Matthew 22 FHB Father's Heart Bible™

22 ¹Jisu pora tarkhan ke aru dristanto pora koise:

²“Amar Pitri laga rajyo tu ekjon raja nisena ase, jun pora tar laga putro nimite shadi laga bhoj taiyar korise. ³Matiya manuh khan ke shadi laga bhoj te mati bole tai pora tar laga noukar khan ke pathaise, kintu tarkhan ahhibole mana korise. ⁴Aru tai pora dusra noukar khan ke pathai kene koise, ‘Matiya manuh khan ke kobi: Sabi, moi laga kha-luwa taiyar korise; moi laga saand aru mota goru khan morai dise, sob jinis taiyar ase. Shadi laga bhoj te ahhibi.’ ⁵Kintu tarkhan dhyan nadi kene jai jaise, ekjon tar laga kheti te, dusra jon tar laga byapar te, ⁶aru bachi thaka khan tai laga noukar khan ke dhori kene, biya korise, aru morai dise. ⁷Raja tu bisi gusa hoise, aru tai pora tar laga sipahi khan ke pathai kene, hei khun kora khan ke khotom korise, aru tarkhan laga sheher ke jolai dise. ⁸Tetiya tai pora tar laga noukar khan ke koise, ‘Shadi tu taiyar ase, kintu matiya manuh khan layak thaka nai. ⁹Etu nimite dangor rasta khan te jabi aru jiman manuh pabo, hoto khan ke shadi laga bhoj te matibi.’ ¹⁰Hei noukar khan rasta khan te ulai jai kene, jiman manuh paise, biya aru bhal, sob ke joma korise, aru shadi ghor tu manuh khan pora bhorta hoise.

¹¹“Kintu jitia raja tu matiya manuh khan ke sabole bhitor te ahhise, tai pora shadi laga kapur napindhi thaka ekjon manuh ke dekhise. ¹²Tai pora hudise, ‘Sathi, shadi laga kapur nathaki kene tumi kineka yate ahhise?’ Kintu tai eku kobo para nai. ¹³Tetiya raja tu pora noukar khan ke koise, ‘Tar hath aru theng bandhi kene, tar ke bahar laga andhera te phelai dibi, tate kanda aru daat kamura hobo.’ ¹⁴Kilemane bisi jon ke matise, kintu komti jon ke basi loise.”

Ji Amar Pitri laga Ase Eitu Tar ke Dibi

¹⁵Tetiya Pharisee khan jai kene, tar nijor kotha pora tar ke kineka dhoribo etu nimite jukti korise.

¹⁶Tarkhan pora Herod laga manuh khan logot te tarkhan laga chella khan ke tar logot te pathai kene koise, “Guruji, amikhan jane apuni hosa ase aru Isor laga rasta hosa pora sikhai; apuni kun laga mukh bhi nasai, kilemane apuni manuh ke tarkhan laga dangor-chutu sa-sai nakore. ¹⁷Etu nimite amikhan ke kobi, apuni ki bhabe: Caesar ke kor diya tu niyom ase, na nai?”

¹⁸Kintu Jisu tarkhan laga biya mon jani kene koise, “Tumikhan kapti khan, kile Moi ke porikhya kori ase? ¹⁹Kor diya laga poisa Moi ke dikhai dibi.” Aru tarkhan pora tar ke ekta denarius anise.

²⁰Aru tai pora tarkhan ke koise, “Eitu kun laga chehera ase, aru kun laga likha ase?”

²¹Tarkhan koise, “Caesar laga.” Tetiya tai pora tarkhan ke koise, “Tine hoile ji Caesar laga ase eitu Caesar ke dibi, aru ji amar Pitri laga ase eitu amar Pitri ke dibi.”

²²Jitia tarkhan etu hunise, tarkhan asurit hoise; aru tarkhan tar ke chari kene jai jaise.

Amar Pitri tu Jinda thaka khan laga Isor Ase

²³Hei din te Sadducee khan tar logot te ahhise, jun khan pora punoruthan nai koi, aru tarkhan pora tar ke hudise, ²⁴koi kene, “Guruji, Moses pora koise: jodi ekjon manuh bacha nathaki kene mori jai, tar bhai pora hei bidhuwa ke shadi kori kene tar bhai nimite bonsho uthabo lage. ²⁵Etiya amikhan majot te sat jon bhai thakise. Poila jon shadi korise, mori jaise, aru bacha nathaki kene tar maiki ke tar bhai nimite chari dise. ²⁶Tineka dusra aru tisra jon bhi, sat jon tak. ²⁷Sob laga ses te, hei maiki bhi mori jaise. ²⁸Tine hoile, punoruthan te, tai hei sat jon majot te kun laga maiki hobo? Kilemane sob jon pora tai ke rakhise.”

²⁹Jisu pora jawab dise, “Tumikhan bhul ase—tumikhan Shastro khan bhi na jane aru amar Pitri laga takot bhi na jane. ³⁰Kilemane punoruthan te manuh khan shadi nakore aru shadi te bhi nadiye, kintu sorgo te thaka sorgodoot khan nisena ase. ³¹Etiya, mora khan laga punoruthan laga kotha te, amar Pitri pora tumikhan ke ki koise eitu tumikhan pura nai:

³²‘Moi Abraham laga Isor, Isaac laga, aru Jacob laga Isor ase’? Tai mora khan laga Isor nahoi, kintu jinda thaka khan laga Isor ase.”

³³Aru jitia bhir khan etu hunise, tarkhan tar laga sikhai diya pora asurit hoise.

Tumar Pitri ke Tumar Sob logote Morom Koribi

³⁴Kintu jitia Pharisee khan hunise tai pora Sadducee khan ke chup kora dise, tarkhan eke logote joma hoise. ³⁵Aru tarkhan majot te ekjon, Niyom laga gyani manuh, tar ke porikhya koribole ekta kotha hudise: ³⁶“Guruji, Niyom te sob pora dangor hukum tu kunta ase?”

³⁷Tai pora tar ke koise, “Tumar Pitri ke tumar pura mon pora, tumar pura atma pora, aru tumar pura gyan pora morom koribi. ³⁸Eitu sob pora dangor aru poila hukum ase. ³⁹Aru dusra tu etu nisena ase: Tumi nijor ke morom kora nisena tumar usor manuh ke morom koribi. ⁴⁰Etu duita hukum te pura Niyom aru Bhabobadi khan tiki ase.”

Khrista tu Kun laga Putro Ase?

⁴¹Etiya jitia Pharisee khan eke logote joma thakise, Jisu pora tarkhan ke hudise, ⁴²“Khrista laga kotha te tumikhan ki bhabe? Tai kun laga putro ase?” Tarkhan pora tar ke koise, “David laga.”

⁴³Tai pora tarkhan ke hudise, “Tine hoile David pora, Pobitro Atma pora, tai ke Prabhu kineka mate, koi kene,

⁴⁴‘Amar Pitri pora moi laga Prabhu ke koise, “Moi laga dyna hath te bohibi, jitia tak Moi tumar dushman khan ke tumar theng nichete narakhe”’?

⁴⁵Tine hoile jodi David pora Khrista ke Prabhu mate, Khrista kineka David laga putro hobo pare?”

⁴⁶Kun bhi tar ke ekta kotha bhi jawab dibo para nai, aru hei din pora kun bhi tar ke aru eku hudibole himmot kora nai.