Yesu Ya Yi Gargaɗi game da Malamai na Ƙarya

Sau bakwai Yesu ya ce kaito ga malaman da suke ɗora wa waɗansu kaya mai nauyi, suke goge bayan ƙoƙo, suke kuma ƙawata kaburburan annabawan da ubanninsu suka kashe — ko da yake Uba ɗaya kaɗai suke da shi, a sama. Ya ƙare da baƙin ciki a kan Urushalima, birnin da ya ƙi, gidan da aka bar shi kufai.

Babi na 23.

Sai Yesu ya yi magana da taron jama'a da kuma almajiransa,

ya ce, “Malaman Attaura da Farisiyawa suna zama a kujerar Musa.

“Saboda haka ku yi, ku kuma kiyaye duk abin da suka faɗa muku, amma kada ku yi yadda suke yi, domin suna wa'azi ne, amma ba sa aikatawa. Suna ɗaura kaya masu nauyi, masu wuyar ɗauka, su ɗora wa mutane a kafaɗa, amma su kansu ba sa so su motsa su ko da yatsa guda. Suna yin dukan ayyukansu ne don mutane su gan su; suna fāɗaɗa layunansu na addu'a, suna kuma tsawaita tuntun rigunansu, ^a suna kuma son wuraren girma a wajen bukukkuwa, da kuma kujerun gaba a majami'u, da kuma gaisuwa a kasuwanni, da a riƙa kiran su ‘Rabbi’ daga wajen mutane. Amma kada a kira ku ‘Rabbi,’ domin kuna da malami guda ɗaya kaɗai, ku kuma dukanku 'yan'uwa ne. Kada kuma ku kira kowa a duniya ubanku, gama kuna da Uba guda ɗaya, wanda yake cikin Sama. Kada ku bar kowa ya kira ku ‘jagora,’ gama kuna da jagora guda ɗaya, wato Almasihu. Wanda ya fi girma a cikinku zai zama bawanku. Duk wanda ya ɗaukaka kansa za a ƙasƙantar da shi; duk wanda kuma ya ƙasƙantar da kansa za a ɗaukaka shi.

Kaitonku, malaman Attaura da Farisiyawa, munafukai! Gama kuna rufe Mulkin Ubanmu a gaban mutane; ku kanku ba kwa shiga, waɗanda kuma suke so su shiga ba kwa barin su shiga. ^b

Kaitonku, malaman Attaura da Farisiyawa, munafukai! Gama kuna ƙetare teku da ƙasa domin ku juyar da mutum ɗaya, sa'ad da kuwa ya juya, kukan mai da shi ɗan jahannama ninki biyu fiye da ku.

Kaitonku, makafin jagorori! Kuna cewa, ‘In mutum ya rantse da haikali, ba kome ba ne; amma in ya rantse da zinariyar haikali, rantsuwarsa ta tabbata.’ Ya ku wawaye makafi! Wanne ya fi girma: zinariya, ko haikalin da yake tsarkake zinariya? Kuna kuma cewa, ‘In mutum ya rantse da bagadi, ba kome ba ne; amma in ya rantse da hadayar da take kan bagadin, rantsuwarsa ta tabbata.’ Ya ku makafi! Wanne ya fi girma, hadaya ko bagadin da yake tsarkake hadayar? Saboda haka duk wanda ya rantse da bagadi, ya rantse da shi, da kuma dukan abin da yake kansa. Duk wanda kuma ya rantse da haikali, ya rantse da shi, da kuma wanda yake zama a cikinsa. Duk wanda kuma ya rantse da sama, ya rantse da kursiyin Ubanmu, da kuma wanda yake zaune a kansa.

Kaitonku, malaman Attaura da Farisiyawa, munafukai! Kuna ba da zakkar na'ana'u, da shibit, da lami, amma kun yar da abubuwa mafi nauyi na shari'a—adalci, da jinƙai, da aminci. Ya kamata ku yi waɗannan, ba tare da kun yar da sauran ba. Ya ku makafin jagorori, kuna tace ɗan ƙwaro, kuna kuwa haɗiye raƙumi!

Kaitonku, malaman Attaura da Farisiyawa, munafukai! Kuna wanke bayan kokon sha da kwano, amma a ciki cike suke da kwaɗayi da rashin kamunkai. Kai Bafarise makaho! Fara wanke cikin kokon sha da kwano, domin bayansa ma yă zama mai tsabta.

Kaitonku, malaman Attaura da Farisiyawa, munafukai! Kuna kama da kaburburan da aka shafe da farar ƙasa, da suke kyakkyawa a waje, amma a ciki cike suke da ƙasusuwan matattu da kowane irin ƙazanta. Haka ku ma, a waje kuna kama da masu adalci a gaban mutane, amma a ciki cike kuke da munafunci da mugunta.

Kaitonku, malaman Attaura da Farisiyawa, munafukai! Gama kuna gina kaburburan annabawa, kuna kuma yi wa kaburburan masu adalci ado, kuna cewa, ‘Da a ce muna da rai a zamanin kakanninmu, da ba mu haɗa kai da su a kashe annabawa ba.’ Saboda haka kuna ba da shaida a kanku cewa ku 'ya'yan waɗanda suka kashe annabawa ne. To, ku cika ma'aunin kakanninku! Ya ku macizai, zuriyar macizai masu dafi, yaya za ku tsere wa hukuncin jahannama? Saboda haka ga shi, ina aika muku annabawa, da masu hikima, da malamai—waɗansu za ku kashe, ku kuma gicciye su; waɗansu kuma za ku yi musu bulala a majami'unku, kuna tsananta musu daga wannan gari zuwa wancan, domin dukan jinin masu adalci da aka zubar a duniya yă komo kanku—tun daga jinin Habila mai adalci, har zuwa jinin Zakariya ɗan Barakiya, wanda kuka kashe tsakanin wuri mai tsarki da bagadi. Lalle hakika, ina gaya muku, dukan waɗannan abubuwa za su komo kan wannan zamani.

Yesu Ya Yi Kuka a kan Urushalima

Urushalima, Urushalima—mai kashe annabawa, mai jifan waɗanda aka aiko miki! Sau da yawa na so in tara 'ya'yanki, kamar yadda kaza takan tattara 'yan tsakinta a ƙarƙashin fikafikanta, amma kin ƙi. Ga shi, an bar miki gidanki kango. Ina gaya miki, ba za ki ƙara ganina ba, sai kin ce, ‘Mai albarka ne mai zuwa cikin sunan Ubanmu.’”