عيسىٰ د دروغژنو اُستاذانو نه خبردارے ورکوى

عيسىٰ اوه ځله پر هغو ښوونکو افسوس وايي چې پر نورو بارونه اچوي، د پیالې بهرنۍ خوا مینځي، او د هغو پېغمبرانو قبرونه ښايسته کوي چې د هغوی پلرونو وژلي وو — که څه هم هغوی یوازې یو پلار لري، په آسمان کې. پای یې پر یروشلم غم دی، هغه ښار چې انکار یې وکړ، هغه کور چې وران پرېښودل شو.

څپرکی 23.

بيا عيسىٰ ګڼو خلقو او خپلو مريدانو ته وفرمائيل،

چې، ”شرعى عالمان او فريسيان د موسىٰ په ګدۍ باندې ناست دى.

”نو څۀ چې هغوئ تاسو ته وائى، هغه کوئ او ساتئ، خو څۀ چې هغوئ کوى هغه مۀ کوئ، ځکه چې هغوئ وعظ کوى خو عمل پرې نۀ کوى. هغوئ درانۀ او ګران پېټى تړى او د خلقو په اوږو باندې يې ږدى، خو پخپله يې د خوزولو دپاره يوه ګوته هم نۀ خوزوى. هغوئ خپل ټول کارونه د دې دپاره کوى چې خلق يې وګورى، خپل تعويذونه پراخوى او د خپلو جامو ريزې اوږدوى، ^a او هغوئ په مېلمستياؤ کښې د عزت ځايونه او په عبادت خانو کښې غوره ناستې خوښوى، او په بازارونو کښې سلامونه او دا چې خلق ورته ”ربى“ ووائى. خو تاسو ته دې هيڅوک ”ربى“ ونۀ وائى، ځکه چې ستاسو يو اُستاذ دے، او تاسو ټول وروڼه يئ. او په زمکه باندې هيچا ته خپل پلار مۀ وايئ، ځکه چې ستاسو يو پلار دے، هغه چې په آسمان کښې دے. مۀ پرېږدئ چې څوک تاسو ته ”رهنما“ ووائى، ځکه چې ستاسو يو رهنما دے، هغه مسيح. په تاسو کښې چې تر ټولو مشر وى، هغه به ستاسو خدمتګار وى. څوک چې ځان اوچتوى، هغه به ټيټ کړے شى، او څوک چې ځان ټيټوى، هغه به اوچت کړے شى.

اے شرعى عالمانو او فريسيانو، اے منافقانو! په تاسو افسوس دے، ځکه چې تاسو د زمونږ پلار د بادشاهۍ دروازه د خلقو مخې ته بندوئ، نۀ پخپله ور دننه کېږئ او نۀ هغو کسانو ته دننه کېدل پرېږدئ چې کوشش کوى. ^b

اے شرعى عالمانو او فريسيانو، اے منافقانو! په تاسو افسوس دے، ځکه چې تاسو سمندر او وچه ګرځئ چې يو کس خپل مذهب ته راوړئ، او کله چې راشى نو هغه تر ځانه دوه چنده زيات د دوزخ بچے جوړوئ.

اے ړندو رهنمايانو، په تاسو افسوس دے! تاسو وايئ، ’کۀ څوک د بيت المُقدس قسم وخورى، نو هيڅ نۀ دى، خو کۀ څوک د بيت المُقدس د سروزرو قسم وخورى، نو هغه د قسم پابند دے.‘ اے ړندو احمقانو! کوم يو لوئ دے، سره زر، کۀ هغه بيت المُقدس چې سره زر مُقدس کوى؟ او تاسو وايئ، ’کۀ څوک د قربان‌ګاه قسم وخورى، نو هيڅ نۀ دى، خو کۀ څوک د هغې د نذرانې قسم وخورى، نو هغه پابند دے.‘ اے ړندو! کوم يو لوئ دے، نذرانه، کۀ هغه قربان‌ګاه چې نذرانه مُقدسه کوى؟ نو څوک چې د قربان‌ګاه قسم خورى، هغه د قربان‌ګاه او د هغه څۀ قسم خورى چې پرې پراتۀ دى. او څوک چې د بيت المُقدس قسم خورى، هغه د بيت المُقدس او د هغه ذات قسم خورى چې په هغې کښې اوسيږى. او څوک چې د آسمان قسم خورى، هغه د زمونږ پلار د تخت او د هغه ذات قسم خورى چې پرې ناست دے.

اے شرعى عالمانو او فريسيانو، اے منافقانو! په تاسو افسوس دے. تاسو د پودينې، سويې او زيرې لسمه برخه ورکوئ، خو د شريعت د درانو خبرو — انصاف، رحم او وفادارۍ — نه غفلت کوئ. پکار دا وُو چې دا کارونه مو کړى وَى، خو هغه نور هم نۀ وَى پرېښى. اے ړندو رهنمايانو، تاسو ماشے صافوئ خو اوښ تېروئ!

اے شرعى عالمانو او فريسيانو، اے منافقانو! په تاسو افسوس دے. تاسو د پيالې او رکابۍ بهر پاکوئ، خو دننه يې د لالچ او بې‌قابو خواهشاتو نه ډکې دى. اے ړندے فريسى! اول د پيالې او رکابۍ دننه پاک کړه، نو بهر به يې هم پاک شى.

اے شرعى عالمانو او فريسيانو، اے منافقانو! په تاسو افسوس دے. تاسو د هغو سپينو شوو قبرونو په شان يئ چې بهر نه ښائسته ښکارى، خو دننه د مړو خلقو د هډوکو او هر قسم ناپاکۍ نه ډک دى. همدا شان تاسو هم د خلقو مخې ته د بهر نه صادقان ښکارئ، خو دننه د منافقت او بې‌دينۍ نه ډک يئ.

اے شرعى عالمانو او فريسيانو، اے منافقانو! په تاسو افسوس دے، ځکه چې تاسو د نبيانو قبرونه جوړوئ او د صادقانو مزارونه سينګاروئ، او وايئ، ’کۀ مونږ د خپلو پلرونو په زمانه کښې ژوندى وَى، نو د نبيانو په وژلو کښې به مو د هغوئ سره ملګرتيا نۀ وه کړې.‘ نو تاسو پخپله د خپل ځان خلاف ګواهى ورکوئ چې تاسو د هغه کسانو زامن يئ چې نبيان يې وژلى وُو. نو تاسو د خپلو پلرونو پيمانه ډکه کړئ. اے مارانو، اے د کبرو مارانو اولاده، تاسو به د دوزخ د سزا نه څنګه خلاصى ومومئ؟ نو ګورئ، زۀ تاسو ته نبيان، عاقلان او عالمان لېږم. تاسو به ځنې ووژنئ او په سولۍ به يې کړئ، او ځنې به په خپلو عبادت خانو کښې ووهئ او له ښاره ښار ته به يې وځوروئ، دې دپاره چې په زمکه باندې د هر صادق تويه شوے وينه په تاسو راشى — د صادق هابيل د وينې نه نيولې د برکياه د زوئ زکرياه د وينې پورې، چې تاسو هغه د مُقدس ځائ او د قربان‌ګاه په مينځ کښې وواژلو. زۀ تاسو ته رښتيا وايم چې دا ټول به په دې نسل راشى.

عيسىٰ د يروشلم دپاره ژاړى

اے يروشلمه، اے يروشلمه، چې نبيان وژنې او هغه کسان سنګسار کوې چې تا ته لېږلے شوى دى! ما څو ځله وغوښتل چې ستا بچى راغونډ کړم، لکه څنګه چې چرګه خپل بچى د خپلو وزرونو لاندې راغونډوى، خو تاسو انکار وکړو. ګورئ، ستاسو کور تاسو ته ويران پرېښودے شو. زۀ تاسو ته وايم چې تاسو به ما بيا ونۀ وينئ ترڅو چې تاسو دا ونۀ وايئ، ’مبارک دے هغه څوک چې د زمونږ پلار په نامه راځى.‘“