Mark 1

1 ¹Ithumwui Avāwui Naomayara Jishu Khristawui paokaphāwui haokaphok. ^a a v1 Khare atamwui lairik kaikhali "ithumwui Avāwui Naomayara" kaji tui maleimana. ²Isaiah marānwui lairikli hithada kapihaida lei: "Yanglu, iwui paome ina nawui mangāshongla chihoi, ana nawui shongfa ngarānra. ³Akhon akhana lamhāngli hāshokta: 'Prohowui shongfa chi ngarānlu, awui apong ngatar ngasaklu.'"

⁴Johnna lamhāngli ra̱hikmida shoka, kala morei pheomi khavai ning ngateiwui ra̱kahik tamchithei. ⁵Judea saikora kala Jerusalemli khalei mi saikorana awuili shokvāhaowa, kala athumwui morei hāngphatta athumli Jordan kongli ra̱hikmi. ⁶Johnna uthā eina sākakhui kachon ngavai, awui kashānli sāhuiwui shānneira̱ neilaga, khaoh eina khuira̱ zāda leisai. ⁷Ana hāshokta hānga: "Iwui thili ili reikhameiya akha rāra; I kurzangda awui pheihop khara̱ khalāmikida matik machāmana. ⁸Ina nathumli tara̱ eina ra̱hikmi, kha ana nathumli Manglā Kathara eina ra̱hikmira."

Avāna Awui Naomayarawuitungli Hānga

⁹Chi atambingli Jishuna Galileeli khalei Nazarethwui eina rai; Johnna ali Jordanli ra̱hikmi. ¹⁰Ngalāngda, tara̱ eina shokkhaleo lakha, kazingram ngachakta shohaira kala Manglā Kathara nāsha̱ thada awuitungli tākapa̱ kaji ana thei.

¹¹Kala kazingramwui eina akhon akha vaorai: "Na iwui khaluma Naomayarana; Ina nali ningyāng unglaka."

¹²Kala hengsāda Manglā Katharana ali lamhāngli kashamshokhaowa. ¹³Ana lamhāngli zimiksho hangmatithang leilakha, Satanna ali suipama; ana sāyurbing eina ngasoda pamsai, kala kazingraobingna ali sheba sāmi.

¹⁴Ara Johnli tukthuihaiwui thili, Jishuna Galileeli rāda, ithumwui Avāwui paokaphā hāshokta,

¹⁵kala hānga, "Atam ungshunghaira, kala ithumwui Avā wungram nganaishunhaira; ning ngateilu kala paokaphā shitsanglu."

Jishuna Awui Khare Sākhangatha̱bing Hoi

¹⁶Jishuna Galilee shamadruwui ngalemli zatta leilakha, Simon kala agato Andrew ani ngayili khailan horta lei kaji ana thei; kaja ani khai kaphā mina.

¹⁷Kala Jishuna anili hānga, "Ithi shurlu, kala ina nanili mi kaphā mi sāngasakra."

¹⁸Chieina ngalāngda aniwui khailan hortāhailaga ali shurthuwa.

¹⁹Chiwui eina kateokha zatmamānlaga, ana Zebedeewui naomayara James eina agato John athumwui marikhongli khailan khopkasā leilakha theihaowa. ²⁰Hengsāda ana anili hoi; kala anina avāva̱ Zebedee ngalang kapheibing eina ngasoda marikhongli nothāhailaga, ali shurthuwa.

Tangkhamangwuitungli Pangshap

²¹Athumna Capernaumli vai. Hengsāda, sabbaththang ana synagogueli vāzanglaga tamchitheiphokuwa. ²²Awui tamkachithei chili athumna matakhakhaowa, kaja ana ain kathemabing kathā maningla, sāshap pangshap eina athumli tamchithei. ²³Chieina hengsāda athumwui synagogueli makathar manglā kazanga mi akha leisai, ana vāoshoka. ²⁴Nazarethwui Jishu, nana ithumwui pongli khi hāngsang khavai leikhala? Ithumli shimān ngasak khavai kharāla? Na khipākhala da ithumna thei; na Varewui Tharkhamathengpāna!

²⁵Kha Jishuna ali khararda hānga, "Kasaikha pamlu, kala awui eina shokulu!"

²⁶Kala makathar manglā china ali khanukazamhailaga panglāk eina vaoda, awui eina shokhaowa. ²⁷Mi saikora matakhakhaida akha eina akha ngazek ngaroka, "Hi khikhala? Sāshap pangshap eina tamkachithei kadhar akhana! Ana makathar manglābing chila kakaso eina, athumnala awui kahāng nganai!" ²⁸Chieina hengsāda awui ming Galileewui kuikhamareili khalei apam saikorali ngayaovāserhaowa.

Simonwui Shimli Kharai Rāhaira

²⁹Hengsāda ana synagoguewui eina shoklaga, James eina John ngasoda Simon eina Andrewwui shimli vai. ³⁰Chitharan Simonwui aniva̱ kharurda pikasā leisai, kala hengsāda athumna awui pongli ali ahānga. ³¹Ana rāda, awui pāng khuida ali thuingasaka. Kakharur chi raihaowa, kala ana athumli otram ngatha̱mi.

³²Chithang ngazin, zimik tunkahaiwui thili, athumna kakazānaobing saikora kala kameo kazangbing awuili khuirai. ³³Kala keinung katongana khāmongli rāngarumhaowa. ³⁴Ana kazātyur ayāyāva̱ eina kakazānao kachungkha raimi, kala kameo kachungkha kashamshoka, kameobing chi tuila mamatui ngasakmana, kaja athumna ali theihaowa.

Jishu Seihā Sākhavai Thuihaowa

³⁵Kazing mathangranglakha, aruila tangkhamang leilakha, ana ngakarthuida kayāngli sokta lamhāngli vāda, apam chili seihā sai. ³⁶Chieina Simon kala awuili ngasokazatbingna ali phāhaowa, ³⁷kala athumna ali samphanglaga ali hānga, "Mi saikorana nali phāda lei."

³⁸Ana hānga, "Apam chilila ina pao hāshok khavai ithum apam khangatei luinganai keinungbingli vāusa; kaja hi sākhavai ina rāhaira."

³⁹Chieina ana Galileewui apam saikorali vāda, athumwui synagogueli pao hāshoka kala kameobing kashamshoka.

Phārrei Kakazā Mi Tharmihaira

⁴⁰Phārrei kakazā mi akha rāda, khuktizangda, ali poi, "Nana phaningmiakha, ili tharmishapa."

⁴¹Jishuna lukhamashana pemtinghaoda, awui pāng chi katingvāda, ali saza̱da, ali hānga: "Ina yāmira, tharchaohaolu."

⁴²Chieina ngalāngda phārrei kakazā chi raichaohaowa, kala a tharhaowa. ⁴³Ali saklak eina ningmilaga, ngalāngda ali chihohaowa,

⁴⁴kala ali hānga, "Khipālikha mahānglakalu, kha vālu, nakhalatta pāngmonli achitheilu, kala na tharmi khavai Mosesna kaso kahai chi mibingna theikhui khavai achigatlu."

⁴⁵Kha ana kayāngli sokta, chi phongshar eina hāngzata kala pao chi ngayaovai ngasaka, chieina Jishuna keinung akhali phonglāk eina mazanglengluithuwa, kha lamhāngli pamsanghaowa. Chithālala mibingna apam kachiva̱wui eina awuili rai.