Nna Akpọlitere Ọkpara Ya Nʼọnwụ

Ụmụ nwanyị ahụ ruru n'ili ahụ n'isi ụtụtụ ma hụ na o meghere emeghe, ndị nche dị ka ndị nwụrụ anwụ, na mmụọ ozi na-asị na Nna ya akpọlitela ya. E nyere ndị agha ego ka ha sị na e zuru ozu ya. N'elu otu ugwu na Galili, ụfọdụ ka na-enwe obi abụọ, ma e zigara ha niile na mba niile.

Isi 28.

Mgbe ụbọchị izuike ahụ gasịrị, nʼisi ụtụtụ nʼụbọchị mbụ nke izu ahụ, Meri Magdalịn na Meri nke ọzọ ahụ bịara ileta ili ahụ. Na mberede, oke ala ọma jijiji dara, nʼihi na otu mmụọ ozi nke Nna anyị si nʼeluigwe rịdata, kwọghachi nkume ahụ azụ, ma nọdụ nʼelu ya. Ọdịdị ya dị ka amụma egbe eluigwe, uwe ya na-achakwa ọcha dị ka snoo. Ndị nche ahụ tụrụ egwu ya maa jijiji, ghọọkwa dị ka ndị nwụrụ anwụ. Ma mmụọ ozi ahụ gwara ụmụ nwanyị ahụ sị, “Unu atụla egwu, nʼihi na amaara m na ọ bụ Jisọs, onye a kpọgburu nʼobe, ka unu na-achọ. Ọ nọghị nʼebe a—o siela nʼọnwụ bilie, dị ka o kwuru. Bịanụ, leenụ ebe o dinara. Gaanụ ngwa ngwa, gwa ndị na-eso ụzọ ya, sị: O siela nʼọnwụ bilie. Lee, ọ na-aga Galili buru unu ụzọ; unu ga-ahụ ya nʼebe ahụ. Geenụ ntị, agwaala m unu.”

Ya mere, ha ji ọsọ hapụ ili ahụ, jupụta nʼegwu na oke ọṅụ, gbaa ọsọ ịgwa ndị na-eso ụzọ ya.

Na mberede, Jisọs zutere ha, sị, “Ekele!” Ha bịakwutere ya, jidesie ụkwụ ya ike, ma kpọọ isiala nye ya. Mgbe ahụ, Jisọs gwara ha sị, “Unu atụla egwu. Gaanụ gwa ụmụnne m ka ha gaa Galili—ha ga-ahụ m nʼebe ahụ.”

Akụkọ Ụgha Ndị Nche Ahụ

Mgbe ha nọ nʼụzọ, ụfọdụ ndị nche banyere nʼobodo ahụ, kọọrọ ndịisi nchụaja ihe niile mere. Mgbe ha zukọrọ na ndị okenye ma chepụta atụmatụ, ha nyere ndị agha nnukwu ego, na-agwa ha sị, “Kwuonụ, sị: Ndị na-eso ụzọ ya bịara nʼabalị zuru ya mgbe anyị na-ehi ụra. Ọ bụrụ na nke a eruo gọvanọ ahụ ntị, anyị ga-eme ka obi dajụọ ya, chebekwa unu ka unu ghara inwe nsogbu.” Ha weere ego ahụ mee ihe a gwara ha; akụkọ a gbasara nʼetiti ndị Juu ruo taa.

Ozi Nna Nyere Maka Mba Niile

Mgbe ahụ, ndị na-eso ụzọ ya iri na otu gara Galili, gaa nʼugwu ahụ Jisọs nyere ha nʼiwu. Mgbe ha hụrụ ya, ha kpọọrọ ya isiala, ma ụfọdụ nwere obi abụọ.

Jisọs bịara gwa ha sị, “E nyela m ikike niile nʼeluigwe na nʼụwa. Ya mere, gaanụ mee ka mba niile ghọọ ndị na-eso ụzọ, na-eme ha baptizim nʼaha nke Nna, na nke Ọkpara, na nke Mmụọ Nsọ, ^a na-ezi ha idebe ihe niile m nyere unu nʼiwu. Chetanụ, mụ na unu nọ mgbe niile, ruo na njedebe nke oge a.”