Papa a Fè Pitit li a Leve Vivan

Fanm yo rive nan tonm nan granmaten epi yo jwenn li louvri, gad yo tankou moun mouri, ak yon zanj ki di Papa l resisite l. Yo peye sòlda yo pou yo di yo te vòlè kò a. Sou yon mòn nan Galile, kèk toujou gen dout, men yo tout voye al jwenn tout nasyon.

Chapit 28.

Apre jou repo a, nan granmaten premye jou nan semèn nan, Mari, moun lavil Magdala a, ak lòt Mari a vin wè kavo a. Yon sèl kou, yon gwo tranblemanntè fèt, paske yon zanj Papa nou desann soti nan syèl la, li woule wòch la sou kote, epi li chita sou li. Figi l te klere tankou zèklè, epi rad li te blan kou lanèj. Gad yo te sitèlman pè l, yo t'ap tranble, yo tounen tankou moun mouri. Men, zanj lan di medam yo: “Nou pa bezwen pè, paske mwen konnen se Jezi, moun yo te kloure sou kwa a, n'ap chèche. Li pa isit la—li leve vivan, jan l te di a. Vini wè kote yo te mete l kouche a. Ale vit, al di disip li yo: Li leve soti vivan nan lanmò. Gade, l'ap pran devan nou pou l ale nan Galile; se la n'a wè li. Koute, mwen di nou sa.”

Se konsa, yo kite kavo a byen vit, ak kè sote men ak yon gwo kè kontan, yo kouri al di disip li yo sa.

Yon sèl kou, Jezi vin kontre ak yo, li di yo: “Bonjou!” Yo pwoche bò kote l, yo kenbe pye l, yo adore li. Lè sa a, Jezi di yo: “Nou pa bezwen pè. Ale, al di frè m yo pou y al nan Galile—se la y'a wè mwen.”

Manti Gad yo Monte

Pandan medam yo te sou wout, kèk nan gad yo antre nan lavil la, y al rakonte chèf prèt yo tou sa ki te pase. Apre yo fin reyini ak chèf fanmi yo pou yo fè yon plan, yo bay sòlda yo yon gwo lajan, yo di yo: “N'a di: Disip li yo vini nan mitan lannwit, yo vòlè kò a pandan nou t'ap dòmi. Si nouvèl sa a rive nan zòrèy gouvènè a, n'a pale avè l, n'a degaje nou pou nou pa nan okenn traka.” Sòlda yo pran lajan an, yo fè jan yo te di yo fè a. Se konsa, nouvèl sa a gaye nan mitan jwif yo jouk jounen jòdi a.

Lòd Papa a Bay pou Tout Nasyon yo

Lè sa a, onz disip yo ale nan Galile, sou mòn Jezi te di yo al jwenn li an. Lè yo wè l, yo adore li, men te gen kèk nan yo ki te gen dout.

Jezi pwoche bò kote yo, li di yo: “Yo ban mwen tout pouvwa nan syèl la ak sou latè. Se poutèt sa, ale, fè tout nasyon yo tounen disip mwen, batize yo nan non Papa a, nan non Pitit la, ak nan non Sentespri a, ^a moutre yo pou yo obeyi tou sa mwen te ban nou lòd fè. Chonje byen, mwen la avèk nou toulejou, jouk sa fini nèt.”