Kalum In Batanlaye
Kalum in ga thangsia damlune diga rin thangnu kaan bi, potroi rwanna atibo diga ngaiye. Jisu na kraan bing, pi swaknu, kakoinu christa rwan, kriangnu kasanu, khatle pon lou lang le mi khatna daan mak lang nge kraan pak kriangnu om lang bi kabia nge. Haba ni ding ga tudannuna thei make—tambaan chonglang rwanna le make, Sa Kapaisana le make, ani Pa khatzana thei nge.
24 1Jisu na kalum in bina se swaknu kaan bi, Baom potroi rwan gana baom in bing ding Bakhou mu thang lang hung rwe.
2Maanna bani khou katake, “Hei bing nga nani mubo? Batak sekka Eina nani khou rinnuwe, abeiya lung khat chung bi lung khatchale thangsia dam laye; nating am thang sialune.”
3Jisu na Olive tum la badung ongnu kaan bi, Baom potroi rwan gana inkamga Bakhou hungluga rinne, “Hei bing ga tu chakrin bi swak dingbo, khatle Nang hungnu le talei kakhamnu om badan ga pa-aambo, ani khou rin thang ngo.”
4Jisu na bani khou katake, “Pakhatchanale nani ding minam mak lang cheksinno.
5“Balangbe mi tamga Ameng lang hungluga, ‘Ei Christa ye’ diga rinluga, mi tamga minam damlune. 6Nanina kraan khatle kraan cham ngaisulune—nani loh lo mako. Hei thinu bing ga swak loi tingnu rwe, atiyeda kakhamnu ga hung mak aang nge. 7Chaat khatna chaat khat lu chung bi, khatle krwang talei khatna krwang talei khat maitwang bi katwak thoulune; bariak inza bi bu taangnu le talei kalingnu amlune. 8Hei bing nga nao lung lang nainu riangre om hou thounu rwe.
9Habei ga banina nani ding riangrenu lang pi lou bachamluga, nani ding that satlune; khatle Ameng lang chungna chaat bingza nani ding batanlune. 10Haba kaan bi mi tamga balumsa latlune, khatle bani inla pi lou bachamluga inla batanlune, 11khatle kakoinu thiamting rwan tamga hungluga, mi tamga minam damlune. 12Chongtan thouto maknu ga inku thoulune briakpina, mi tamnu om kriang ga dai thanglune, 13atiyeda kakhamnu tangga khaangnu bating ga kan thanglune. 14Heiba krwang talei om sacham ma chaat bingza lang kathing danga talei ram bing bi kasam selune, habei ga kakhamnu ga hunglune.
15Atibriakpina thiamting Daniel na rin thangnu to braan to mutnu om batannu tonu ga bathiangnu riak pi batanga ongnu nanina munu kaan bi—(panu mi gana bakaba thei ding ngo), 16habei ga Judea bi ongnu nunna rammwan la pak thou dam ding ngo.
17“In chung la ongnu mi gana baom in bina pa-aam lou swak lang tato lat mak ting ngo, 18khatle lou la ongnu mi gana bapwan lou lang han lat mak ting ngo. 19Haba kaan bi pum rit ongnu khatle naosen kainu kamaisa rwan ga aih sianuweda! 20Nani om pak thou damnu ga sikpha bi mak tabe Sabbath lumik bi swak mak lang kalummo. 21Balangbe haba kaan bi talei ram dam thou tan bina thouga atun tangnu sung bi hung mak aangnu khatle impha ni beida hung lat mak tingnu riangre kanang ga hunglune. 22Haba kaan ga pi toi thang mak ngaake dabe pakhatcha hakna ringlaye; atiyeda kathang swaknu mi nun lang chungna haba kaan ga pi toi thanglune.
23Habei ga tudannuna nani khou, ‘Phaang ngo, abeiya Christa amme,’ mak tabe ‘Ula Maan amme,’ diga rinne dabe, balumsa mako. 24Kakoinu messiah le kakoinu thiamting rwan hungluga, zaye dabe kathang swaknu mi nun ding le hakna minam lang badan liannu le tasiatnu chwan tolune. 25Phaang ngo, Eina kama bina nani khou rin thang drwe.
26Atibriakpina banina, ‘Phaang ngo, Maan ramzat la amme,’ diga rinne dabe, se swak mako; ‘Phaang ngo, insung kaa bi amme,’ diga rinne dabe, balumsa mako. 27Balangbe khwa bathaaknu ga lumik swak lana baan thouluga lumik taak tangga baannu ga danga, Misa Sa Kapaisa om hungnu ga le hadanlune. 28Kathi pum amnu riak pi ga langkiya rwan hung kadoilune.
29Haba kaan om riangrenu nung tako takka, nambu ga zing thanglune, tha gana baan pilaye, aasi rwan ga tambaan bina taklune, khatle tambaan om ngam bing ga kanuk thanglune. 30Habei ga tambaan bi Misa Sa Kapaisa om badan ga mulune, khatle Misa Sa Kapaisa gana ngam le lwat liannu le bachamga tambaan om tambu bi hungnu talei bi mi chaat bingza munu kaan bi nu hweilune. 31Maanna trumpet baraam liannu le Baom tambaan chonglang rwan ding se swaklune, khatle banina tambaan kalan khat lana kalan khat tangga, thiraang mali lana Baom kathang swaknu mi nun ding khom thoulune.
32Tacham kung bina heiba chongchak heiya bachuwo: bakachang ga bum thangga banaa phun swaknu kaan bi, khwalumpha nai rwe dinu nanina theiye. 33Hadanga le, nanina hei bing nga munu kaan bi, haga nai rwe khatle inkhaan bi tang rwe dinu theiyo. 34Batak sekka Eina nani khou rinnuwe, hei bing nga nating swak loi mak basaan, heiba dat pi mi nun ga se dam laye. 35Tambaan le talei ram ga se damlune, atiyeda Achong bing ga khwa seiga se dam laye.
Pa Za na Theiye
36“Haba lumik khatle haba chakrin ding pakhatchanale thei make—tambaan la ongnu chonglang rwan le, Sa Kapaisa le thei make—Pa za na theiye. 37Noah om kaan bi swak tamnu ga danga, Misa Sa Kapaisa om hungnu ga le hadanlune. 38Balangbe tui lian mak aangnu kaan bi, Noah na lipui bi khut thou mak basaan, mi nun ga saluga, inluga, tazwan bahwanluga khatle tazwan bahwan bi pi thangga ong ngaake; 39khatle tui lian hungluga bani ding nating to braan sat loi basaan, banina pa-aam thei mak ngaake. Misa Sa Kapaisa om hungnu ga le hadanlune. 40Misa pat ni lou la onglune; khat ting lou thou damlune, khat ting thangsialune. 41Kamaisa pat ni saang tak bacham onglune: khat ting lou thou damlune, khat ting thangsialune. 42Atibriakpina cheksinno, balangbe nani Pukraangba tulumik bi hunglune dinu nani thei make. 43Heiya theiyo, inpu gana chan tuchakrin bi in baruk mi hung dingbo dinu thei ngaake dabe, maanna barakka ongluga bain ga pi torai mak ngaak tingnuwe. 44Atibriakpina nani le daanga ong ngo, balangbe nanina baning maknu chakrin bi Misa Sa Kapaisa ga hunglune.
45Ati dabe, bapuba na bakaan tangnu kaan bi baom in lo mi nun ding chaam lou bachamnu lang, baom in om mi nun chung bi khaam thang damnu balumsanu khatle balui amnu swak ga tubo? 46Baom bapuba hungnu kaan bi atiga to ongnu haba swak ka aih sanuwe. 47Eina nani khou batak sekka rinnuwe, maanna baom pot bingza chung bi bating khaam thang damlune. 48Atiyeda haba kachi maknu swak kana baraanto baning sung bi, ‘Ainpuba ga khwa sei hung laye’ diga baning nge dabe, 49atiga baom swak chawanu rwan ding bwei thouluga zu kalonu rwan le diga saga inga thou rwe dabe, 50Haba swak om bapuba gana baning maknu lumik bi, thei maknu chakrin bi hunglune. 51Maanna bating tanchat satlune khatle sathot tonu nun le diga pi lou bachamlune. Habei ga chapka khatle ngaatang ei karit ritka onglune.”