Baba Alamusa Mwana Wace
Akazi afika pa nthumbi macibese mbaigumana yakufunguka, anyakuonera ninga anthu akufa, na anju analonga kuti Baba wace amulamusa. Anyankhondo apaswa kobiri toera kulonga kuti manungo adabiwa. Pa phiri ya ku Galileya anango asanyerezera pontho, mbwenye onsene asatumwa kuna mitundu yonsene.
28 1Pakumala Sabudu, mamacibese pa ntsiku yakutoma ya sumana, Mariya Madhalena na Mariya unango aenda kuona nthumbi. 2Mwakukhonda dikhira kwaoneka citeketeke cikulu ca dziko, thangwi anju wa Baba wathu abuluka kudzulu, agudumusa mwala, mbakhala pa iwo. 3Maonekero ace akhali ninga nzati, na nguwo zace zikhali zakucena ninga matalala. 4Alonda akhakakamira na kugopa, mbakhala ninga anthu akufa. 5Mbwenye anju apanga akazi kuti: “Lekani kugopa, thangwi ndisadziwa kuti musasaka Yezu, ule adakhomerwa pa ntanda. 6Iye nkhabe pano—alamuka, ninga mudalongera Iye. Bwerani, onani mbuto idagona Iye. 7Ndokoni mwakucimbiza, mbamupanga anyakupfundza ace kuti: Iye alamuka muli akufa. Onani, akutsogolerani ku Galileya; munamuona kweneko. Bveserani, ndakupangani.”
8Na tenepo abuluka pa nthumbi mwakucimbiza, na kugopa pontho na kutsandzaya kukulu, mbathamanga toera kupanga anyakupfundza ace.
9Mwakukhonda dikhira Yezu abwera mbagumana nawo, mbalonga kuti: “Mwadzuka!” Iwo aenda kuna Iye, mbagwandira miyendo yace, mbamulambira. 10Penepo Yezu aapanga kuti: “Lekani kugopa. Ndokoni, mbamupanga abale anga kuti aende ku Galileya—iwo anandiona kweneko.”
Mafala Akubisa a Alonda
11Mukhaenda iwo, alonda anango apita mu nzinda mbapanga akulu a anyansembe pinthu pyonsene pidacitika. 12Pakumala kugumana na akulu mbakhunganya n'dzeru, apereka kobiri zizinji kuna anyankhondo, 13mbaapanga kuti: “Longani: Anyakupfundza ace abwera namasiku mbamba Iye mukhagona ife. 14Pyenepi pyangafika kuna ntongi, tinamunyengerera, mbatikusudzulani ku nyatwa.” 15Iwo atambira kobiri mbacita ninga mudapangwa iwo; mphangwa zenezi zamwazika pakati pa Ajuda mpaka lero.
Baba Apereka Basa kuna Madzindza Onsene
16Penepo anyakupfundza khumi na m'bodzi aenda ku Galileya, ku phiri kudaapanga Yezu kuti aende. 17Pidamuona iwo, amulambira, mbwenye anango apenula.
18Yezu abwera mbaapanga kuti: “Mphambvu zonsene kudzulu na pa dziko yapasi zapaswa kuna Ine. 19Natenepa ndokoni mbamucita madzindza onsene kukhala anyakupfundza, mbamubatiza mu dzina ya Baba na ya Mwana na ya Nzimu Wakucena, a a v19 Dzina ndi ibodzi basi: dzina ibodzi, Anthu atatu — Baba, Mwana, na Nzimu Wakucena. 20mbamupfundzisa toera kubvera pyonsene pidakupangani Ine. Kumbukani, Ine ndiri na imwe ntsiku zonsene, mpaka kumala kwa dziko.”
