Me basika na mukanda
Dibuku

Tata ke fidisa Ntumwa ya yandi

Nsangu ya Mbote ya nkufi mpe ya nswalu kuluta, yina ke monisa Yesu bonso Kisadi ya mpasi yina kwizaka «ve samu ti bantu kusadila yandi, kasi samu na kusadila, mpe samu na kupesa luzingu ya yandi bonso nkudulu ya bantu mingi.»

Tata ya beto ke zonza na vese 11

Kapu 1.

Mbandukulu ya Nsangu ya Mbote ya Yesu-Klisto, yina kele Mwana ya Tata ya beto. a a v1 Bamukanda ya nkaka ya ntama kele ve na «Mwana ya Tata ya beto». Mutindu ba sonikaka na mukanda ya mumbikudi Esaya: «Tala, mu ke fidisa ntumwa ya munu na mantwala ya nge, yina ke yidika nzila ya nge. Ndinga ya muntu mosi ke looka na yinsi ya kuyuma: “Beno kubika nzila ya Mfumu, beno sungika banzila ya yandi.”»

Yowane monikinaka, yandi vwandaka botika bantu na yinsi ya kuyuma mpe yandi vwandaka samuna nsangu ya mbotokolo ya kusoba nkadulu, samu ti bantu kuzwa mulemvo ya masumu. Bantu nyonso ya Zude mpe bantu nyonso ya Yelusalemi kwizaka na yandi, mpe yandi botikaka bawu na nzadi ya Yolodani ntangu bawu vwandaka kutuba masumu ya bawu. Yowane vwandaka kuvwata bilele yina ba salaka na mika ya samo, mpe yandi kangaka mukaba ya mpusu na luketo ya yandi. Madya ya yandi vwandaka makonko na mafuta ya nyosi ya mfinda. Yandi samunaka: «Muntu yina me lutila munu ngolo ke kwiza na manima ya munu. Mu kele ve ya kulunga na kuyinama mpe kunyangula singa ya sanduku ya yandi. Munu, na maza mu me botika beno, kasi yandi ke kubotika beno na Mpeve ya Longo.»

Tata ke tuba na zulu ya Mwana ya yandi

Na ntangu yina, Yesu katukaka na Nazaleti ya Ngalili, mpe Yowane botikaka yandi na kati ya nzadi ya Yolodani. Na mbala mosi, ntangu yandi vwandaka kubasika na maza, yandi talaka mazulu kukangunuka mpe Mpeve ya Longo kukulumuka na zulu ya yandi bonso dibembe.

Mpe ndinga katukaka na zulu: «Nge kele Mwana ya munu ya luzolo; mu kele na kilengi mingi na nge.»

Mpe na mbala mosi, Mpeve ya Longo tindaka yandi na yinsi ya kuyuma. Yandi vwandaka na yinsi ya kuyuma bilumbu makumi yiya, Satana vwandaka tonta yandi, yandi vwandaka ti bibulu ya mfinda, mpe bawanzyo vwandaka sadila yandi.

Na manima, ntangu ba kangaka Yowane, Yesu kwizaka na Ngalili, yandi vwandaka samuna Nsangu ya Mbote ya Tata ya beto,

mpe yandi vwandaka tuba: «Ntangu me lunga, mpe Kimfumu ya Tata ya beto me kuma pene-pene; beno soba nkadulu ya beno mpe beno kwikila Nsangu ya Mbote.»

Yesu ke bokila bilandi ya yandi ya ntete

Ntangu yandi vwandaka luta pene-pene ya nzadi ya Ngalili, yandi talaka Simoni mpe Andele mpangi ya yandi, bawu vwandaka losa konde na nzadi, samu ti bawu vwandaka balobi ya mbisi.

Mpe Yesu tubaka na bawu: «Beno landa munu, mpe mu ke kumisa beno balobi ya bantu.»

Mpe na mbala mosi, bawu bikaka makonde ya bawu mpe landaka yandi.

Ntangu yandi kwendaka na mwa mantwala, yandi talaka Zaki mwana ya Zebede mpe Yowane mpangi ya yandi, bawu vwandaka na maswa ya bawu, bawu vwandaka yidika makonde. Na mbala mosi, yandi bokilaka bawu; bawu bikaka tata ya bawu Zebede na maswa ti basadi ya mbongo, mpe bawu landaka yandi.

Lulendo na zulu ya mpimpa

Bawu kwendaka na Kapernaumi. Na mbala mosi, na kilumbu ya Sabata, yandi kotaka na yinzo ya lusambulu mpe yandi bandaka na kulonga. Bawu yitukaka na malongi ya yandi, samu ti yandi vwandaka longa bawu na lulendo, kasi mutindu milongisi ya Misiku ve. Mpe na mbala mosi, na yinzo ya lusambulu ya bawu, vwandaka muntu mosi ya mpeve ya mvindu, mpe yandi lookaka. «Nge ke sosa yinki na beto, Yesu ya Nazaleti? Nge me kwiza samu na kubebisa beto? Mu zaba nani nge kele—Muntu ya Longo ya Nzambi!»

Kasi Yesu sembaka yandi, yandi tubaka: «Vwanda pi, mpe basika na yandi!»

Mpe mpeve ya mvindu ningisaka yandi na ngolo mpe lookaka na ndinga ya ngolo, yawu basikaka na yandi. Bantu nyonso yitukaka, mpe bawu yufulaka bawu na bawu: «Yayi kele yinki? Malongi ya mpa na lulendo - yandi ke pesa lutumu ata na bampeve ya mvindu, mpe yawu ke tumama na yandi!» Mpe na mbala mosi, nsangu ya yandi mwanganaka bisika nyonso na kizunga nyonso yina kele pene-pene ya Ngalili.

Mbelusu ke kwiza na yinzo ya Simoni

Na mbala mosi, yandi katukaka na yinzo ya lusambulu mpe kwendaka na yinzo ya Simoni mpe Andele, ti Zaki mpe Yowane. Mama-bukilo ya Simoni vwandaka ya kulala na kimbevo ya mabawu, mpe na mbala mosi bawu zabisaka yandi mambu ya yandi. Yandi kwizaka, simbaka diboko ya yandi, telamisaka yandi. Mabawu katukaka na yandi, mpe yandi sadilaka bawu.

Na nkokila yina, ntangu ntangu vwandaka kudinda, bawu natinaka yandi bantu nyonso ya kimbevo mpe bayina bampeve ya yimbi vwandaka niokola. Mpe mbanza ya mvimba vukanaka na mwelo. Yandi belusaka bantu mingi ya kimbevo na bimbevo ya mitindu-mitindu mpe yandi bingisaka bampeve ya yimbi mingi, yandi pesaka bampeve ya yimbi nzila ve na kutuba, samu ti yawu vwandaka zaba yandi.

Yesu ke kwenda samu na kusambila

Na suka-suka ntete, ntangu mpimpa vwandaka ntete, yandi telamaka, basikaka, kwendaka na kisika ya kinzengila, mpe sambilaka kuna. Mpe Simoni ti bantu yina vwandaka ti yandi sosaka yandi, mpe bawu kuzwaka yandi mpe tubaka na yandi: «Bantu nyonso ke sosa nge.»

Yandi tubaka: «Beto kwenda na bisika ya nkaka, na bambanza ya pene-pene, samu ti mu zabisa Nsangu ya Mbote mpe kuna, samu ni yawu yina mu kwizaka.»

Mpe yandi kwendaka na Ngalili ya mvimba, yandi vwandaka samuna na bayinzo ya lusambulu ya bawu mpe yandi vwandaka bingisa bampeve ya yimbi.

Muntu ya bwazi me kuma ya kuvela

Muntu mosi ya bwazi kwizaka, fukamaka, mpe lombaka yandi: «Kana nge zola, nge lenda vedisa munu.»

Yandi talaka kyadi mingi, yandi tandulaka diboko ya yandi, simbaka yandi, mpe tubilaka yandi: «Mu ke zola; kuma ya kuvedila.»

Na mbala mosi, bwazi katukaka na yandi, mpe yandi kumaka ya kuvedila. Yandi kebisaka yandi ngolo, mpe na mbala mosi yandi bingisaka yandi,

mpe tubilaka yandi: «Keba na kuzabisa ata muntu mosi ve—kasi kwenda, songa nge mosi na nganga-Nzambi, mpe pesa dikabu yina Moyize tumisaka samu na kuvedila ya nge, mutindu kidimbu na bantu.»

Kasi yandi kwendaka na ngaanda, yandi vwandaka samuna mambu yina na kimpwanza mpe kumwangisa nsangu, na yina Yesu lendaka dyaka ve kukota na mbanza na pwelele, kasi yandi vwandaka na bisika yina bantu vwandaka ve. Kasi bantu vwandaka kwiza na yandi katuka bisika nyonso.