Baba Vedu Vanomutsa Mwanakomana Wavo

Vakadzi vanosvika paguva mambakwedza vachiriwana rakazaruka, varindi vakaita savanhu vakafa, uye ngirozi ichiti Baba vake vamumutsa. Varwi vanopiwa mari kuti vati mutumbi wakabiwa. Pagomo muGarirea vamwe vachiri kukahadzika, asi vose vanotumwa kumarudzi ose.

Chitsauko 28.

Pashure peSabata, mambakwedza pazuva rokutanga revhiki, Maria Magadharena naimwe Maria vakauya kuzoona guva. Pakarepo kwakaitika kudengenyeka kukuru kwenyika, nokuti mutumwa waBaba vedu akaburuka achibva kudenga, akakungurutsa ibwe, akagara pamusoro paro. Chitarisiko chake chakanga chakaita semheni, uye nguo dzake dzakanga dzakachena sechando. Varindi vakadedera nokumutya, vakaita savanhu vakafa. Asi mutumwa akati kuvakadzi, “Musatya, nokuti ndinoziva kuti muri kutsvaga Jesu, uyo akarovererwa pamuchinjikwa. Haasi pano, amuka, sezvaakareva. Uyai, muone nzvimbo yaakanga arere. Endai nokukurumidza, muudze vadzidzi vake kuti: Amuka kuvakafa. Tarirai, ari kukutungamirirai achienda kuGarirea; muchamuona ikoko. Teererai, ndakuudzai.”

Saka vakabva paguva nokukurumidza, vaine kutya nomufaro mukuru, vakamhanya kundoudza vadzidzi vake.

Pakarepo Jesu akasangana navo, achiti, “Kwaziwai!” Vakauya kwaari, vakabata tsoka dzake, vakamunamata. Ipapo Jesu akati kwavari, “Musatya. Endai, muudze hama dzangu kuti dziende kuGarirea, ipapo vachandiona.”

Nyaya Yenhema yaVarindi

Vachiri munzira, vamwe varindi vakapinda muguta vakaudza vaprista vakuru zvose zvakanga zvaitika. Vakati vasangana navakuru vakaronga zano, vakapa mauto mari zhinji, vachivaudza vachiti, “Itii: Vadzidzi vake vauya usiku vakamuba isu takarara. Kana izvi zvikasvika kuna gavhuna, tichamunyengetedza tigokuchengetai musina dambudziko.” Vakatora mari vakaita sezvavakaudzwa; nyaya iyi yakapararira pakati pavaJudha kusvikira nhasi.

Murayiro waBaba vedu kuMarudzi Ose

Ipapo vadzidzi gumi nomumwe vakaenda kuGarirea, kugomo iro Jesu akanga avaraira. Pavakamuona, vakamunamata, asi vamwe vakakahadzika.

Jesu akauya akati kwavari, “Simba rose rokutonga kudenga napanyika rakapiwa kwandiri. Naizvozvo endai muite kuti marudzi ose ave vadzidzi, muchivabhabhatidza muzita raBaba neroMwanakomana neroMweya Mutsvene, ^a muchivadzidzisa kuchengeta zvose zvandakakurayirai. Rangarirai, ndinemi mazuva ose, kusvikira kumagumo enyika.”