Abbaan Ilma Isaa Du'aa Kaasa

Dubartoonni barii awwaala ni ga'u, banaa ta'ee, eegdonni akka du'aa ta'anii, ergamaan Abbaan isaa isa kaaseera jedhu ni argu. Loltoonni reeffi hatame akka jedhan ni kaffalamu. Tulluu Gaaliilaa irratti tokko tokko ammas shakkii qabu, ta'us hundi saba hundatti ni ergamu.

Boqonnaa 28.

Sambata booda, guyyaa jalqabaa torbanichaa barii, Maariyaam Magdaalaa fi Maariyaam isa kaan awwaala ilaaluuf dhufan. Yeruma sana sochiin lafaa guddaan tasa ta'e; waan ergamaan Abbaa keenyaa waaqa irraa gadi bu'ee dhagaa sana awwaala dura irraa fuula deebisee irra taa'eef. Bifti isaa akka balaqqeessaa ture; uffanni isaas akka cabbii adaa ture. Eegdonni isa sodaachuudhaan hollatanii, akka warra du'anii ta'an. Ergamaan sun garuu dubartoota sanaan akkana jedhe, «Isin hin sodaatinaa; ani akka isin Yesus isa fannifame barbaaddan beeka. Inni as hin jiru; akkuma jedhe du'aa ka'eera. Kottaa, bakka itti ciise sana ilaalaa. Dafaa deemaatii barattoota isaatiin himaa: Inni du'aa ka'eera. Kunoo, isin dura Galiilaatti deema; achitti isa argitu. Kunoo, ani isiniin himeera.»

Kanaaf isaan sodaa fi gammachuu guddaadhaan awwaala sana dafanii ba'anii, barattoota isaatti himuuf fiigan.

Yesus tasa isaan simatee, «Nagaan isinii!» jedhe. Isaanis isatti dhufanii, miilla isaa qabatanii isatti sagadan. Yesus yommus isaaniin akkana jedhe, «Hin sodaatinaa. Deemaatii obboloota kootiin akka Galiilaatti deemanii himaa; achitti na argu.»

Seenaa Sobaa Eegdotaa

Isaan karaa irra osoo jiranuu, eegdota keessaa tokko tokko magaalaa seenanii wanta ta'e hundumaa luboota hangafootatti himan. Isaanis jaarsolii wajjin walitti qabamanii mari'atanii, loltoota sanaaf maallaqa baay'ee kaffalan, isaaniin akkana jedhanii ajajan, «Akkana jedhaa: Barattoonni isaa halkan dhufanii nu osoo rafnuu isa hat'an. Yoo oduun kun bulchaa biratti ga'e, nu isa amansiifna; isinis rakkina irraa isin baraarsina.» Isaanis maallaqa fudhatanii akkuma isaaniin himametti godhan; oduun kun hamma har'aatti Yihudoota gidduutti babal'ate.

Ergama Abbaa Saboota Hundumaaf

Ergasii barattoonni kudha tokko Galiilaatti, gara tulluu Yesus isaaniif ajaje sanaa deeman. Isa yommuu argan, isatti sagadan; garuu tokko tokko shakkan.

Yesus dhufee isaaniin akkana jedhe, «Aangoon waaqa irraas lafa irrattis jiru hundinuu naaf kennameera. Kanaaf deemaatii saboota hundumaa barattoota godhaa; maqaa Abbaa fi Ilmaa fi Hafuura Qulqulluutiin cuuphaa, ^a wanta ani isin ajajeen hundumaa akka eegan isaan barsiisaa. Kunoo, ani hamma dhuma bara kanaatti yeroo hundumaa isin wajjin jira.»