An Mayar da Rai a Ranar Asabar

Yesu ya warkar da shanyayyen hannu a ranar Asabar, Farisiyawa kuma suka fara shirin kashe shi. Ya naɗa goma sha biyu. Malaman Attaura suka ce yana da aljan, iyalinsa kuma suka ce ya haukace; ya amsa cewa duk wanda yake aikata nufin Ubanmu, shi ne iyalinsa.

Babi na 3.

Yesu ya sāke shiga majami'a, wani mutum mai shanyayyen hannu kuwa yana nan. Suka zuba masa ido su ga ko zai warkar da mutumin a ranar Asabar, domin su sami hanyar zargin Yesu.

Yesu ya ce wa mutumin mai shanyayyen hannu, “Ka tashi tsaye ka zo gaba.” Sa'an nan ya tambaye su, “An halatta a yi alheri ko a yi mugunta a ranar Asabar, a ceci rai ko a kashe?” Amma suka yi shiru. Ya waiwaya ya dube su da fushi, yana kuma baƙin ciki saboda taurin zuciyarsu, sai ya ce wa mutumin, “Ka miƙa hannunka.” Ya miƙa, hannunsa kuwa ya warke.

Sai Farisiyawa suka fita, nan da nan suka fara shawara da mutanen Hirudus yadda za su hallaka shi.

Taro na Bin Mai Warkarwa

Yesu ya janye zuwa bakin teku tare da almajiransa, babban taro kuwa daga Galili ya bi shi, da kuma daga Yahudiya, da daga Urushalima, da Idumiya, da ƙetaren Urdun, da kewayen Taya da Sidon—da jin dukan abin da yake yi, babban taro ya zo wurinsa. Ya ce wa almajiransa su shirya masa ƙaramin jirgin ruwa saboda taron, don kada su murƙushe shi. Gama ya warkar da mutane da yawa har duk masu cututtuka suka yi ta turun gaba domin su taɓa shi. Duk sa'ad da mugayen ruhohi suka gan shi, sai su fāɗi a gabansa suna ihu, “Kai ne Ɗan Allah!” Amma ya tsananta musu gargaɗi kada su bayyana shi.

An Naɗa Sha Biyun nan

Yesu ya hau dutsen, ya kira waɗanda yake so, suka kuwa zo wurinsa. Ya naɗa sha biyu, ya ba su suna manzanni, domin su kasance tare da shi, domin kuma yă aike su su yi wa'azi, su kuma kasance da iko su fitar da aljanu. Ga sha biyun da ya naɗa kenan: Siman, wanda ya sa masa suna Bitrus; Yaƙub ɗan Zabadi, da Yahaya ɗan'uwansa, waɗanda ya sa wa suna Buwanarjes, ma'ana 'Ya'yan Tsawa; Andarawus, da Filibus, da Bartalamawus, da Matta, da Toma, da Yaƙub ɗan Alfa, da Taddawus, da Siman mai Himma, da Yahuda Iskariyoti, wanda ya bāshe shi.

Mulkin da Ba Zai Iya Fāɗuwa Ba

Ya koma gida, taron kuwa ya sāke taruwa, har shi da almajiransa suka kāsa ko cin abinci. Da iyalinsa suka ji haka, sai suka fito domin su kame shi, gama suka ce, “Hankalinsa ya tashi.” Malaman Attaura da suka gangaro daga Urushalima suka ce, “Yana da Ba'alzabul,” suka kuma ce, “Da ikon sarkin aljanu yake fitar da aljanu.”

Sai Yesu ya kira su wurinsa, ya yi musu magana da misalai, “Yaya Shaiɗan zai iya fitar da Shaiɗan? In mulki ya rarrabu gāba da kansa, mulkin nan ba zai iya tsayawa ba. In kuma gida ya rarrabu gāba da kansa, gidan nan ba zai iya tsayawa ba. In kuma Shaiɗan ya yi gāba da kansa ya rarrabu, ba zai iya tsayawa ba, ƙarshensa ya zo kenan. Ba mai iya shiga gidan mai ƙarfi yă kwashe kayansa sai ya fara daure mai ƙarfin—sa'an nan yă washe gidan.

Lalle hakika, ina gaya muku, za a gafarta wa 'ya'yan mutane dukan zunubai da saɓon da suke yi wa Allah, kome suka faɗa, amma duk wanda ya saɓi Ruhu Mai Tsarki ba shi da gafara har abada, mai laifin zunubi madawwami ne,”

gama suna cewa, “Yana da mugun ruhu.”

Iyalin Uba

Sai uwarsa da 'yan'uwansa suka iso, suka tsaya a waje, suka aika a kira shi. Taro kuwa yana zaune kewaye da shi, suka ce masa, “Ga uwarka da 'yan'uwanka a waje, suna nemanka.”

Ya amsa musu ya ce, “Su wane ne uwata da 'yan'uwana?” Ya waiwaya ya dubi waɗanda suke zaune kewaye da shi, ya ce, “Ga uwata da 'yan'uwana! Duk wanda ya aikata nufin Ubanmu, shi ne ɗan'uwana da 'yar'uwata da uwata.”