An Gafarta, An Kuma Warkar

Abokai huɗu suka huda rufin ɗaki, Yesu kuma ya gaya wa shanyayyen mutumin cewa an gafarta masa zunubansa, abin da malaman Attaura suka kira saɓo. Ya ci abinci tare da masu karɓar haraji, ya kāre almajiran da ba sa azumi, ya kuma ce Asabar kanta tasa ce.

Babi na 2.

Bayan 'yan kwanaki, da Yesu ya dawo Kafarnahum, sai labari ya bazu cewa yana gida. Mutane da yawa suka taru har babu sauran wuri, ko a bakin ƙofa ma, yana kuwa yin musu magana. Sai waɗansu mutane suka zo, suka kawo masa wani shanyayye, mutum huɗu ne suke ɗauke da shi. Da suka kāsa kai shi wurin Yesu saboda taron, sai suka buɗe rufin da yake bisansa, suka huda shi, suka saukar da tabarmar da shanyayyen yake kwance a kai.

Da Yesu ya ga bangaskiyarsu, sai ya ce wa shanyayyen, “Ɗana, an gafarta maka zunubanka.”

To, waɗansu malaman Attaura suna zaune a wurin, suna tunani a zukatansu, “Me ya sa wannan mutum yake magana haka? Yana saɓo ne! Wa ya isa yă gafarta zunubai sai Allah kaɗai?”

Nan da nan Yesu ya gane a ruhunsa cewa haka suke tunani a zukatansu, sai ya ce musu, “Don me kuke tunanin waɗannan abubuwa a zukatanku? Wanne ne ya fi sauƙi—a ce wa shanyayyen, ‘An gafarta maka zunubanka,’ ko kuma a ce, ‘Tashi, ɗauki tabarmarka, ka yi tafiya’? Amma domin ku san Ɗan Mutum yana da iko a duniya yă gafarta zunubai”—sai ya ce wa shanyayyen, ^a “Ina gaya maka, tashi, ɗauki tabarmarka, ka tafi gida.”

Sai ya tashi, nan da nan ya ɗauki tabarmarsa, ya fita a gaban dukansu, har kowa ya yi mamaki, suka yabi Ubanmu, suna cewa, “Ba mu taɓa ganin irin wannan ba.”

Yesu Ya Kira Mai Karɓar Haraji

Yesu ya sāke fita gefen teku; dukan taron suka zo wurinsa, ya kuma koya musu.

Yana wucewa, sai ya ga Lawi ɗan Halfa zaune a wurin karɓar haraji, ya ce masa, “Bi ni.” Sai ya tashi, ya bi shi.

Yayinda Yesu yake cin abinci a gidan Lawi, masu karɓar haraji da yawa da masu zunubi suka zauna cin abinci tare da Yesu da almajiransa, domin mutane da yawa suna bin sa. Da malaman Attaura na Farisiyawa suka gan shi yana ci tare da masu zunubi da masu karɓar haraji, sai suka tambayi almajiransa, “Don me yake ci tare da masu karɓar haraji da masu zunubi?”

Da Yesu ya ji haka, sai ya ce musu, “Masu lafiya ba sa bukatar likita, sai dai marasa lafiya. Ban zo in kira masu adalci ba, sai dai masu zunubi.”

Sabon Ruwan Inabi, Sabuwar Hanya

Almajiran Yahaya da Farisiyawa suna azumi. Sai suka zo suka tambaye shi, “Don me almajiran Yahaya da almajiran Farisiyawa suke azumi, amma naka ba sa yi?”

Yesu ya ce musu, “Baƙin ango za su iya yin azumi tun ango yana tare da su? Muddin suna da ango tare da su, ba za su iya yin azumi ba. Amma kwanaki za su zo da za a ɗauke ango daga gare su; sa'an nan, a ranar nan, za su yi azumi. Ba wanda yake ɗinke sabon ƙyalle a kan tsohuwar riga; in ba haka ba, sabon ƙyallen zai yage daga tsohuwar, yagewar kuma ta ƙara muni. Ba wanda yake zuba sabon ruwan inabi a cikin tsoffin salkuna; ruwan inabin zai farfashe salkunan, dukansu kuma su lalace. Sabon ruwan inabi a cikin sababbin salkuna ake zubawa.”

Ɗan Mutum, Ubangijin Asabar

Wata ranar Asabar, yana ratsa gonakin hatsi, suna cikin tafiya, sai almajiransa suka fara ƙaɓar kan hatsi. Sai Farisiyawa suka ce masa, “Dubi, don me suke yin abin da bai halatta a yi ba a ranar Asabar?”

Sai ya ce musu, “Ba ku taɓa karanta abin da Dawuda ya yi sa'ad da yake cikin bukata yana kuma jin yunwa ba, shi da waɗanda suke tare da shi, yadda ya shiga gidan Ubanmu a zamanin Abiyatar babban firist, ya ci gurasar Kasancewa—wadda firistoci kaɗai ne suka halatta su ci—ya kuma ba waɗanda suke tare da shi?”

Ya kuma ce musu, “An yi Asabar saboda mutum ne, ba mutum saboda Asabar ba. Saboda haka Ɗan Mutum shi ne Ubangiji har ma na Asabar.”