மத்தேயு 24

24 ¹இயேசு ஆலயத்தைவிட்டுப் புறப்படுகையில், அவருடைய சீஷர்கள் ஆலயத்தின் கட்டிடங்களை அவருக்குக் காண்பிக்க அருகில் வந்தார்கள்.

²அதற்கு அவர், “இவைகளையெல்லாம் பார்க்கிறீர்களல்லவா? மெய்யாகவே நான் உங்களுக்குச் சொல்லுகிறேன்: இங்கே ஒரு கல்லின்மேல் ஒரு கல் இராதபடிக்கு எல்லாம் இடிக்கப்படும்” என்றார்.

³இயேசு ஒலிவமலையின்மேல் உட்கார்ந்திருக்கையில், சீஷர்கள் அவரிடத்தில் தனிமையாக வந்து, “இவைகள் எப்பொழுது நடக்கும்? உம்முடைய வருகைக்கும் உலகத்தின் முடிவுக்கும் அடையாளம் என்ன? எங்களுக்குச் சொல்லும்” என்றார்கள்.

⁴இயேசு அவர்களுக்குப் பிரதியுத்தரமாக, “ஒருவனும் உங்களை ஏமாற்றாதபடி எச்சரிக்கையாயிருங்கள்.

⁵ஏனெனில், அநேகர் என் நாமத்தினாலே வந்து, ‘நானே கிறிஸ்து’ என்று சொல்லி, அநேகரை ஏமாற்றுவார்கள். ⁶யுத்தங்களையும் யுத்தங்களின் செய்திகளையும் கேள்விப்படுவீர்கள்; கலங்காதிருங்கள். இவைகள் நடக்கவேண்டியதே; ஆனாலும் முடிவு இன்னும் வரவில்லை. ⁷ஜனத்துக்கு விரோதமாய் ஜனமும், ராஜ்யத்துக்கு விரோதமாய் ராஜ்யமும் எழும்பும்; பல இடங்களில் பஞ்சங்களும் பூமியதிர்ச்சிகளும் உண்டாகும். ⁸இவைகளெல்லாம் வேதனைகளின் ஆரம்பமே.

⁹அப்பொழுது உங்களை உபத்திரவத்திற்கு ஒப்புக்கொடுத்து, கொலைசெய்வார்கள்; என் நாமத்தினிமித்தம் எல்லா ஜனங்களாலும் பகைக்கப்படுவீர்கள். ¹⁰அக்காலத்தில் அநேகர் இடறலடைந்து, ஒருவரையொருவர் காட்டிக்கொடுத்து, ஒருவரையொருவர் பகைப்பார்கள். ¹¹அநேக கள்ளத்தீர்க்கதரிசிகள் எழும்பி, அநேகரை ஏமாற்றுவார்கள். ¹²அக்கிரமம் பெருகுகிறதினால், அநேகருடைய அன்பு தணிந்துபோகும். ¹³ஆனாலும் முடிவுபரியந்தம் நிலைத்திருப்பவனே இரட்சிக்கப்படுவான். ¹⁴ராஜ்யத்தினுடைய இந்த நற்செய்தி எல்லா ஜனங்களுக்கும் சாட்சியாக உலகமெங்கும் பிரசங்கிக்கப்படும்; அப்பொழுது முடிவு வரும்.

¹⁵ஆகையால், தீர்க்கதரிசியாகிய தானியேலால் சொல்லப்பட்ட பாழாக்கும் அருவருப்பு பரிசுத்த ஸ்தலத்திலே நிற்பதைக் காணும்போது—வாசிக்கிறவன் சிந்திக்கக்கடவன்— ¹⁶அப்பொழுது யூதேயாவிலிருக்கிறவர்கள் மலைகளுக்கு ஓடிப்போகக்கடவர்கள்.

¹⁷வீட்டின்மேலிருக்கிறவன் தன் வீட்டிலிருந்து ஏதாகிலும் எடுக்கக் கீழே இறங்காதிருக்கக்கடவன். ¹⁸வயலிலிருக்கிறவன் தன் மேலங்கியை எடுக்கத் திரும்பிப் போகாதிருக்கக்கடவன். ¹⁹அந்நாட்களில் கர்ப்பவதிகளுக்கும் பால்கொடுக்கும் தாய்மார்களுக்கும் ஐயோ, எத்தனை பயங்கரமாயிருக்கும்! ²⁰உங்கள் ஓட்டம் மாரிகாலத்திலாவது ஓய்வுநாளிலாவது நேரிடாதபடி வேண்டிக்கொள்ளுங்கள். ²¹ஏனெனில், உலகத்தின் ஆரம்பம்முதல் இதுவரைக்கும் உண்டாயிராததும், இனிமேலும் உண்டாகாததுமான மகா உபத்திரவம் அப்பொழுது உண்டாகும். ²²அந்நாட்கள் குறைக்கப்படாதிருந்தால், ஒருவனும் தப்பிப்பிழைப்பதில்லை; ஆனாலும் தெரிந்துகொள்ளப்பட்டவர்களினிமித்தம் அந்நாட்கள் குறைக்கப்படும்.

²³அப்பொழுது, ‘இதோ, கிறிஸ்து இங்கே இருக்கிறார்,’ அல்லது ‘அதோ, அங்கே இருக்கிறார்’ என்று ஒருவன் உங்களுக்குச் சொன்னால் நம்பாதிருங்கள். ²⁴ஏனெனில், கள்ளக்கிறிஸ்துக்களும் கள்ளத்தீர்க்கதரிசிகளும் எழும்பி, கூடுமானால் தெரிந்துகொள்ளப்பட்டவர்களையும் ஏமாற்றத்தக்கதாக பெரிய அடையாளங்களையும் அற்புதங்களையும் செய்வார்கள். ²⁵இதோ, முன்னதாகவே நான் உங்களுக்குச் சொல்லிவைத்தேன்.

²⁶ஆகையால், ‘இதோ, அவர் வனாந்தரத்தில் இருக்கிறார்’ என்று சொன்னால் புறப்படாதிருங்கள்; ‘இதோ, உள்ளறைகளில் இருக்கிறார்’ என்று சொன்னால் நம்பாதிருங்கள். ²⁷மின்னல் கிழக்கிலிருந்து தோன்றி மேற்குவரைக்கும் பிரகாசிக்கிறதுபோல, மனுஷகுமாரனுடைய வருகையும் இருக்கும். ²⁸பிணம் எங்கேயிருக்கிறதோ, அங்கே கழுகுகள் கூடிவரும்.

²⁹அந்நாட்களின் உபத்திரவம் முடிந்தவுடனே, சூரியன் இருண்டுபோகும், சந்திரன் ஒளிகொடாதிருக்கும், நட்சத்திரங்கள் வானத்திலிருந்து விழும், வானத்தின் வல்லமைகள் அசைக்கப்படும். ³⁰அப்பொழுது, மனுஷகுமாரனுடைய அடையாளம் வானத்தில் தோன்றும்; அப்பொழுது பூமியிலுள்ள எல்லா ஜனங்களும் புலம்பி, மனுஷகுமாரன் மிகுந்த வல்லமையோடும் மகிமையோடும் வானத்தின் மேகங்கள்மேல் வருகிறதைக் காண்பார்கள். ³¹பேரொலியுள்ள எக்காளத்தோடே அவர் தம்முடைய தூதர்களை அனுப்புவார்; அவர்கள் அவரால் தெரிந்துகொள்ளப்பட்டவர்களை வானத்தின் ஒருமுனை தொடங்கி மறுமுனைவரைக்கும் நான்கு திசைகளிலுமிருந்து கூட்டிச்சேர்ப்பார்கள்.

³²அத்திமரத்தினால் இந்த உவமையைக் கற்றுக்கொள்ளுங்கள்: அதின் கிளை இளகி, தளிர்விடும்போது, வேனிற்காலம் சமீபமாயிருக்கிறதென்று அறிகிறீர்கள். ³³அப்படியே இவைகளையெல்லாம் நீங்கள் காணும்போது, அது சமீபமாய், வாசற்படியிலே வந்திருக்கிறதென்று அறியுங்கள். ³⁴மெய்யாகவே நான் உங்களுக்குச் சொல்லுகிறேன்: இவைகளெல்லாம் நடந்துமுடியுமளவும் இந்தச் சந்ததி ஒழிந்துபோவதில்லை. ³⁵வானமும் பூமியும் ஒழிந்துபோகும், ஆனாலும் என் வார்த்தைகள் ஒழிந்துபோவதில்லை.

பிதாவானவர் மட்டுமே அறிவார்

³⁶அந்த நாளையும் நாழிகையையும் ஒருவனும் அறியான்; வானத்திலுள்ள தூதர்களும் அறியார்கள், குமாரனும் அறியார்; பிதாவானவர் மட்டுமே அறிவார். ³⁷நோவாவின் நாட்களில் எப்படி இருந்ததோ, அப்படியே மனுஷகுமாரனுடைய வருகையும் இருக்கும். ³⁸எப்படியெனில், ஜலப்பிரளயத்திற்கு முந்தின நாட்களில், நோவா பேழைக்குள் பிரவேசிக்கும் நாள்வரைக்கும், ஜனங்கள் புசித்தும் குடித்தும், பெண்கொண்டும் பெண்கொடுத்தும் வந்தார்கள். ³⁹ஜலப்பிரளயம் வந்து அனைவரையும் அடித்துக்கொண்டுபோகுமளவும் அவர்கள் ஒன்றும் அறியாதிருந்தார்கள்; அப்படியே மனுஷகுமாரனுடைய வருகையும் இருக்கும். ⁴⁰அப்பொழுது, இரண்டுபேர் வயலில் இருப்பார்கள்; ஒருவன் எடுத்துக்கொள்ளப்படுவான், மற்றவன் விடப்படுவான். ⁴¹இரண்டு ஸ்திரீகள் திரிகையில் மாவரைத்துக்கொண்டிருப்பார்கள்; ஒருத்தி எடுத்துக்கொள்ளப்படுவாள், மற்றவள் விடப்படுவாள். ⁴²ஆகையால், உங்கள் கர்த்தர் இன்ன நாளிலே வருவாரென்று நீங்கள் அறியாதிருக்கிறபடியால் விழித்திருங்கள். ⁴³இதை அறிந்துகொள்ளுங்கள்: இரவில் இன்ன ஜாமத்தில் திருடன் வருவானென்று வீட்டெஜமான் அறிந்திருந்தால், அவன் விழித்திருந்து, தன் வீடு உடைக்கப்படுவதற்கு இடங்கொடாதிருப்பான். ⁴⁴ஆகையால், நீங்கள் நினையாத நாழிகையில் மனுஷகுமாரன் வருவார்; அதனால் நீங்களும் ஆயத்தமாயிருங்கள்.

⁴⁵எஜமான் தன் வேலைக்காரருக்குத் தகுந்த வேளையிலே ஆகாரம் கொடுக்கும்படி, அவர்கள்மேல் விசாரணைக்கர்த்தனாக வைத்த உண்மையும் விவேகமுமுள்ள ஊழியக்காரன் யார்? ⁴⁶எஜமான் வரும்போது இப்படிச் செய்கிறவனாகக் காணப்படுகிற ஊழியக்காரனே பாக்கியவான். ⁴⁷மெய்யாகவே நான் உங்களுக்குச் சொல்லுகிறேன்: அவன் தனக்குள்ள யாவற்றின்மேலும் அவனை விசாரணைக்கர்த்தனாக வைப்பான். ⁴⁸ஆனால் அந்தப் பொல்லாத ஊழியக்காரனோ, ‘என் எஜமான் வர நெடுநாள் தாமதிக்கிறார்’ என்று தன் உள்ளத்தில் சொல்லிக்கொண்டு, ⁴⁹தன் உடன்வேலைக்காரரை அடிக்கவும், வெறியரோடே புசிக்கவும் குடிக்கவும் தொடங்கினால், ⁵⁰அந்த ஊழியக்காரன் நினையாத நாளிலும் அறியாத நாழிகையிலும் அவனுடைய எஜமான் வந்து, ⁵¹அவனைக் கடினமாய்த் தண்டித்து, மாயக்காரரோடே அவனுக்குப் பங்கை நியமிப்பான்; அங்கே அழுகையும் பற்கடிப்பும் உண்டாயிருக்கும்.”