Ota Oʻz Oʻgʻlini tiriltiradi

Ayollar tong saharda qabrga yetib keladi va uni ochiq, qorovullarni oʻlikdek, bir farishtani esa Otasi uni tiriltirganini aytayotgan holda koʻradi. Askarlarga jasadni oʻgʻirlab ketishgan deyishlari uchun pul beriladi. Jaliladagi bir togʻda baʼzilar hali ham shubhalanadi, shunga qaramay hammasi barcha xalqlarga yuboriladi.

28-bob.

Shanba kuni oʻtgach, haftaning birinchi kunida tong saharda, Magdalalik Maryam bilan boshqa Maryam qabrni koʻrgani kelishdi. Birdan kuchli zilzila boʻldi, chunki Otamizning farishtasi osmondan tushib, toshni dumalatib surib, uning ustiga oʻtirdi. Uning koʻrinishi chaqmoqdek, kiyimi esa qordek oppoq edi. Qorovullar undan qoʻrqib titrab ketishdi va oʻlikdek boʻlib qolishdi. Lekin farishta ayollarga dedi: “Qoʻrqmanglar, chunki men xochga mixlangan Isoni qidirayotganingizni bilaman. U bu yerda yoʻq — U aytganidek, tirildi. Kelinglar, U yotgan joyni koʻringlar. Tezda borib, Uning shogirdlariga aytinglar: U oʻlimdan tirildi. Mana, U sizlardan oldin Jalilaga bormoqda; Uni oʻsha yerda koʻrasizlar. Eshitinglar, men sizlarga aytdim.”

Shunda ular qoʻrquv va katta quvonch bilan qabrdan tezda chiqib, Uning shogirdlariga xabar bergani yugurib ketishdi.

Birdan Iso ularni kutib oldi va: “Salom sizlarga!” — dedi. Ular Uning oldiga kelib, Uning oyoqlaridan ushlab, Unga sajda qilishdi. Shunda Iso ularga dedi: “Qoʻrqmanglar. Borib, birodarlarimga aytinglar, Jalilaga yoʻl olsinlar — ular Meni oʻsha yerda koʻradilar.”

Qorovullarning uydirmasi

Ular yoʻlda ketayotganda, ayrim qorovullar shaharga kirib, boʻlib oʻtgan voqealarning hammasini oliy ruhoniylarga xabar qildilar. Oqsoqollar bilan uchrashib, reja tuzgach, askarlarga katta miqdorda pul berishdi va ularga shunday deb tayinlashdi: “Deng: «Biz uxlab yotganimizda, Uning shogirdlari kechasi kelib, Uni oʻgʻirlab ketishdi.» Agar bu gap hokimga yetib borsa, biz uni koʻndiramiz va sizlarni balodan xoli qilamiz.” Ular pulni olib, oʻzlariga aytilganidek qilishdi; bu xabar yahudiylar orasida shu kungacha tarqalib yurgan.

Otamizning barcha xalqlarga topshirigʻi

Shundan soʻng oʻn bir shogird Jalilaga, Iso ularga koʻrsatgan togʻga borishdi. Ular Uni koʻrganlarida, Unga sajda qilishdi, lekin baʼzilari shubhalandi.

Iso ularning oldiga kelib dedi: “Osmonu yerdagi butun hokimiyat Menga berildi. Shuning uchun borib, barcha xalqlarni shogird qilinglar, ularni Ota, Oʻgʻil va Muqaddas Ruh nomi bilan suvga choʻmdiringlar, ^a Men sizlarga buyurgan hamma narsaga itoat qilishni ularga oʻrgatinglar. Esda tutinglar, Men dunyoning oxirigacha doimo sizlar bilan birgaman.”