Matiu 24

24 ¹Jesu ń kúrò ní tẹ́mpìlì nígbà tí àwọn ọmọ-ẹ̀hìn rẹ̀ wá láti fi àwọn ilé rẹ̀ hàn án.

²“Ẹ̀ ha rí gbogbo nǹkan wọ̀nyí bí?” ó dáhùn pé. “Lóòótọ́ ni mo wí fún yín: kì yóò sí òkúta kan tí a ó fi sílẹ̀ lórí òmíràn níhìn-ín; gbogbo rẹ̀ ni a ó wó palẹ̀.”

³Nígbà tí Jesu jókòó lórí Òkè Olifi, àwọn ọmọ-ẹ̀hìn rẹ̀ wá sọ́dọ̀ rẹ̀ ní ìkọ̀kọ̀ pé, “Ẹ sọ fún wa, nígbà wo ni nǹkan wọ̀nyí yóò ṣẹlẹ̀, kí sì ni àmì tí yóò fi hàn pé ẹ̀ ń bọ̀ àti ti òpin ayé?”

⁴Jesu dáhùn pé, “Ẹ ṣọ́ra kí ẹnikẹ́ni má bàa tàn yín jẹ.

⁵“Nítorí ọ̀pọ̀lọpọ̀ ni yóò wá ní orúkọ mi, tí wọn yóò máa wí pé, ‘Èmi ni Kristi,’ wọn yóò sì tan ọ̀pọ̀ ènìyàn jẹ. ⁶Ẹ̀yin yóò gbọ́ ìró ogun àti ọ̀rọ̀ ogun—ẹ má ṣe jẹ́ kí ọkàn yín dàrú. Èyí ní láti ṣẹlẹ̀, ṣùgbọ́n òpin kò tíì dé. ⁷Orílẹ̀-èdè yóò dìde sí orílẹ̀-èdè, ìjọba yóò sì dìde sí ìjọba, ìyàn àti ìmìtìtì ilẹ̀ yóò sì wà ní ibi púpọ̀. ⁸Gbogbo nǹkan wọ̀nyí ni ìbẹ̀rẹ̀ ìrọbí.

⁹Nígbà náà ni wọn yóò fi yín lé ìpọ́njú lọ́wọ́, wọn yóò sì pa yín, gbogbo orílẹ̀-èdè yóò sì kórìíra yín nítorí orúkọ mi. ¹⁰Nígbà náà ni ọ̀pọ̀lọpọ̀ yóò kọsẹ̀, wọn yóò sì fi ara wọn hàn, wọn yóò sì kórìíra ara wọn, ¹¹ọ̀pọ̀lọpọ̀ àwọn wòlíì èké yóò sì farahàn, wọn yóò sì tan ọ̀pọ̀ ènìyàn jẹ. ¹²Nítorí àìlófin yóò pọ̀ sí i, ìfẹ́ ọ̀pọ̀ ènìyàn yóò sì tutù, ¹³ṣùgbọ́n ẹni tí ó bá faradà dé òpin ni a ó gbà là. ¹⁴A ó sì wàásù ìhìnrere ìjọba yìí ká gbogbo ayé gẹ́gẹ́ bí ẹ̀rí fún gbogbo orílẹ̀-èdè, nígbà náà ni òpin yóò sì dé.

¹⁵Nítorí náà nígbà tí ẹ bá rí ohun ìríra ìsọdahoro tí wòlíì Daniẹli sọ̀rọ̀ nípa rẹ̀, tí ó dúró ní ibi mímọ́—kí ẹni tí ń kà á ní òye, ¹⁶nígbà náà kí àwọn tí ń bẹ ní Judea sá lọ sí orí àwọn òkè.

¹⁷“Kí ẹni tí ó bá wà lórí òrùlé má ṣe sọ̀kalẹ̀ láti mú ohunkóhun jáde nínú ilé, ¹⁸kí ẹni tí ó bá wà nínú oko má sì ṣe padà sẹ́yìn láti mú aṣọ rẹ̀. ¹⁹Yóò sì burú gidigidi ní àwọn ọjọ́ wọ̀nyẹn fún àwọn aboyún àti àwọn tí ń fún ọmọ lọ́mú! ²⁰Ẹ gbàdúrà kí sísá yín má bàa ṣẹlẹ̀ ní àkókò òtútù tàbí ní ọjọ́ Ìsinmi. ²¹Nítorí nígbà náà ni ìpọ́njú ńlá yóò wà, irú èyí tí kò tíì sí láti ìpilẹ̀ṣẹ̀ ayé títí di ìsinsìnyí, tí kì yóò sì tún sí mọ́ láéláé. ²²Bí a kò bá gé àwọn ọjọ́ wọ̀nyẹn kúrú, kò sí ẹnìkan tí yóò yè; ṣùgbọ́n nítorí àwọn àyànfẹ́, a ó gé àwọn ọjọ́ wọ̀nyẹn kúrú.

²³Nígbà náà bí ẹnikẹ́ni bá sọ fún yín pé, ‘Wò ó, Kristi nìyí,’ tàbí ‘Òun nìyẹn,’ ẹ má ṣe gbà á gbọ́. ²⁴Àwọn messia èké àti àwọn wòlíì èké yóò dìde, wọn yóò sì ṣe àwọn àmì ńlá àti iṣẹ́ ìyanu láti tan kódà àwọn àyànfẹ́ pàápàá jẹ, bí ó bá ṣe é ṣe. ²⁵Ẹ wò ó, mo ti sọ fún yín ṣáájú àkókò.

²⁶Nítorí náà bí wọ́n bá wí pé, ‘Wò ó, ó wà ní aginjù,’ ẹ má ṣe jáde lọ; ‘Wò ó, ó wà nínú àwọn yàrá ìkọ̀kọ̀,’ ẹ má ṣe gbà á gbọ́. ²⁷Nítorí gẹ́gẹ́ bí mànàmáná ti ń kọ́ láti ìlà-oòrùn tí ó sì ń hàn títí dé ìwọ̀-oòrùn, bẹ́ẹ̀ ni wíwá Ọmọ Ènìyàn yóò rí. ²⁸Níbikíbi tí òkú bá wà, níbẹ̀ ni àwọn igún yóò péjọ sí.

²⁹Lẹ́sẹ̀kẹsẹ̀ lẹ́yìn ìpọ́njú àwọn ọjọ́ wọ̀nyẹn, oòrùn yóò ṣókùnkùn, òṣùpá kì yóò sì tan ìmọ́lẹ̀ rẹ̀, àwọn ìràwọ̀ yóò já bọ́ láti ojú ọ̀run, agbára àwọn ọ̀run yóò sì mì tìtì. ³⁰Nígbà náà ni àmì Ọmọ Ènìyàn yóò farahàn ní ọ̀run, gbogbo ènìyàn ayé yóò sì ṣọ̀fọ̀, wọn yóò rí Ọmọ Ènìyàn tí yóò máa bọ̀ lórí àwọsánmà ọ̀run pẹ̀lú agbára àti ògo ńlá. ³¹Yóò sì rán àwọn áńgẹ́lì rẹ̀ jáde pẹ̀lú ìró ìpè kíkankíkan, wọn yóò sì kó àwọn àyànfẹ́ rẹ̀ jọ láti ọ̀dọ̀ afẹ́fẹ́ mẹ́rẹ̀ẹ̀rin, láti òpin ọ̀run kan sí ìkejì.

³²Ẹ kọ́ èyí láti ọ̀dọ̀ igi ọ̀pọ̀tọ́: gbàrà tí ẹ̀ka rẹ̀ bá rọ̀ tí ó sì rú ewé, ẹ̀yin yóò mọ̀ pé ìgbà ẹ̀ẹ̀rùn súnmọ́. ³³Bákan náà, nígbà tí ẹ bá rí gbogbo nǹkan wọ̀nyí, ẹ mọ̀ pé ó súnmọ́, ó wà ní ẹnu ọ̀nà. ³⁴Lóòótọ́ ni mo wí fún yín, ìran yìí kì yóò kọjá lọ rárá, àfi tí gbogbo nǹkan wọ̀nyí bá ti ṣẹlẹ̀ tán. ³⁵Ọ̀run àti ayé yóò kọjá lọ, ṣùgbọ́n ọ̀rọ̀ mi kì yóò kọjá lọ láéláé.

Baba Nìkan Ni Ó Mọ̀

³⁶“Kò sí ẹni tí ó mọ ọjọ́ náà tàbí wákàtí náà—kì í ṣe àwọn áńgẹ́lì ní ọ̀run, kì í ṣe Ọmọ náà—bí kò ṣe Baba nìkan. ³⁷Gẹ́gẹ́ bí ó ti rí ní àwọn ọjọ́ Noa, bẹ́ẹ̀ ni wíwá Ọmọ Ènìyàn yóò rí. ³⁸Nítorí ní àwọn ọjọ́ ṣáájú ìkún-omi, àwọn ènìyàn ń jẹ, wọ́n ń mu, wọ́n ń gbéyàwó, wọ́n sì ń fa ni fún ìgbéyàwó, títí di ọjọ́ tí Noa fi wọ inú ọkọ̀; ³⁹wọn kò sì mọ ohunkóhun títí tí ìkún-omi fi dé tí ó sì gbá gbogbo wọn lọ. Bẹ́ẹ̀ ni wíwá Ọmọ Ènìyàn yóò rí. ⁴⁰Ọkùnrin méjì yóò wà nínú oko; a ó mú ọ̀kan, a ó sì fi èkejì sílẹ̀. ⁴¹Obìnrin méjì yóò máa lọ nǹkan ní ọlọ; a ó mú ọ̀kan, a ó sì fi èkejì sílẹ̀. ⁴²Nítorí náà ẹ ṣọ́ra, nítorí ẹ kò mọ ọjọ́ tí Olúwa yín yóò dé. ⁴³Ẹ mọ èyí: ìbá ṣe pé baálé ilé mọ ìṣọ́ òru tí olè yóò dé, ìbá ṣọ́ra, kì bá sì jẹ́ kí a fọ́ ilé rẹ̀. ⁴⁴Nítorí náà ẹ̀yin pẹ̀lú ní láti múra sílẹ̀, nítorí Ọmọ Ènìyàn yóò dé ní wákàtí tí ẹ kò retí.

⁴⁵Ta ni ó ha jẹ́ ìránṣẹ́ olóòtítọ́ àti ọlọ́gbọ́n náà, ẹni tí ọ̀gá rẹ̀ fi ṣe olórí àwọn ará ilé rẹ̀ láti máa fún wọn ní oúnjẹ ní àkókò tí ó yẹ? ⁴⁶Yóò dára fún ìránṣẹ́ náà, ẹni tí ọ̀gá rẹ̀ bá ń ṣe bẹ́ẹ̀ nígbà tí ó bá padà dé. ⁴⁷Lóòótọ́ ni mo wí fún yín, yóò fi í ṣe olórí gbogbo ohun ìní rẹ̀. ⁴⁸Ṣùgbọ́n bí ìránṣẹ́ búburú náà bá wí nínú ara rẹ̀ pé, ‘Ọ̀gá mi ń pẹ́ láti dé,’ ⁴⁹tí ó sì bẹ̀rẹ̀ sí í lu àwọn ìránṣẹ́ ẹgbẹ́ rẹ̀, tí ó sì ń bá àwọn ọ̀mùtí jẹun, tí ó sì ń bá wọn mu ọtí. ⁵⁰Ọ̀gá ìránṣẹ́ náà yóò dé ní ọjọ́ tí kò retí, ní wákàtí tí kò mọ̀. ⁵¹Yóò sì gé e sí wẹ́wẹ́, yóò sì fi í sí àárín àwọn àgàbàgebè, níbi tí àwọn ènìyàn gbé ń sunkún tí wọ́n sì ń payín keke.”