Ithe Ariũkia Mũũriũ Wake

Atumia makinya mbĩrĩra-inĩ gũkĩĩ na makoona ĩhingũrĩtwo, arangĩri mahaana ta andũ akuũ, na mũraika ũkoiga atĩ Ithe wake nĩ amũriũkĩtie. Thigari ikaheo mbeeca nĩguo cioige atĩ mwĩrĩ waiyirwo. Kĩrĩma-inĩ kĩa Galili amwe makĩrĩ na nganja, no othe magatũmwo ndũrĩrĩ ciothe.

Gĩcunjĩ 28.

Thutha wa Thabatũ, rũũciinĩ tene mũthenya wa mbere wa kiumia, Mariamu Mũmagidali na Mariamu ũcio ũngĩ nĩmookire kuona mbĩrĩra. Na o rĩmwe gũkĩgĩa na gĩthingithia kĩnene, nĩgũkorwo mũraika wa Ithe witũ akĩikũrũka oimĩte igũrũ, akĩgaragaria ihiga rĩu, agĩikara igũrũ rĩaryo. Mũhianĩre wake warĩ ta rũheni, na nguo ciake nĩ njerũ ta ira. Nao arangĩri makĩinaina nĩ ũndũ wa gwĩtigĩra, magĩtuĩka ta andũ akuũ. No mũraika ũcio akĩĩra atumia acio atĩrĩ, “Tigai gwĩtigĩra, nĩgũkorwo nĩnjũĩ mũracaria Jesũ ũrĩa waambirwo mũtĩinĩ. Ndarĩ haaha—nĩariũkĩte, o ta ũrĩa oigĩte. Ũkai, muone harĩa aakomete. Thiĩi narua, mwĩre arutwo ake atĩrĩ: Nĩariũkĩte kuuma kũrĩ arĩa akuũ. Na rĩrĩ, nĩamũtongoretie arorete Galili; nĩmũkamuona kũu. Ta thikĩrĩriai, nĩndamwĩra.”

Nĩ ũndũ ũcio magĩthiĩ makiuma mbĩrĩra na ihenya, marĩ na guoya o na gĩkeno kĩnene, magĩtengʼera makeere arutwo ake.

Na o rĩmwe Jesũ agĩtũngana nao, akĩmeera atĩrĩ, “Mwĩ ũhoro!” Nao magĩũka harĩ we, makĩnyiita magũrũ make, makĩmũinamĩrĩra. Naake Jesũ akĩmeera atĩrĩ, “Tigai gwĩtigĩra. Thiĩi, mwĩre ariũ a maitũ mathiĩ Galili—nĩmakanyona kũu.”

Maheeni ma Arangĩri

Rĩrĩa maarĩ njĩrainĩ, arangĩri amwe magĩtoonya itũũra inene, makĩĩra athĩnjĩri Ngai arĩa anene maũndũ marĩa moothe meekĩkĩte. Thutha wa gũcemania na athuuri na gũthondeka mũbango, makĩhe thigari mbeeca nyingĩ, makĩmeera atĩrĩ, “Ugagai atĩrĩ: Arutwo ake nĩmookire ũtukũ, magĩkĩmũiya tũrĩ toro. Ũngĩkorwo ũhoro ũyũ nĩũgũkinya kũrĩ barũthi, nĩtũkamũiguithia, na tũtũme mũtikagĩe na thĩĩna.” Nao makĩoya mbeeca icio, magĩĩka o ta ũrĩa meerĩirwo; naguo ũhoro ũcio ũkĩhunja thĩinĩ wa Ayahudi nginya ũmũthĩ.

Ũtũmwo wa Ithe kũrĩ Ndũũrĩrĩ Ciothe

Nao arutwo acio ikũmi na ũmwe magĩthiĩ Galili, kĩrĩmainĩ kĩrĩa Jesũ aamaathĩte. Rĩrĩa maamuonire, makĩmũinamĩrĩra, no amwe makĩgĩa na nganja.

Naake Jesũ agĩũka, akĩmeera atĩrĩ, “Nĩheeretwo ũhoti wothe igũrũ o na thĩ. Nĩ ũndũ ũcio thiĩi mũtue ndũũrĩrĩ ciothe arutwo, mũkĩmabatithagia thĩinĩ wa rĩĩtwa rĩa Ithe, na rĩa Mũũriũ, na rĩa Roho Mũtheru, ^a mũkĩmarutaga gwathĩkĩra maũndũ marĩa moothe ndamwaathĩte. Na rĩrĩ, ndĩ hamwe na inyuĩ hĩndĩ ciothe, nginya ithirĩro rĩa mahinda maya.”