پلار خپل زوئ راژوندے کوى
ښځې سهار وختي قبر ته رسېږي او هغه خلاص مومي، ساتونکي د مړو په څېر، او یوه پرښته چې وايي د هغه پلار هغه راژوندی کړی. عسکرو ته پیسې ورکول کېږي چې ووايي جسد غلا شوی. د جلیل پر یوه غره ځینې لا هم شک کوي، خو ټول هر قوم ته لېږل کېږي.
28 1د سبت د ورځې نه پس، د اوونۍ د اول ورځې په سحر، مريم مګدلينى او بله مريم قبر ليدو ته راغلې. 2ناڅاپه لويه زلزله راغله، ځکه چې د زمونږ پلار يو فرښته د آسمان نه راکوز شو، کاڼے يې راوګرځولو او پرې کښېناستو. 3د هغۀ بڼه د بريښنا په شان وه، او جامې يې د واورې په شان سپينې وې. 4پهره داران د هغۀ د وېرې نه ولړزېدل او د مړو سړو په شان شول. 5خو فرښتې ښځو ته ووئيل چې، ”مۀ يرېږئ، ځکه چې زۀ پوهېږم چې تاسو هغه عيسىٰ لټوئ چې په سولۍ باندې کښې کړے شوے وو. 6هغه دلته نشته، هغه بيا راژوندے شوے دے، لکه څنګه چې يې وئيلى وو. راشئ، هغه ځائ وګورئ چې هغه پکښې پروت وو. 7ژر لاړ شئ، د هغۀ مريدانو ته ووايئ چې، هغه د مړو نه بيا راژوندے شوے دے. وګورئ، هغه ستاسو نه مخکښې ګليل ته ځى، تاسو به هغه هلته وګورئ. واورئ، ما تاسو ته ووئيل.“
8نو هغوئ د وېرې او لويې خوشحالۍ سره ژر له قبر نه لاړې، او د هغۀ مريدانو ته د خبر ورکولو دپاره وزغلې.
9ناڅاپه عيسىٰ هغوئ سره مخامخ شو او ورته يې وفرمائيل چې، ”سلام وى!“ هغوئ ورته راغلې، د هغۀ پښې يې ونيولې او هغۀ ته يې سجده وکړه. 10بيا عيسىٰ هغوئ ته وفرمائيل چې، ”مۀ يرېږئ. لاړ شئ، زما وروڼو ته ووايئ چې ګليل ته لاړ شى، هغوئ به ما هلته وګورى.“
د پهره دارانو جوړه کړې کيسه
11کله چې هغوئ په لار کښې وې، نو ځنې پهره داران ښار ته ننوتل او مشرانو کاهنانو ته يې ټول هغه څۀ بيان کړل چې پېښ شوى وُو. 12هغوئ د مشرانو سره د ملاقات او صلاح کولو نه پس، سپاهيانو ته ډېرې پېسې ورکړې، 13او ورته يې ووئيل چې، ”داسې ووايئ چې د هغۀ مريدان د شپې راغلل او کله چې مونږ وېدۀ وو، نو هغه يې غلا کړو. 14کۀ دا خبره حاکم ته ورسېږى، نو مونږ به هغه راضى کړو او تاسو به د هر تکليف نه بچ کړو.“ 15هغوئ پېسې واخستې او لکه څنګه چې ورته وئيلى شوى وُو هم هغسې يې وکړل. دا خبره د يهوديانو په مينځ کښې تر نن ورځې پورې خوره شوې ده.
د پلار حُکم ټولو قومونو ته
16بيا يوولس مريدان ګليل ته هغه غر ته لاړل چې عيسىٰ ورته حُکم کړے وو. 17کله چې هغوئ هغه وليدو، نو هغۀ ته يې سجده وکړه، خو ځنو شک وکړو.
18عيسىٰ راغلو او هغوئ ته يې وفرمائيل چې، ”په آسمان او زمکه کښې ټول اِختيار ما ته راکړے شوے دے. 19نو تاسو لاړ شئ او د ټولو قومونو خلق مريدان کړئ، او د پلار، د زوئ او د روحُ القُدس په نامه ورته بپتسمه ورکوئ، a a v19 نوم مفرد دے: يو نوم، درې ذاتونه — پلار، زوئ، او روحُ القُدس. 20او هغوئ ته د هغه ټولو شيانو د منلو تعليم ورکوئ چې ما تاسو ته حُکم کړے دے. ياد لرئ، زۀ تل تر تله ستاسو سره يم، د دُنيا تر آخره پورې.“
