Hiak swak thang rwe
Chongdip

Pa Na Basa Kapaisa Ding Pi Ring Thou Thangne

Mei nunna louthwan karang takka thaan bi hung tangnu kaan bi, haga tang lan dinu mu rwe, rangkaan rwan ga thinu nun danga swake, atiga tambaan chonglang khatna ani Pa na Maan ding ring thou lat thang rwe diga rinne. Potroi rwanna zingpha Bapum ding ran lou se rwe diga rin lang kraanmi rwan ding sian pi rwe. Galilee rammwan la kasemna sung kani ong peida, bani brumza ding chaat bingza khou pi hung rwe.

Bung 28.

Sabbath ni loinu nung, maap lak om kamanu ni louthwan karang takka, Mary Magdalene le katei Mary na thaan ka phaang lang hung rwe. Thei mak daakka talei kaling tak rwe, balangbe ani Pa om tambaan chonglang khat tambaan lana tanga, thaankham lung ding tun swak thangluga baha lu chung bi badung rwe. Baman ga khwa bathaaknu danga baan ngaake, atiga bapwan ga kabun danga ngou swak rwe. Rangkaan rwanna Bating kachi kathokka, thinu nun danga swak rwe. Atiyeda tambaan chonglang na mei nun khou rinne, “Kachi mako, balangbe nanina cross pi bakhai thangnu Jisu ding zong ongme dinu eina theiye. Maan abeiya ong lan rwe—Maanna rin thangnu danga Maan ring thou drwe. Hungluga Maan ri thang damnu riak ka phaang ngo. Barapka seluga Baom potroi rwan khou bapuro: Maan thinu nun lak pina ring thou drwe. Phaang ngo, Galilee la Maan nani meithaan se ongme; habei la nanina Maan ding mulune. Ngaiyo, eina nani khou rin rwe.”

Atiga bani nun kachiga khatle karo takka thaan lana barapka hungluga, Baom potroi rwan khou rin lang pak se rwe.

Thei mak daakka Jisu na bani ding kadouluga rinne, “Lozaang sawo!” Banina Bakim bi hungluga Baket pi namga Bating kalum rwe. Haba nung bi Jisu na bani khou rinne, “Kachi mako. Seluga aunao rwan khou Galilee la se lang rinno—habei ga banina Ei ding mulune.”

Rangkaan Rwan om Thinlem Chong

Bani se hung bi, rangkaan rwan kasemna nampui la sekhutluga swak tamnu bing ga takopuba rwan khou bapu rwe. Patso rwan le diga ong kadoiluga chong katunu nung, kraanmi rwan khou tangka taswang khak pi rwe, bani khou rinne, “Nanina rinno: anina inthi thou damnu kaan bi Baom potroi rwanna zan bi hungluga Bating hui thang rwe diga. Heiba chong taleipuba na ngaisu drwe dabe, anina maan bathemga nani ding riangre to mak lang anina ngaak thanglune.” Banina tangka louluga bani khou rin thangnu danga to rwe; heiba cham ga Jihudi rwan lak pi atun ni tangga thei chang thou dam ngaake.

Pa Na Mi Kazan Bing Khou Pinu Chongtan

Haba nung bi potroi pat somga khat na Galilee la, Jisu na bani khou zathang pi thangnu rammwan la se rwe. Banina Bating munu kaan bi Bating kalum rwe, atiyeda kasemna baning kani rwe.

Jisu na hungluga bani khou rinne, “Tambaan bi khatle talei ram bi ngam pumkhat ga Ei khou pi thang rwe. Atibriakpina nanina seluga mi kazan bing ding Pa, Sa Kapaisa khatle Katha Bathiangnu om nameng bi baptize toluga potroi rwan to thang ngo, a a v19 Nameng ga khatchaye: nameng khatcha, bing kasum—Pa, Sa Kapaisa, khatle Katha Bathiangnu. Eina nani khou zathang pi thangnu bing ga bani khou zei lang bachu thang ngo. Baningsuwo, Ei bakaan loinu tangga nani le diga khwa seiga ong bachamne.”