¹Basi Mafarisayo walipokuwa wamekusanyika pamoja, Yesu akawauliza, ⁴²"Mwafikiriaje juu ya Kristo? Yeye ni mwana wa nani?" Wakamwambia, "Ni mwana wa Daudi."

⁴³Akawauliza, "Basi imekuwaje Daudi, kwa Roho Mtakatifu, akamwita Bwana, akisema,

⁴⁴'Baba yetu alimwambia Bwana wangu, "Uketi mkono wangu wa kuume, hata niwaweke adui zako chini ya miguu yako"'?

⁴⁵Basi ikiwa Daudi anamwita Kristo Bwana, awezaje Kristo kuwa mwana wa Daudi?"

⁴⁶Wala hakuna mtu aliyeweza kumjibu neno, na tangu siku hiyo hakuna aliyethubutu kumwuliza jambo lolote tena.