Pitri pora Tar laga Putro ke jivit kori uthaise

Mahila khan phojur te kobor te pai aru eitu khula thaka pai, pahara khan mora manuh nisena, aru ekjon sorgodoot koi Tai laga Pitri Tai ke jinda kori dise. Sipahi khan ke laash chur kori loi jaise koi kene kobole poisa diye. Galilee laga ekta pahar te kunba khan etiya bhi sondeho kore, tinu sob ke sob jati khan te pathai diye.

Adhyay 28.

Bisram din tu khotom huwa pichete, hafta laga prothom din te phojur homoi te, Mary Magdalene aru dusra Mary tu kobor sabole ahhise. Ekdom te dangor mati-kapa hoise, kilemane amar Pitri laga ekjon sorgodoth sorgo pora nami ahhi kene, pathor tu gurai di kene, aru tar uporte bohise. Tar chehera bijli nisina asele, aru Tar kapra tu borop nisina boga asele. Rukhiya khan Tar bhoi pora kapise, aru mora manuh nisina hoi jaise. Kintu sorgodoth pora maiki khan ke koise, “Bhoi nakoribi, kilemane tumikhan cross te morai diya Jisu ke bisari ase, eitu moi jane. Tar ethate nai—Tar koise nisina, Tar jee uthise. Ahhibi, Tar ke shuti rakha jaga tu sabi. Joldi jabi, aru Tar chella khan ke kobi: Tar mora pora jee uthise. Sabi, Tar tumikhan laga age te Galilee te jai ase; ta te tumikhan Tar ke dekhibo. Huni lobi, moi tumikhan ke koi dise.”

Titia tarkhan bhoi aru dangor khushi logote, joldi kobor pora ulai jaise, aru Tar chella khan ke kobole polaise.

Ekdom te Jisu tarkhan ke lok paise, aru koise, “Salam!” Tarkhan Tar usorte ahhi kene, Tar theng dhori kene, Tar ke aradhana korise. Titia Jisu tarkhan ke koise, “Bhoi nakoribi. Jabi, aru moi laga bhai khan ke Galilee te jabole kobi—ta te tarkhan Moi ke dekhibo.”

Sipahi khan laga misa kotha

Tarkhan rasta te jai thaka homoi te, kunba rukhiya khan sohor te ghusi kene, ki ki hoise sob mukhyo purohit khan ke koi dise. Bura manuh khan logote mili kene, aru ekta salah bonai kene, tarkhan sipahi khan ke bisi poisa dise, aru tarkhan ke koise, “Eneka kobi: ‘Amikhan ghumai thaka homoi te, Tar chella khan rati te ahhi kene Tar ke churi kori loi jaise.’ Jodi eitu kotha governor laga kan te ponchi jai, tene hole amikhan tar ke bujhai dibo, aru tumikhan ke dukh pora bachai lobo.” Tarkhan poisa tu loi kene, koi diya nisina korise; aru eitu kotha tu Yehudi khan majote aji tak phailai ase.

Sob jati khan nimite Pitri laga adesh

Titia egaroh jon chella khan Galilee te jaise, Jisu pora tarkhan ke jabole koi diya pahar te. Jitia tarkhan Tar ke dekhise, tarkhan Tar ke aradhana korise, kintu kunba manuh pora shaka korise.

Jisu ahhi kene tarkhan ke koise, “Sorgo te aru prithibi te sob adhikar Moi ke dise. Etu karne, jabi aru sob desh laga manuh khan ke chella bonabi, aru Pitri, Putro aru Pobitro Atma laga nam te tarkhan ke baptizma dibi, ^a aru Moi tumikhan ke hukum diya sob kotha mani bole tarkhan ke sikhai dibi. Mon te rakhibi, Moi hodai tumikhan logote ase, jug laga shes din tak.”