Mi eng' bukuit

Mariko 1 FHB Father's Heart Bible™

Kiistoi 15% eng' kiy ne iale korook →
Bukuit

Iyookto Kwanda Kaondennyi

Logoiywek che myach ne imining'in ak ne ritit kosiir, ne booruunei Jeso koek Otwogindet ne nyalili, ne ki nyo “ma si kotisyechin ineendet, ago si kotis, ak si koochi saboondanyi koek kagerutyet ne po piik che chaang'.”

Ng'alaali Kwandanyo eng' mustari 11

Sura 1.

Taunetap logoiywek che myach che po Jeso Kristo, Weeriitap Kwandanyo. a a v1 Mi siruutik alak che po taai che ma tinye ng'aleechu, "Weeriitap Kwandanyo." Ko uu ye ki kisir eng' siruutik che po maotyot Isaiah kole, “Keero, aiyookto kaondennyu eng' taing'ung', ne chopchinin oreng'ung'. Tuugeetap chii ne kuursei eng' surkwen: ‘Ochop ooreetap Kiptaiyat, olitiit ortinwekyik.’”

Ki nyo Johana, kobatisanis eng' surkwen ak koamdaati kabatisanet ne po siguunet, si konyochigei kaat tengekwogik. Ki mong'u kobwa ineendet piik tugul che po emetap Judea ak che mi Jerusalem tugul, ak kibatisan icheek eng' aineetap Jordan, ye ki ng'aanye tengekwogikwak. Ki ilaachi Johana ngoroik che po sambutap tambeesik, ak ki ratyi suennyi pireneetap muito, ak ki amei chereng'eek ak kumyatap timiin. Koamdaati koleen, “Nyoo ineendet ne isubwo ne tinyei kimnateet kosiiro; ma anyolu atuch kot atyach anoogap kweonikyik. Anee ko abatisanook eng' peek, ago ineendet ko ibatisanook eng' Kabuuset ne Tiliil.”

Ng'alaali Kwanda agobo Weeriinnyi

Ki nyo eng' peetuusyechooto Jeso kobunu Nazareth ne po Galilaya, ak ki batisan Johana ineendet eng' Jordan. Ak yoon kong'eetu eng' peek, kogeer kipsengwet koyaatgei, ak Kabuuset ne Tiliil kochorchingei kobwa ineendet ko uu cheptuget.

Ak ki punu kutit eng' kipsengwet koleen, “Ii Weeriinnyu ne achame; aboiboiten inyee.”

Ak yoon koisto Kabuuset ne Tiliil ineendet kwo surkwen. Ki mi surkwen peetuusyek artam, kotyeme Setani, kobooto tyong'ik che po timiin, ak ki toreti malaikaisyek ineendet.

Ye kagonam Johana, konyo Jeso eng' Galilaya, koamdaati logoiywek che myach che po Kwandanyo,

ak kole, “Kagosulda sait, ak kagoriik laitornatetap Kwandanyo; osigu ak oyan logoiywek che myach.”

Kuurei Jeso Kasubikyik che Tai

Ye ki siirtoi araraitap Galilaya, kogeer Simion ak Andrea ne tupchennyi, kowiri kariik eng' araraita, amu ki kiisik ng'enda.

Ak koleenji Jeso icheek, “Osubwo, ak ayaiywok si oegu kiisik che isoe piik.”

Ak yoon kopagaakta kariikwak ak koosup ineendet.

Ki wo tai kitigin, kogeer Jakobo weeriitap Zebedayo ak Johana ne tupchennyi eng' moingennywa, komende kariik. Ak yoon koguur icheek; ak koisto kwandanywa Zebedayo eng' moinget kobooto otwogik che kiyoom, ak koosup ineendet.

Kimnateet Kosiir Ng'omnateet

Ki wo Kapernaum. Ak yoon, eng' peetuutap Sabato, kichut sinagogit ak kotoi konetisye. Ak ki uiyot icheek agobo netisyennyi, amu ki netji icheek ko tinyei kimnateet, ma ko uu siriik. Ak yoon komi eng' sinagogitnywa chiito ne tinyei ng'aang'et ne murwoon, ak kowaach, koleen, “Kiting'egei nee ak echeek, Jeso ne po Nazareth? Kinyoo si iyaiywech kobek? Angen chiito ne ii inyee—Chiito ne Tiliil ne po Kamuktaindet!”

Ago ki ng'er Jeso ineendet, koleenji, “Silem, ak imong'u eng' ineendet!”

Ak ng'aang'et ne murwoon, kunyunyis ineendet ak kowaach eng' kutit ne oo, komong'u eng' ineendet. Ak ki uiyot tugul, ak koteebe icheegei koleen, “Nee ni? Ni netisyet ne leel ne tinyei kimnateet - ng'atei agot tamirmirik che murwonen, ak kogasei!” Ak yoon koyom kalasunennyi eng' emotinwek tugul che kaigolee Galilaya.

Nyoonu Saabet eng' Kootap Simion

Ak yoon komong'u eng' sinagogit, konyo kootap Simion ak Andrea, ak ki mi Jakobo ak Johana kobooto icheek. Ki ruei senderetap Simion komyandos eng' eseet, ak yoon komwachi Jeso agobo ineendet. Konyo, konam eunnyi, ak koing'ong' ineendet. Ki istoegei eseet ineendet, ak kotoret icheek.

Eng' karoon nooto, ye kagobut asiista, ki ipchi ineendet tugul che myandos ak che kinyalili oik. Ak ki iyumjigei nganaseet tugul eng' kurgeet. Ki soobi che chaang' che myandos eng' korotwek che terterchin, ak koon oik che chaang', ago ma koyanchini oik koololei, amu ki kingen ineendet.

Istoegei Jeso Kosa

Ye tomo koit karoon miising', ye ta komi ng'omnateet, kong'eetu, ak komong'u kwo komosta ne ki ma mi chii, ak kosa eng' olooto. Ak ki isyach Simion ak che ki mi kobooto ineendet, ak kanyoor ineendet, ak koleenji, “Isyachin piik tugul.”

Koleenji, “Kengwo komosta age, nganasosyek che kineegiten, si amdaate agine olooto, amu nooto ne ki anyoo.”

Ak ki wo komosta tugul che po Galilaya, koamdaati eng' sinagogisyekwak ak koon oik.

Kitiliil Chiito ne Tinyei Mogondosaik

Ki nyoo chiito ne tinyei mogondosaik, ak kigutuny, ak kosoom ineendet, koleenji, “Ngot ichame, imuuchi itiliilo.”

Ki riiree Jeso miising', ak kochuul eunnyi, ak kotiny ineendet, ak koleenji, “Achame; itiliil.”

Ak kayny kong'eetun mogondosaik ineendet, ak kitiliil. Ki toi koger kong' ineendet eng' kimnateet, ak koyookto kayny,

ak koleenji, “Iriipkei ile mat imwa chii age tugul—ago iwo, iboorchigei tisiindet, ak igoite che ki ng'at Musa agobo tililisyetang'ung', si koek paornateet eng' piik.”

Ago ki wo ineendet, koamdaati puch, ak koyom ng'aleechooto, kot koma kimuuch Jeso kochut nganaseet eng' taitap piik, ago kibeni olosyek che ma mi chii. Ago kinyonei piik kobun komosta tugul.