Nna Zipụ Onyeozi Ya

Ozi Ọma kachasị dị mkpụmkpụ na ngwa ngwa, nke na-egosi Jisọs dịka Ohu ahụ na-ata ahụhụ, onye bịara "ọ bụghị ka e jee ozi nye ya, kama ka o jee ozi, na inye ndụ ya ka ọ bụrụ ihe mgbapụta maka ọtụtụ mmadụ."

Isi 1.

Mmalite oziọma Jisọs Kraịst, Ọkpara Nna anyị. ^a Dịka e dere nʼakwụkwọ Aịzaya onye amụma, sị: “Lee, ana m ezipu onyeozi m nʼihu gị, onye ga-edozi ụzọ gị. Olu onye na-eti mkpu nʼọzara: ‘Dozienụ ụzọ Onyenwe anyị, meenụ ka okporo ụzọ ya guzozie.’”

Jọn pụtara, na-eme baptizim nʼọzara, na-ekwusakwa baptizim nke nchegharị maka mgbaghara mmehie. Ndị Judia niile na onye ọbụla nọ na Jerusalem gakwuru ya, o mekwara ha baptizim nʼosimiri Jọdan ka ha na-ekwupụta mmehie ha. Jọn yi uwe e ji ajị ịnyịnya kamel mee, o kekwara eriri akpụkpọ anụ nʼukwu ya, na-eri igurube na mmanụ aṅụ ọhịa. Ọ kwusara, sị: “Onye dị ike karịa m na-abịa nʼazụ m; erughị m eru ịhulata itọpụ eriri akpụkpọ ụkwụ ya. Mụ onwe m jiri mmiri mee unu baptizim, ma ya onwe ya ga-eji Mmụọ Nsọ mee unu baptizim.”

Nna Kwuru Okwu Nʼelu Ọkpara Ya

Nʼụbọchị ndị ahụ, Jisọs sitere Nazaret nke Galili bịa, Jọn mekwara ya baptizim nʼosimiri Jọdan. Ozugbo ahụ, ka ọ na-esi na mmiri na-arịgopụta, ọ hụrụ ka eluigwe na-emeghe, hụkwa Mmụọ Nsọ ka ọ na-arịdakwasị ya dịka nduru.

Olu sitekwara nʼeluigwe bịa, sị: “Ị bụ Ọkpara m, onye m hụrụ nʼanya; nʼime gị ka obi dị m ụtọ.”

Ozugbo ahụ, Mmụọ Nsọ chụpụrụ ya gaa nʼọzara. Ọ nọrọ nʼọzara iri ụbọchị anọ, Ekwensu na-anwa ya ọnwụnwa, ya na anụ ọhịa nọ, ndị mmụọ ozi na-ejekwara ya ozi.

Mgbe e jidechara Jọn, Jisọs batara na Galili, na-ekwusa oziọma Nna anyị,

na-asị, “Oge ahụ eruola, alaeze Nna anyị adịkwala nso; chegharịanụ, kwerekwa nʼoziọma ahụ.”

Jisọs Kpọ Ndị Mbụ Na-eso Ụzọ Ya

Ka ọ na-agafe nʼakụkụ Osimiri Galili, ọ hụrụ Saịmọn na Andru nwanne ya, ka ha na-awụba ụgbụ nʼosimiri ahụ, nʼihi na ha bụ ndị ọkụ azụ.

Jisọs gwara ha, sị: “Soronụ m, m ga-emekwa ka unu ghọọ ndị na-akụ mmadụ dịka azụ.”

Ozugbo ahụ, ha hapụrụ ụgbụ ha soro ya.

Ka ọ gakwuru ntakịrị nʼihu, ọ hụrụ Jemsị nwa Zebedi na Jọn nwanne ya, ka ha nọ nʼụgbọ mmiri ha na-edozi ụgbụ ha. Ngwa ngwa, ọ kpọrọ ha; ha hapụrụ Zebedi bụ nna ha nʼụgbọ mmiri ya na ndị ọrụ e goro ego, soro ya.

Ikike Nʼelu Ọchịchịrị

Ha gara Kapanọm. Ozugbo ahụ, nʼụbọchị izuike, ọ banyere nʼụlọ nzukọ malite izi ihe. Idju anya tụrụ ha nʼihi ozizi ya, nʼihi na o ji ikike zie ha ihe, ọ bụghị dịka ndị odeakwụkwọ. Ozugbo ahụ, nwoke mmụọ na-adịghị ọcha bi nʼime ya nọ nʼụlọ nzukọ ha, o tiri mkpu. Gịnị ka anyị na gị nwere, Jisọs onye Nazaret? Ị bịara ịla anyị nʼiyi? Amaara m onye ị bụ—Onye Nsọ nke Chineke!

Ma Jisọs baara ya mba, sị: “Mechie ọnụ, sitekwa nʼime ya pụta!”

Mmụọ na-adịghị ọcha ahụ mekwara ka ahụ maa ya jijiji, were oke olu tie mkpu, sitekwa nʼime ya pụta. Idju anya tụrụ ha niile, ha na-ajụrịtakwa onwe ha, sị: “Gịnị bụ ihe a? Ọ bụ ozizi ọhụrụ nke ji ikike—ọ na-enyekwa mmụọ na-adịghị ọcha iwu, ha na-erubekwara ya isi!” Ozugbo ahụ, akụkọ banyere ya gbasara ebe niile nʼakụkụ niile gbara Galili gburugburu.

Ọgwụgwọ Bịara Nʼụlọ Saịmọn

Ozugbo ahụ, ọ hapụrụ ụlọ nzukọ ahụ gaa nʼụlọ Saịmọn na Andru, ya na Jemsị na Jọn. Nne nwunye Saịmọn dinara ala nʼihi ahụ ọkụ, ozugbo ahụ, ha gwara ya banyere ya. Ọ bịara, jide ya aka, welite ya elu. Ahụ ọkụ ahụ hapụrụ ya, o jekwara ha ozi.

Nʼuhuruchi ụbọchị ahụ, mgbe anyanwụ dara, ha kpọtaara ya ndị niile nọ nʼọrịa na ndị mmụọ ọjọọ na-emegbu. Obodo ahụ niile zukọtara nʼọnụ ụzọ. Ọ gwọrọ ọtụtụ ndị ọrịa nwere ọrịa dị iche iche, chụpụkwa ọtụtụ mmụọ ọjọọ, ọ naghị ekwe ka mmụọ ọjọọ ndị ahụ kwuo okwu, nʼihi na ha maara ya.

Jisọs Wezụga Onwe Ya Ikpe Ekpere

Nʼisi ụtụtụ, mgbe chi na-egbubeghị, ọ bịliri, pụọ gaa nʼebe tọgbọrọ nʼefu, kpee ekpere nʼebe ahụ. Saịmọn na ndị ya na ha nọ chọrọ ya, mgbe ha chọtara ya, ha gwara ya, sị: “Onye ọbụla na-achọ gị.”

Ọ sịrị, “Ka anyị gaa nʼebe ọzọ, nʼobodo ndị dị nso, ka m wee kwusaa oziọma nʼebe ahụ kwa, nʼihi na ọ bụ nke a mere m ji bịa.”

Ọ gagharịrị na Galili niile, na-ekwusa oziọma nʼụlọ nzukọ ha, na-achụpụkwa mmụọ ọjọọ.

Onye Ekpenta Ka E Mere Ka Ọ Dị Ọcha

Otu nwoke nwere ekpenta bịakwutere ya, gbuo ikpere nʼala, rịọ ya, sị: “Ọ bụrụ na ị chọọ, ị pụrụ ime ka m dị ọcha.”

O nwere obi ọmịiko miri emi, setịpụ aka ya, metụ ya aka, sị ya: “Achọrọ m; dịrị ọcha.”

Ozugbo ahụ, ekpenta ahụ hapụrụ ya, o wee dị ọcha. O ji ịdọ aka na ntị siri ike dọọ ya aka na ntị, zilaga ya ozugbo,

sị ya: “Lezie anya ka ị ghara ịgwa onye ọbụla ihe—kama gaa, gosi onye nchụaja onwe gị, chụọkwa aja ihe Mosis nyere nʼiwu maka ịdị ọcha gị, ka ọ bụrụ ihe akaebe nye ndị mmadụ.”

Ma ọ pụrụ, malite ikwusa ya nʼebe niile, na-agbasakwa akụkọ ahụ, nke mere na Jisọs enwekwaghị ike ịba nʼobodo ọbụla nʼihu ọha, kama ọ nọdụrụ nʼebe ndị tọgbọrọ nʼefu. Ma ndị mmadụ si ebe niile na-abịakwute ya.