Matthew 22

22 ¹Jishuna latluida chānjam eina athumli hānga:

²"Ithumwui Avā wungram chi, awui naomayarawui vang ngalā shakazā zātkhāng ngarān kahai awunga akha kathāna. ³Ana hokahaibing chili shakazā zātkhāngli hokhui khavai awui raobing chihovai, kha athumna rā khavai mamayāmana. ⁴Ana rao khangateibing luishita chihovāda hānga, 'Hokahaibing chili ahānglu: Yanglu, ina iwui ngazin phazāt ngarānhaira; iwui mukkā kala asā kakākā taithathaira, saikora ngarān kahaira. Shakazā zātkhāngli rālu.' ⁵Kha athumna chi manganāmana, kala akha awui luili, akhapā awui otpamli vāhaowa, ⁶kha khangateibingna awui raobing chi tukkhuilaga sāshilak eina sāda shaothathaowa. ⁷Awunga malungvātlakhaoda, awui raimibing chihovai, mi shaokathatbing chi sāshimānhaowa, kala athumwui keinung mei eina riktāhaowa. ⁸Chieina ana awui raobingli hānga, 'Shakazā ngarān kahaira, kha hokahaibing chi makanāmana. ⁹Chiwui vang eina shongkhar kharei chili vālu, kala nathumna ngasā mi saikora chi shakazā zātkhāngli holu.' ¹⁰Chieina raobing chi shongkharli shokta, athumna makaphā kala kaphā, ngasā mi saikora kazipkhui, kala shakazā zātkhāng kā chi phazākharumbingna pemhaowa.

¹¹Kha awunga chi phazākharumbing chi yang khavai kazang tharan, ana shakazā kachon mangavaila mi akha thei. ¹²Ana ngahāna, 'Itao, shakazā kachon mangavaila kathada na hili kazanghaokhala?' Ana khituikha mamatuila nganingsai. ¹³Chieina awunga china raobingli hānga, 'Awui pāng kala phei masa̱hailu, kala ali tangkhamang ayar chili horshokhaolu; chili kachapla chapra kala ahāla tarira.' ¹⁴Kaja mi kachungkha hokahaina, kha kateokhamāng kapangkhui kahaina."

Ithumwui Avāwui Chi Avāli Milu

¹⁵Chieina Phariseebingna shokta, awui tuimatui eina kathada khayon tukkhuisikhala da ngasana.

¹⁶Athumna athumwui sākhangatha̱bing chi Herodwui mijangbing ngasoda ali chihovai, hānga, "Ojā, na khamashunga kala Varewui apong mashungrik eina tamchithei kaji ithumna thei; nava khipālikha mijang masāmana, kaja nava mikumowui shingam eina bichar masāmana. ¹⁷Chithākha ithumli ahānglu, nawui kaphaning khikhala: Caesarli khāshinā khami hi ain ka, maningmakhala?"

¹⁸Kha Jishuna athumwui makaphā chi theida hānga, "Phākakhaningbing, khisāda ili chāng yangkhala? ¹⁹Khāshinā khami khavai lupāsā chi ili chitheilu." Chieina athumna denarii akha khuivāmi.

²⁰Chieina ana athumli hānga, "Hi khipāwui azakkhala, kala khipāwui aming kapihailikhala?"

²¹Athumna "Caesarwuina" da ngahānkai. Chieina ana athumli hānga, "Chithākha Caesarli Caesarwui chi milu, kala ithumwui Avāli ithumwui Avāwui chi milu."

²²Chi shālaga athum matakhakhaowa; kala athumna ali horhailaga thuihaowa.

Ithumwui Avā hi Kharingawui Varena

²³Chithang ngalāngda, ringkhalui maleimana da kahānga Sadduceebing ali rai, kala athumna ali rangahāna, ²⁴"Ojā, Mosesna hānga: mi akhana nao maleila thihaiakha, agato china ra̱meinao chi ngakumphalungra kala achināwui vang nao pharākhuiphalungra. ²⁵Ara ithumwui ngachaili chinaongarā shini leisai. Kharara chiya ngalā phailaga nao maleila thihaowa, kala apreiva̱ chi agatoli horhai. ²⁶Chi tākam eina kakhanela, kakathumala, kashine eina tangda chithai. ²⁷Saikorawui khanaowa, sha̱naopava̱ chila thihaowa. ²⁸Chithākha ringkhalui tharan ana shini hiwui ngachaili khipāwui preiva̱ sārakhala? Kaja athum saikorana ali ngakumsera."

²⁹Jishuna ngahānkai, "Nathum nguichaohaira, khikhalajila nathumna katharatuila kala ithumwui Avāwui pangshapla matheimana. ³⁰Kaja ringkhalui tharan mibingna ngalāla makhuimara, kala fakathuila mafathuimara; kha athum kazingramli khalei kazingraobing thāserhaora. ³¹Ara kathebing ringlui khangasak pongli ithumwui Avāna nathumli hāngkahai chi nathum mapākhuimala:

³²'I Abrahamwui, Isaacwui kala Jacobwui Varena'? A kathewui Vare maningmana, kha kharingawui Varena."

³³Kala yaruina chi shālaga awui tamkachithei chili matakhakhaowa.

Nawui Avāli Nawui Khalalei Saikora Eina Leishilu

³⁴Kha Phariseebingna Jishuna Sadduceebingli mamayāsang ngasaka kaji shālaga, athum katongana kazipa. ³⁵Kala athumwui ngachaili ain theishingkhui kahai akhana ali chāng yang khavai khangahān akha ngahāna: ³⁶"Ojā, ainli ningkhami hakkhamei chi kachipākhala?"

³⁷Ana ali hānga, "Nawui Avāli nawuklung tongda, namanglā tongda, kala naning tongda leishiphalungra. ³⁸Hi ningkhami hakkhamei kala khare china. ³⁹Kala kakhanela chi kathāna: Nawui khongnainaoli nakhalatta leikashi thada leishira. ⁴⁰Ain kala marānbing saikora hi ningkhami khani hiwui lungli leisera."

Khrista hi Khipāwui Naomayarakhala?

⁴¹Ara Phariseebing rākakazip tharan, Jishuna athumli ngahāna, ⁴²"Nathumna Khristawui pongli kathada phaningkhala? A khipāwui naomayarana?" Athumna ali ngahānkai, "Davidwui naomayarana."

⁴³Jishuna athumli hānga, "Chithākha kathada Davidna Manglā Kathara eina ali 'Proho' da hoi, hithada hānga,

⁴⁴'Ithumwui Avāna iwui Proholi hānga, "Iwui yāshong pamlu, nawui yangkashebingli nawui pheinai masā ngasakranglakha eina tangda"'?

⁴⁵Chithākha Davidna Khristali 'Proho' da hoakha, Khrista hi kathada Davidwui naomayara ngasāpairakhala?"

⁴⁶Khipānakha ali tui akha mangahānkārarthuwa, kala chithang eina thuida khipānakha ali khangatei akha khangahān masālengthuwa.