Data azura Umwana we

Abagore bagera ku mva mu gitondo cya kare basanga ifunguye, abarinzi bameze nk'abapfuye, n'umumarayika uvuga ko Se yamuzuye. Abasirikari bahabwa amafaranga ngo bavuge ko umurambo wibwe. Ku musozi wo muri Galileya bamwe baracyashidikanya, nyamara bose boherezwa mu mahanga yose.

Igice cya 28.

Isabato ishize, mu gitondo cya kare ku munsi wa mbere w'icyumweru, Mariya w'i Magadala na wa wundi Mariya baza kureba imva. Nuko haba umutingito ukomeye w'isi, kuko umumarayika wa Data yamanutse ava mu ijuru, akungurura ibuye akaryicaraho. Uko yasaga byari nk'imirabyo, n'imyambaro ye yera de nk'urubura. Abarinzi bahinda umushyitsi baratinya cyane, bahinduka nk'abantu bapfuye. Ariko wa mumarayika abwira abo bagore ati: “Ntimugire ubwoba, kuko nzi ko mushaka Yezu wabambwe ku musaraba. Nta ho ari hano, kuko yazutse nk'uko yavuze. Nimuze murebe aho yari aryamye. Nimugende vuba mubwire abigishwa be muti: ‘Yazutse mu bapfuye. Dore abatanga ajya i Galileya; muzamuhabona yo.’ Dore mbibabwiye.”

Nuko bava ku mva vuba bafite ubwoba n'ibyishimo byinshi, biruka bajya kubibwira abigishwa be.

Nuko Yezu abasanga ababwira ati: “Mwaramutse!” Baramusanga bamufata ku birenge baramuramya. Maze Yezu arababwira ati: “Ntimugire ubwoba. Nimugende mubwire abavandimwe banjye bajye i Galileya, ni ho bazambona.”

Inkuru abarinzi bahimbye

Bakiri mu nzira, bamwe mu barinzi binjira mu mujyi batekerereza abatambyi bakuru ibyabaye byose. Bamaze guhura n'abakuru b'imiryango bakagira inama, baha abasirikari amafaranga menshi, babategeka bati: “Muyavuge muti: ‘Abigishwa be bazanye nijoro baramwiba turimo gusinzira.’ Niba ibi bigeze ku mutegetsi w'intara, tuzamwemeza tubarinde ingorane.” Bafata ayo mafaranga bakora uko babwiwe; iyo nkuru ikwira mu Bayahudi kugeza n'uyu munsi.

Data atuma abigishwa mu mahanga yose

Nuko ba bigishwa cumi na umwe bajya i Galileya, ku musozi Yezu yari yabategetse. Bamubonye baramuramya, ariko bamwe barashidikanya.

Yezu araza arababwira ati: “Ubutware bwose mu ijuru no ku isi bwampawe. Nuko nimugende muhindure abantu bo mu mahanga yose abigishwa, mubatiza mu izina rya Data n'Umwana na Mwuka Muziranenge, ^a mubigisha kubahiriza amategeko yose nabahaye. Mwibuke ko buri gihe turi kumwe, kugeza isi igeze ku musozo wayo.”