Mark 1 FHB Father's Heart Bible™

1 ¹Amar Pitri laga Putro, Jisu Khrista laga susamachar laga shuru. ^a a v1 Kunba purana likha khan te “amar Pitri laga Putro” kotha nai. ²Bhabobadi Isaiah te likha nisena, “Sabi, Moi tumar age te Moi laga doot ke pathai ase, kun pora tumar rasta taiyar koribo. ³Jongol te ekta awaj mati ase, ‘Prabhu laga rasta taiyar koribi, Tar laga rasta khan sidha koribi.’”

⁴Johan jongol te ahhi kene baptizma dise, aru paap khyama nimite mon-ghura laga baptizma prachar korise. ⁵Gusa Judea aru Jerusalem te thaka sob manuh tar logot te ahhise, aru tarkhan nijor paap shikar kori thaka homoi te, Johan pora tarkhan ke Jordan Nodi te baptizma dise. ⁶Johan uut laga chuli pora bona kapra pindhise, aru tar komor te chamra laga bandh bandhise, aru phoring aru jongoli mou khai thakise. ⁷Tai prachar kori koise, “Moi laga pichete, moi pora bhi takatwala ekjon ahhi ase; Tar laga chapal laga dori niche jhuki kene khulibole bhi moi layak nohoi. ⁸Moi tumikhan ke pani pora baptizma dise, kintu Tai tumikhan ke Pobitro Atma pora baptizma dibo.”

Pitri pora Tar laga Putro uporte kotha koi ase

⁹Utu din khan te, Jisu Galilee laga Nazareth pora ahhise, aru Johan pora tar ke Jordan Nodi te baptizma dise. ¹⁰Loge-loge, tai pani pora uthi aha homoi te, akash phati khula aru Pobitro Atma kobutor nisena tar uporte nami aha tai dekhise.

¹¹Aru sorgo pora ekta awaj ahhise, “Tumi, Moi laga morom laga Putro ase; Tumi uporte Moi bisi khushi ase.”

¹²Aru loge-loge Pobitro Atma pora tar ke jongol phale khedai loi jaise. ¹³Tai jongol te chalis din tak thakise, Saitan pora tar ke porikhya korise, jongoli janwar khan logote thakise, aru sorgodoot khan pora tar sewa korise.

¹⁴Etiya Johan ke dhori bondhi kora pichete, Jisu Galilee te ahhise, amar Pitri laga susamachar prachar kori kene,

¹⁵aru koise, “Homoi tu pura hoise, aru amar Pitri laga rajyo usorte ahhise; mon ghurabi aru subhokhobor ke biswas koribi.”

Jisu pora Tar laga poila chella khan ke mati ase

¹⁶Galilee Samundar kinar pora jai thaka homoi te, Jisu pora Simon aru tar bhai Andrew ke samundar te jal phelai thaka dekhise, kilemane tarkhan maas dhora manuh thakise.

¹⁷Aru Jisu pora tarkhan ke koise, “Moi laga pichete ahhibi, aru Moi tumikhan ke manuh dhora manuh bonai dibo.”

¹⁸Aru loge-loge tarkhan nijor jal khan chari kene tar laga pichete jaise.

¹⁹Olop age jai kene, tai Zebedee laga putro James aru tar bhai Johan ke tarkhan laga naw te jal thik kori thaka dekhise. ²⁰Loge-loge tai tarkhan ke matise; aru tarkhan nijor baba Zebedee ke bhara-kora kaam-kora manuh khan logote naw te chari kene, tar laga pichete jaise.

Andhar uporte Adhikar

²¹Tarkhan Capernaum te jaise. Loge-loge, Bisram din te, tai mondoli ghor te ghusi kene sikhabole shuru korise. ²²Tarkhan tar sikhai diya kotha te asurit hoise, kilemane tai adhikar logote tarkhan ke sikhaise, niyom-sikhai-diya manuh khan nisena nohoi. ²³Aru loge-loge tarkhan laga mondoli ghor te letera atma dhora ekjon manuh thakise, aru tai jor pora hikari uthise. ²⁴Nazareth laga Jisu, Apuni amikhan ke kele digdar kori ase? Apuni amikhan ke khotom koribole ahhise? Moi jane Apuni kun ase—Isor laga Pobitro Jon ase!

²⁵Kintu Jisu pora tai ke dhomkai kene koise, “Chup thakibi, aru tai pora ulai ahhibi!”

²⁶Aru letera atma pora tai ke bisi jhaki dise aru jor awaj te hikari kene tai pora ulai ahhise. ²⁷Sob manuh asurit hoise, aru ekjon-ekjon ke hudise, “Eitu ki ase? Adhikar logote notun sikhani—tai letera atma khan ke bhi hukum diye, aru tarkhan tar kotha mane!” ²⁸Aru loge-loge tar khobor Galilee desh laga charo-phale sob jagah te punchi jaise.

Simon laga ghor te changai ahhise

²⁹Loge-loge tai mondoli ghor pora ulai kene, James aru Johan logote, Simon aru Andrew laga ghor te jaise. ³⁰Etiya Simon laga sasu jor pora bemar hoi kene suti thakise, aru loge-loge tarkhan tai nimite Jisu ke koise. ³¹Tai ahhi kene, tai laga hath dhori kene, tai ke uthai dise. Jor tai ke chari dise, aru tai pora tarkhan laga sewa korise.

³²Utu saanjh te, suruj nami juwa homoi te, tarkhan bemar thaka sob manuh aru bhoot pora dukh pa-a manuh khan ke tar logote loi anise. ³³Aru gusa sheher laga manuh dorja usorte joma hoise. ³⁴Tai alag-alag bemar thaka bisi manuh ke bhal korise aru bisi bhoot khan ke khedai dise, aru bhoot khan ke kotha kobole dia nai, kilemane tarkhan tar ke janise.

Jisu prathana koribole alag jagah te jai ase

³⁵Bisi phojur, andhar thaka homoi te, tai uthise, aru ekta nirjon jagah te jai kene ta te prathana korise. ³⁶Aru Simon aru tar logote thaka manuh khan pora tai ke bisarise, ³⁷aru tai ke pai kene koise, “Sob manuh Apuni ke bisari ase.”

³⁸Tai koise, “Amikhan dusra jagah te jabo, usorte thaka sheher khan te, titia Moi ta te bhi prachar koribo pare, kilemane etu kaam nimite Moi ahhise.”

³⁹Aru tai gusa Galilee te berai kene, tarkhan laga mondoli ghor khan te prachar korise aru bhoot khan ke khedai dise.

Korhi bemar manuh ke sapha korise

⁴⁰Korhi bemar thaka ekjon manuh ahhise, aru athukari kene, tai ke binti korise, “Jodi Apuni itcha ase, Apuni moi ke sapha koribo pare.”

⁴¹Bisi morom pora bhorta hoi kene, tai laga hath lamba kori kene, tai ke chuise, aru tai ke koise, “Moi itcha ase; sapha hoi jabi.”

⁴²Aru loge-loge korhi bemar tai ke chari dise, aru tai sapha hoi jaise. ⁴³Tai ke bhal pora hoshiar korai kene, loge-loge tai ke pathai dise,

⁴⁴aru tai ke koise, “Hoshiar thakibi, kun ke bhi nakobi—kintu jabi, purohit ke nijor gaw dikhai dibi, aru tumi sapha huwa nimite Moses pora hukum diya saman dibi, manuh khan nimite ekta sakhi hobole.”

⁴⁵Kintu tai ulai jai kene, khula-khula pora etu kotha prachar korise aru khobor phailai dise, etu karone Jisu aru khula-khula pora kunba sheher te ghusibo para nai, kintu nirjon jagah khan te thakise. Hoilebi charo-phale pora manuh khan tar logote ahhise.