Rama Ngahirupkeun Deui Putra-Na

Awéwé-awéwé nepi ka kuburan wanci subuh sarta manggihan kuburan geus muka, para penjaga siga nu paraéh, jeung hiji malaikat nu nyebutkeun yén Rama-Na geus ngahirupkeun deui Mantenna. Para prajurit dibayar sangkan nyebutkeun yén layonna dipaling. Di hiji gunung di Galilea aya nu masih ragu, tapi kabéh diutus ka unggal bangsa.

Pasal 28.

Sanggeus poe Sabat, waktu balebat dina poe kahiji minggu, Maria Magdalena jeung Maria nu saurang deui datang rek nenjo kuburan. Ujug-ujug aya lini gede, sabab aya malaikat Rama urang lungsur ti sawarga, ngagulingkeun batu panutupna, tuluy dicalikan. Pameunteuna ngagebray lir kilat, anggoanana bodas lir salju. Para pangawal ngagibrig sarieuneun ka anjeunna, nepi ka jaradi cara nu maraot. Tapi malaikat teh nyarios ka para wanita tea, “Ulah sieun, sabab kami nyaho maraneh keur neangan Yesus anu disalib. Anjeunna geus teu aya di dieu — Anjeunna parantos gugah, sakumaha anu didawuhkeun ku Anjeunna. Ka darieu, tenjo tempat urut ebog-Na. Buru-buru indit, bejakeun ka murid-murid-Na: Anjeunna parantos gugah ti nu maraot. Tenjo, Anjeunna ti heula angkat ka Galilea; maraneh bakal tepung jeung Anjeunna di ditu. Regepkeun, kami geus ngabejaan maraneh.”

Tuluy maranehna buru-buru ninggalkeun kuburan, bari sieun jeung kacida bungahna, lajeng lumpat rek ngabejaan ka murid-murid-Na.

Ujug-ujug Yesus mendak ka maranehna, saur-Na, “Sing salamet!” Maranehna nyampeurkeun ka Anjeunna, nangkeup sampean-Na, bari sumujud ka Anjeunna. Geus kitu Yesus ngalahir ka maranehna, “Ulah sieun. Indit, bejakeun ka dulur-dulur Kami sina arangkat ka Galilea — di ditu maranehna bakal tepung jeung Kami.”

Katerangan Palsu ti Para Pangawal

Sabot keur di jalan, aya sawatara pangawal anu arasup ka kota, tuluy ngalaporkeun sagala kajadian tea ka para imam kapala. Sanggeus tepung jeung para kokolot sarta geus sapukat, maranehna mere duit loba pisan ka para prajurit, bari mapatahan, “Ucapkeun kieu: Murid-muridna datang peuting-peuting, maling layonna sabot kami keur sarare. Lamun ieu perkara nepi ka gupernur, ku kami bakal dibujuk sangkan percaya, sarta maraneh moal kabawa kana pakewuh.” Tuluy maranehna narima duit tea, sarta migawe cara anu dipapatahkeun; ieu carita sumebar di urang Yahudi nepi ka kiwari.

Parentah Rama ka Sakabeh Bangsa

Geus kitu murid-murid nu sabelas urang arindit ka Galilea, ka hiji gunung anu geus dituduhkeun ku Yesus. Barang narenjo Anjeunna, maranehna sumujud, tapi aya sawatara anu asa-asa.

Yesus nyampeurkeun, tuluy ngalahir ka maranehna, “Sagala kawasa di sawarga jeung di bumi geus dipaparinkeun ka Kami. Ku sabab eta, jung indit, jaradikeun murid Kami sakabeh bangsa, bari ngabaptis maranehna kana pajenengan Rama, Putra, jeung Roh Suci, ^a bari ngawurukan maranehna sangkan narurut kana sagala anu geus diparentahkeun ku Kami ka maraneh. Sing aringet, Kami salawasna nyarengan maraneh, nepi ka ahir jaman.”