Rama Ngutus Utusan-Na
Injil anu pangpondokna jeung panggancangna, ngagambarkeun Yesus salaku Abdi anu sangsara, anu sumping “lain rék diladénan, tapi rék ngaladénan, jeung nyerahkeun nyawa-Na pikeun panebus jalma loba.”
1 1Mimiti Injil Yesus Kristus, Putra Rama urang. a a v1 Sabagian naskah kuno teu ngamuat “Putra Rama urang.” 2Sakumaha anu kaungel dina kitab Nabi Yesaya: “Tenjo, Kami ngutus utusan Kami ti payuneun anjeun, anu baris nyayagikeun jalan pikeun anjeun. 3Aya sora anu cumeluk di gurun keusik: ‘Sayagikeun jalan pikeun Pangeran, luruskeun jalan-jalan-Na.’”
4Yohanes muncul, ngabaptis di gurun keusik sarta ngawawarkeun baptisan tobat pikeun pangampura dosa. 5Sakumna urang Yudea jeung sakabeh nu aya di Yerusalem daratang ka anjeunna, tuluy ku anjeunna dibaptis di Walungan Yordan bari ngaraku dosa-dosana. 6Yohanes nganggo pakean tina bulu onta kalawan sabuk kulit dina cangkengna, tuangna simeut jeung madu leuweung. 7Pok anjeunna ngawawarkeun, “Sanggeus sim kuring bakal sumping Anjeunna anu leuwih kawasa ti batan sim kuring; sim kuring teu pantes najan ngan ukur mungkuk pikeun ngudar tali tarumpah-Na. 8Sim kuring ngabaptis aranjeun ku cai, tapi Anjeunna bakal ngabaptis aranjeun ku Roh Suci.”
Rama Ngalahir ka Putra-Na
9Dina mangsa harita, Yesus sumping ti Nasaret di tanah Galilea, tuluy dibaptis ku Yohanes di Walungan Yordan. 10Sanggeus Anjeunna mentas tina cai, harita keneh Anjeunna ningali langit beulah muka, sarta Roh Suci lungsur ka Anjeunna siga manuk japati.
11Tuluy aya sora ti sawarga, “Anjeun teh Putra Kami anu dipikaasih; ku Anjeun Kami kacida bungahna.”
12Harita keneh Roh Suci ngajurung Anjeunna ka gurun keusik. 13Anjeunna cicing di gurun keusik opat puluh poe, digoda ku Setan, aya di antara sato-sato leuweung, sarta para malaikat ngalalayanan Anjeunna.
14Sanggeus Yohanes ditangkep, Yesus sumping ka tanah Galilea, ngawawarkeun Injil Rama urang,
15sarta saur-Na, “Mangsana geus cunduk, sarta Karajaan Rama urang geus deukeut; geura tarobat jeung percaya kana warta nu hade.”
Yesus Nyaur Murid-murid-Na nu Mimiti
16Waktu ngalangkung sisi Talaga Galilea, Anjeunna ningali Simon jeung Andreas, dulurna, keur ngawidangkeun jala ka talaga, sabab maranehna tukang ngala lauk.
17Saur Yesus ka maranehna, “Tuturkeun Kami, sarta Kami bakal ngajadikeun maraneh tukang ngala jelema.”
18Harita keneh maranehna ninggalkeun jalana, tuluy ngiring ka Anjeunna.
19Sanggeus maju saeutik, Anjeunna ningali Yakobus, anak Sebedeus, jeung Yohanes, dulurna, keur aya di parahu bari ngoledan jalana. 20Harita keneh maranehna disaur; tuluy ninggalkeun bapana, Sebedeus, di parahu jeung jalma-jalma buruhan, maranehna ngiring ka Anjeunna.
Kawasa Ngatasan nu Poek
21Maranehna arindit ka kota Kapernaum. Harita keneh, dina poe Sabat, Anjeunna lebet ka imah ibadah tuluy ngawitan ngawulang. 22Maranehna kacida hareraneunana ku pangajaran-Na, sabab Anjeunna ngawulang kalawan pinuh kawasa, teu kawas ahli-ahli Toret. 23Harita keneh di imah ibadah maranehna aya hiji jalma anu kasurupan roh najis, tuluy ngajerit. 24Naha bet ngaganggu kami, Yesus urang Nasaret? Rek ngabinasakeun kami, nya? Kami nyaho saha Anjeun teh — Nu Suci kagungan Allah!
25Tapi Yesus nyentak ka manehna, saur-Na, “Repeh, geura kaluar ti jelema ieu!”
26Tuluy roh najis teh ngagidir-gidir jelema tea bari ngagorowok tarik, tuluy kaluar ti manehna. 27Kabeh jalma hareraneun, tuluy pada silih tanya, “Naon ieu teh? Hiji pangajaran anyar anu kawasa — ka roh-roh najis oge Anjeunna marentah, sarta kabeh naruut ka Anjeunna!” 28Harita keneh beja ngeunaan Anjeunna sumebar ka mana-mana ka sakuliah wewengkon sabudeureun tanah Galilea.
Kacageuran Sumping ka Imah Simon
29Sanggeus kaluar ti imah ibadah, Anjeunna gancang angkat ka imah Simon jeung Andreas, bareng jeung Yakobus sarta Yohanes. 30Ari mitoha awewe Simon keur ngedeng gering muriang, tuluy maranehna gancang ngunjukkeun perkara manehna ka Yesus. 31Yesus nyaketan, nyepeng leungeunna, tuluy dicandak hudang. Muriangna leungit, tuluy manehna ngalalayanan maranehna.
32Peutingna, sanggeus panonpoe surup, maranehna mawa ka Anjeunna sakabeh nu garering jeung nu kalebetan roh jahat. 33Jeung sakuliah kota ngagimbung di hareupeun panto. 34Anjeunna nyageurkeun loba nu garering ku rupa-rupa panyakit sarta ngusir loba setan; setan-setan teu diwidian ngomong, lantaran maranehna nyaraho ka Anjeunna.
Yesus Nyingkir pikeun Neneda
35Isuk-isuk keneh pisan, basa poek keneh, Anjeunna gugah, angkat ka hiji tempat anu suwung, tuluy neneda di dinya. 36Simon jeung batur-baturna neangan Anjeunna, 37sanggeus kapanggih, tuluy unjukan ka Anjeunna, “Sadayana nareangan Gusti.”
38Saur-Na, “Hayu urang ka tempat sejen, ka kota-kota nu deukeut, supaya Kami bisa ngawawar di dinya oge, sabab pikeun eta Kami sumping.”
39Tuluy Anjeunna ngider ka sakuliah tanah Galilea, ngawawar di imah-imah ibadah maranehna sarta ngusiran setan.
Nu Katerap Lepra Dicageurkeun
40Aya hiji jalma anu katerap lepra sumping, tuluy sideku, menta tulung ka Anjeunna, “Upami Gusti kersa, Gusti iasa nyageurkeun abdi.”
41Ku karana kacida welaseun, Anjeunna ngulurkeun panangan-Na, nyabak ka jelema tea, tuluy saur-Na, “Kami kersa; geura cageur.”
42Harita keneh leprana leungit, tuluy manehna jadi cageur. 43Yesus mepelingan kalawan tegas, tuluy gancang nitah manehna indit,
44saur-Na, “Masing inget, ulah bebeja ka saha-saha — tapi indit, tembongkeun diri maneh ka imam, jeung pang nyanggakeun kurban anu diparentahkeun ku Musa pikeun kacageuran maneh, minangka bukti ka jalma rea.”
45Tapi jelema tea kalah ka indit, ngabejakeun hal eta sakaparan-paran bari nyebarkeun wartana, nepi ka Yesus teu bisa deui asup ka kota kalawan terang-terangan, tapi kudu cicing di tempat-tempat nu suwung. Sanajan kitu, jalma-jalma tetep daratang ka Anjeunna ti mana-mana.