Mathayi 23 FHB Father's Heart Bible™

23 ¹Amana Yesu wázimbula kwena kibuka kya batu yi kwena balonguki bandi,

²wuzimbudi: «Balongi ba mitsiku yi Bafwadisi bisi zakala ha kiti kya Moyize.

³Buna salenu amana lundenu moosu mana balúzimbwala; kaasi lusadilaku bwosu bawu bisi sala, mukuma bisi longa kaasi basadilaku. ⁴Bisi kanga bizitu bya phasi mu kunata, amana bisi sya byawu ha mahembu ma batu; kaasi bawu-bawu bazólaku kusimba byawu keti ku mulembu wumosi hanga babinikisa. ⁵Bisi sala mambu moosu hanga bábamona kwena batu; bisi yadisa bibaki bya masonuku byawu amana bisi lengidika misinga mya miledi myawu, ^a a v5 Bibaki bya masonuku: tubaki twatunduka twa tsibu tuna twenina yi masonuku mu kati, basi twakanga hana mbulu yi hana koku kwa lumonso muna tangwa dya kulombela. ⁶amana bisi zola bifulu bya lukumu mu mafeti yi bifulu bya theti mu nzu za kimvuka za Bayuta, ⁷yi batu babahekaka mboti mu mazandu, yi batu babatela “Labuni”. ⁸Benu lufwaniku ni babatedenu “Labuni”, mukuma lwenina yi Mulongi wumosi kaka, amana benu boosu lwenina baphangi. ⁹Amana lutedaku mutu wumosi ha tsi tata, mukuma lwenina yi Tata wumosi, wuna wenina mu mazilu. ¹⁰Lubikaku mutu kalutela “Ndongisi”, mukuma lwenina yi Ndongisi wumosi kaka, Kidisitu. ¹¹Mbuta ha kati dya benu kakála muhika wenu. ¹²Wosu wuna wadítombula, bamúkulumuna; amana wosu wuna wadíkulumuna, bamútombula.

¹³Khi kyadi kwena benu, balongi ba mitsiku yi Bafwadisi, benu kavungalosi! Mukuma lwisi yafikila Kipfumu kya Tata wetu ku thwala ya batu; benu-benu lwakotaku, amana bana bazodi kukota lwabikaku bakota. ^b b v13 Misonuku mya khulu-khulu myenina ku yi vese kya 14 haha; mikanda mya kunima misi bweka mawu: «Khi kyadi kwena benu, balongi ba mitsiku yi Bafwadisi, kavungalosi! Lwisi dya nzu za bafwidi-bakhetu, amana mu kudimonikisa lwisi sala zindombolo za nda; kikuma kyokyo lwakála tambula ndola yineni kuluta.»

¹⁵Khi kyadi kwena benu, balongi ba mitsiku yi Bafwadisi, kavungalosi! Mukuma lwisi sabuka yanga yi tsi hanga mutu wumosi kakota mu dingumba dyenu; amana buna kakotidi, lwisi mukitula mwana wa Gehena mu mbala zodi kuluta benu-benu.

¹⁶Khi kyadi kwena benu, benu baphofu bisi natisa batu! Lwisi zimbula: “Wosu wuna wuzengidi ndefi mu nzu ya Nzambi, disiku kima; kaasi wosu wuna wuzengidi ndefi mu wolu wa nzu ya Nzambi, ndefi yandi yisi mukwata.” ¹⁷Benu bilawu baphofu! Nki kineni: wolu, ko nzu ya Nzambi yina yisi khitula wolu kima kyatoma? ¹⁸Amana lwisi zimbula: “Wosu wuna wuzengidi ndefi mu mesa ma kimenga, disiku kima; kaasi wosu wuna wuzengidi ndefi mu dikabu dina dyenina hana thandu, ndefi yandi yisi mukwata.” ¹⁹Benu baphofu! Nki kineni: dikabu, ko mesa ma kimenga mana masi khitula dikabu kima kyatoma? ²⁰Buna wosu wuna wuzengidi ndefi mu mesa ma kimenga, wuzengidi ndefi mu mawu yi mu bima byosu bina byenina hana thandu. ²¹Amana wosu wuna wuzengidi ndefi mu nzu ya Nzambi, wuzengidi ndefi mu yawu yi mu wuna wisi zinga mu kati. ²²Amana wosu wuna wuzengidi ndefi mu zilu, wuzengidi ndefi mu kiti kya luyalu kya Tata wetu yi mu wuna wisi zakala hana thandu.

²³Khi kyadi kwena benu, balongi ba mitsiku yi Bafwadisi, kavungalosi! Lwisi futa kimosi kya kumi kya tsudi ya kitoku, yi dili, yi kumini, kaasi lwisi lenza mambu ma mitsiku mana ma mfunu kuluta: masonga, kyadi, yi lukwikilu. Mamana mambu mafwani kusalaka, konda kuzimbakana mana makaka. ²⁴Benu baphofu bisi natisa batu, lwisi katula kanyinyi, kaasi lwisi mina kamela!

²⁵Khi kyadi kwena benu, balongi ba mitsiku yi Bafwadisi, kavungalosi! Lwisi semisa ku phenza kwa kopha yi longa, kaasi mu kati byawu byenina yi bwifi yi khu. ²⁶Ngeyi Mufwadisi mphofu! Semisa theti kati dya kopha yi dya longa, hanga phenza yawu yasema yawu.

²⁷Khi kyadi kwena benu, balongi ba mitsiku yi Bafwadisi, kavungalosi! Lwenina hanga mazyamu mana basiti phemba, mana masi monika ma kitoku ku phenza, kaasi mu kati mabasa yi mifufwa mya bafwa yi mvindu yosu. ²⁸Buna benu phi, ku phenza lwisi monika hanga batu ba masonga kwena batu, kaasi mu kati lwenina yi bukavungalosi yi kutendisa mitsiku.

²⁹Khi kyadi kwena benu, balongi ba mitsiku yi Bafwadisi, kavungalosi! Mukuma lwisi tunga mazyamu ma bambikudi, amana lwisi kembisa mazyamu ma batu ba masonga, ³⁰lwisi zimbula: “Ho ni twazínga mu bilumbu bya batata betu, nga twakalaku yi bawu mu kuhonda bambikudi.” ³¹Buna benu-benu lwisi ta kimbangi ni lwenina bana ba babana báhonda bambikudi. ³²Buna, lusisenu kitesu kya batata benu! ³³Benu banyoka, benu mbandu ya masawa, abweti lwalenda kutina ndola ya Gehena? ³⁴Buna, mboni meni yiluhitikila bambikudi, batu ba ngangu, yi balongi ba mitsiku; bahika hana kati dya bawu lwabáhonda yi lwabákhoka hana bitakani; bahika lwabázyatula mu nzu zenu za kimvuka za Bayuta, amana lwabányokuna muna mbanza yi mbanza, ³⁵hanga menga moosu ma masonga mana mátekuka ha tsi mabwíla hana benu—tuka ku menga ma Abelu wa masonga tii yi kuna menga ma Zakadiya mwana wa Belekiya, wuna lwáhonda ha kati dya nzu ya Nzambi yi mesa ma kimenga. ³⁶Kyedika, yiluzimbwadibwa, mamana mambu moosu makála bwila kwena mbandu yayi.

Yesu Wudidi mu Diambu dya Yelusalemi

³⁷Yelusalemi, Yelusalemi, ngeyi wisi honda bambikudi, amana wisi timbwala matadi kwena bana bakutumwa kwena ngeyi! Yízola mbala za lawu mu kukutikisa bana baku kumosi, nana bwosu kisi kutika ngudi wa khoku bana bandi ku tsi ya mahela mandi, kaasi benu lwázolaku! ³⁸Yi talenu, nzu yenu yikituki yamba, ya phungamu. ³⁹Yiluzimbula kwena benu: benu lwambónaku meni kedi, tii yi kuna lwazímbula: “Kasakumuka wuna wukwisa mu khumbu ya Tata wetu!”»