Mark 2

2 ¹Sha̱khawui thili, Jishuna Capernaumli latunga tharan, ana shimli lei kaji pao ngayaovai. ²Mi kachungkha rākazipa, chithākha khāmong kayānglila apam maleithuwa; kala ana athumli tui hānga. ³Chiwui thili kachikathā kaikhana, mi matina sheikasha̱ mi akhali ngava̱laga Jishuli khuirai. ⁴Mi kachungkhawui vang Jishuli khuizang khavai apong maleithuda, athumna awui tungshong shimphung horhaida, chi chuiphutlaga, sheikasha̱ mi pi kahai pet chi chihotai.

⁵Jishuna athumwui shitkasang chi theilaga sheikasha̱ chili hānga, "Inaomayara, nawui morei pheomihaira."

⁶Chitharan ain kathembing kaikhana apam chili pamda leilakha, athumwui wuklungli chukphāphāda, ⁷"Khisāda mipā hi chithāda matuikhala? Ana kachipat tui matuida lei! Vare māng maningla khipāna morei pheomi shaprakhala?"

⁸Chi kahāng eina Jishuna awui manglāli, athum khalatta chithāda chukphāphāda kaji theida, athumli hānga, "Khisāda nathumwui wuklungli hi chukphāphākhala? ⁹Sheikasha̱ chili, 'Nawui morei pheomihaira,' chi hānglaga phāmeikā, lah, 'Ngakarthuilu, nawui pet khuiphungda zatulu,' chi hānglaga phāmeirakhala? ¹⁰Kha miwui Naomayarana okathuili morei pheomi khavai pangshap leipa chi nathumna theira khavaina" Chieina ana sheikasha̱ chili hānga, ^a a v10 Ain kathembingna rida, Vare māng maningla khipāna morei pheomi shaprakhala da hānga — kala ara Jishu, miwui Naomayarana, athumwui morei pheomihai. "Miwui Naomayara" kaho ming hi Danielwui khamarānli katang makhavai pangshap kaphā mi akhawui pongli latunga, kala hili Jishu khipā ngasāla kaji tuprik eina chitheikhui. ¹¹"Ina nali hānga, ngakarthuida, nawui pet khuiphunglaga shimli ungulu."

¹²Ana ngakarthuida, chi kahāng eina awui pet ngava̱khuiphungda, athum saikorawui miktāli shokhaowa; chithākha mi saikora matakhakhaida ithumwui Avāli sochikatta hānga, "Ithumna hikathā khikha atamla matheilakranga."

Jishuna Khāshinā Khaloka Akhali Hokhui

¹³Jishuna shamadrupheili latluida shokhaowa; yarui saikora awuili rai, kala ana athumli tamchithei.

¹⁴Ana zatmamānda leilakha, Alphaeuswui naomayara Levi khāshinā khuikhavaipamli pamda leipa chi theilaga hānga, "Ithi shurlu." Ana ngakarthuilaga athi shurthuwa.

¹⁵Jishuna Leviwui shimli phazā khavai pamda leilakha, khāshinā khalokabing kala morei kaphungbing kachungkha Jishu eina awui sākhangatha̱bingli ngasoda phazāruma; kaja kachungkhana ali shurhairasai. ¹⁶Ana morei kaphungbing kala khāshinā khalokabingli phāshak phazāruma chi theilaga, Phariseebingwui ain kathembingna awui sākhangatha̱bingli hānga, "Khiwui vang ana khāshinā khalokabing eina morei kaphungbingli phazārumkhala?"

¹⁷Jishuna hi shālaga athumli ngahānkai, "Makakazābingna khanong mahomana, kha kakazābingna kahona. Iva khamashung khangarongbingli hokhui khavai kharā maningmana, kha morei kaphungbingli hokhuikida kharāna."

Drakhāra̱ Kadhar, Apong Kadhar

¹⁸Johnwui sākhangatha̱bing eina Phariseebingna khumda leisai. Athumna ali rāngahāna, "Khiwui vang eina Johnwui sākhangatha̱bing eina Phariseebingwui sākhangatha̱bingna khum, kha nawui sākhangatha̱bingva makhumthukhala?"

¹⁹Jishuna athumli hānga, "Shakazā mayara chi athumli ngasopamda leilakha shakzātli kharā mibingna khumpairala? Shakazā mayara chi athumli ngasopamda leilakha eina tangda, athumna khum masārarmana. ²⁰Kha shakazā mayara chi athumwui eina khuikathui atam rārāsāra; chithang, chi zimiksho athumna khumnaora. ²¹Khipānakha kachama kachonli chonshi kadhar matāksangngayaomana; chi maningakha tākkasang kadhar chi kachama chiwui eina kākshokhaoda kakā chi worshokra. ²²Khipānakha kachama drakhā sāhuishonli kadhara drakhāra̱ chi mathaisangmana; drakhāra̱ china sāhuishon chi ngawokngasakra, kala khanini shimānhaora. Kadhara drakhāra̱ chi kadhara sāhuishonli sangphalungra."

Miwui Naomayara, Sabbathwui Proho

²³Sabbaththang akhali ana luisai akhali vai, kala athum khavā tharan awui sākhangatha̱bingna māmazan mazokhuida haokaphoka. ²⁴Phariseebingna ali hānga, "Yanglu, khiwui vang eina athumna Sabbaththang ain kakai ot sāda leikhala?"

²⁵Kala ana athumli hānga, "Davidna khikha maleila kala thaihao tharan, a eina ali ngasokazatbingna khi sai kaji, nathumna khipānakha mapāthula, ²⁶kathada ana pāngmon kharei Abiatharwui atam chili ithumwui Avāwui shimli zangda, pāngmonbing maningna shai khavaiki kaji ngasokhamiwui khamui shaihao, kala ali ngasokazatbinglila mishaihao?"

²⁷Kala ana athumli hānga, "Sabbath chi miwui vang eina sākahaina, mi chi Sabbathwui vang maningmana. ²⁸Chiwui vang eina miwui Naomayarana Sabbathwui eina tangda Prohona."