Matthew 24 FHB Father's Heart Bible™

24 ¹Jisu mondir pora ulai jai thakise, aru Tar chella khan Tar ke mondir laga ghor khan dikhabole ahhise.

²“Tumikhan eitu sob dikhise na?” Jisu jawab dise. “Hosa kotha Moi tumikhan ke koi ase, yate ekta pathor bhi dusra pathor uporte nathakibo; sob bhangai dibo.”

³Jisu Olive Pahar te bohi thaka somoite, Tar chella khan lukai kene Tar usorte ahhi kene koise, “Amikhan ke kobi, eitu sob kitia hobo, aru Apuni laga aha aru jug laga shesh laga chihna ki hobo?”

⁴Jisu jawab di kene koise, “Hoshiar thakibi, kun bhi tumikhan ke thogabo nadibi.

⁵“Kilemane bisi manuh Moi laga nam te ahhibo, aru kobo, ‘Moi Khrista ase,’ aru tarkhan bisi manuh ke thogabo. ⁶Tumikhan lorai aru lorai laga khobor khan hunibo—kintu bhoi nakoribi. Eitu sob hobo lage, kintu shesh tu etiya nohoi. ⁷Desh ekta dusra desh laga birodh te uthibo, aru rajyo ekta dusra rajyo laga birodh te uthibo, aru alag alag jagate akal aru mati-hili hobo. ⁸Eitu sob bacha jonom hua dukh laga shuru ase.

⁹Titia tarkhan tumikhan ke dukh pabole dhori dibo aru morai dibo, aru Moi laga nam karne sob desh pora tumikhan ke ghin koribo. ¹⁰Hei somoite bisi manuh biswas pora giri jabo, aru ekjon-ekjon ke thogai dibo aru ghin koribo, ¹¹aru bisi misa bhabobadi khan ulabo aru bisi manuh ke thogabo. ¹²Kilemane niyom namana tu bisi hobo, bisi manuh laga morom thanda hoi jabo, ¹³kintu kun shesh tak dhorjo kori thakibo, tai poritran pabo. ¹⁴Eitu rajyo laga bhal khobor tu sob desh ke sakhi hobole prithibi sob jagate prachar koribo, aru titia shesh tu ahhibo.

¹⁵Karne jitia tumikhan Daniel bhabobadi pora kowa ghin laga sob khotom kora jinis tu pobitro jagate khara thaka dikhibo—kun porhe tai bujhi lobi— ¹⁶titia kun Judea te ase tarkhan pahar khan te polai jabi.

¹⁷“Kun ghor uporte ase tai ghor pora saman lobole nicha te na-namibi, ¹⁸aru kun kheti te ase tai kapur lobole wapas na-jabi. ¹⁹Hei din khan te pet thaka maiki khan aru bacha ke dudh khilai thaka ama khan nimite kiman dukh hobo! ²⁰Tumikhan laga polai jua tu thanda somoite nahole Bisram din te na-hobole prathana koribi. ²¹Kilemane titia dangor dukh hobo, prithibi shuru pora etiya tak kitia bhi nohua, aru aru kitia bhi nohobo. ²²Jodi hei din khan ke komti nakorile, kun bhi nabachibo; kintu basi luwa manuh khan nimite hei din khan komti kori dibo.

²³Titia jodi kun bhi tumikhan ke kobo, ‘Sabi, yate Khrista ase,’ nahole ‘Tate Tai ase,’ biswas nakoribi. ²⁴Misa Khrista khan aru misa bhabobadi khan ulabo, aru dangor chihna aru asurit kaam khan dikhabo, aru parile basi luwa manuh khan ke bhi thogabole kosis koribo. ²⁵Sabi, Moi age pora tumikhan ke koi dise.

²⁶Karne jodi tarkhan kobo, ‘Sabi, Tai jongol te ase,’ bahar te na-jabi; ‘Sabi, bhitor kamra khan te ase,’ biswas nakoribi. ²⁷Kilemane jineka bijli purab pora chamki kene paschim tak dikhai, tineka Manuh laga Putro laga aha hobo. ²⁸Juntu jagate mora gaw ase, tate shkuni khan joma hobo.

²⁹Hei din khan laga dukh laga pichete, suruj tu andhar hoi jabo, chand pora puhor nadibo, tara khan akas pora giri jabo, aru sorgo laga takot khan hili jabo. ³⁰Titia Manuh laga Putro laga chihna tu akas te dikhai dibo, aru prithibi laga sob jati khan kandibo, aru tarkhan Manuh laga Putro ke takot aru dangor mahima logote sorgo laga badal khan uporte aha dikhibo. ³¹Tai jor awaj thaka turuti logote Tar sorgodoot khan ke pathai dibo, aru tarkhan Tar basi luwa manuh khan ke charta hawa pora, akas laga ekta kinar pora dusra kinar tak joma koribo.

³²Dimoru gos pora eitu sikhibi: jitia tar dal tu norom hoi kene pata ulai, tumikhan gorom din tu usorte ahhise koi kene jani loi. ³³Tineka, jitia tumikhan eitu sob dikhibo, Tai usorte ase, dorja te ase koi kene jani lobi. ³⁴Hosa kotha Moi tumikhan ke koi ase, eitu sob nohua tak, eitu jamana tu hosa pora nakhotom hobo. ³⁵Akas aru prithibi khotom hoi jabo, kintu Moi laga kotha khan kitia bhi nakhotom hobo.

Khali Pitri He Jane

³⁶“Hei din nahole somoi tu kun bhi najane—sorgo laga sorgodoot khan bhi nohoi, Putro bhi nohoi—khali Pitri he jane. ³⁷Jineka Noah laga din khan te thakise, tineka Manuh laga Putro laga aha hobo. ³⁸Kilemane bhoga pani aha age laga din khan te, Noah naw bhitor te huma din tak, manuh khan khaise aru piise, shadi korise aru shadi te dise; ³⁹aru bhoga pani ahhi kene tarkhan sob ke loi najua tak tarkhan eku najanise. Tineka Manuh laga Putro laga aha hobo. ⁴⁰Duijon manuh kheti te thakibo; ekjon ke loi lobo aru dusra ke chari dibo. ⁴¹Duijon maiki hath chakki te pisi thakibo; ekjon ke loi lobo aru dusra ke chari dibo. ⁴²Karne jagi thakibi, kilemane tumikhan laga Prabhu kun din ahhibo tumikhan najane. ⁴³Eitu bujhi lobi: jodi ghor malik tu chor kun raat laga pahara te ahhibo jani loile, tai jagi thaki kene tar ghor ke bhangi huma nadibole thakibo. ⁴⁴Karne tumikhan bhi taiyar thakibi, kilemane Manuh laga Putro tumikhan nabhaba somoite ahhibo.

⁴⁵Titia hoile biswasi aru gyaani noukar kun ase, kun ke malik pora tar ghor manuh khan ke thik somoite khana dibole rakhise? ⁴⁶Hei noukar nimite bhal hobo, jun ke tar malik wapas aha somoite eneka kori thaka pabo. ⁴⁷Hosa kotha Moi tumikhan ke koi ase, malik pora tai ke tar sob saman uporte rakhidibo. ⁴⁸Kintu jodi hei biya noukar tu tar monte kobo, ‘Moi laga malik deri tak ahibo nai,’ ⁴⁹aru tar sathi noukar khan ke marbole shuru koribo aru sharabi khan logote khabole aru pibole shuru koribo. ⁵⁰Hei noukar laga malik tu tai nabhaba din te, tai najana somoite ahhibo. ⁵¹Malik pora tai ke tukra tukra kati dibo aru kopoti khan logote rakhibo, tate manuh khan kandibo aru daat kamuribo.”