Mark 3

3 ¹Jishuna latluida synagogueli azanga, kala apāng sheikasha̱ mi akha apam chili leisai. ²Jishuli khayon phenpai khavai, sabbaththang ana mipa chili raiminikhala da athumna khangatha̱ yangpama.

³Jishuna apāng sheikasha̱ mipa chili hānga, "Ngakarthuida ngachaili rālu." ⁴Chieina ana athumli ngahāna, "Sabbaththang kaphā ot kasā lah makaphā ot kasā, manglā huikhui lah shaothat, hi ainlā?" Kha athum kasaikha pama. ⁵Ana malungvāt eina athumli kuimareida yanga, kala athumwui ning khamakangwui vang wukhananghaoda, mipa chili hānga, "Napāng katingshoklu." Ana pāng katingkashok eina, awui pāng khangachā thada unghaowa.

⁶Chieina Phariseebingna shokta, kathada Jishuli sāshimānhaosikhala da hengsāda Herodwui mibingli ngasoda ngasana.

Yaruina Raikhameli Shur

⁷Jishuna awui sākhangatha̱bingli ngasoda shamadruvāk kashā eina vāhaowa; Galileewui eina mi kachungkhana ali shurrai, kala Judeawui eina, ⁸Jerusalemwui eina, Idumeawui eina, Jordan kānkāda, kala Tyre eina Sidonwui kuikhamareili khalei eina, ana kasā saikora kashā eina, mi kachungkha akhana awuili rai. ⁹Mi kachungkhawui vang eina, athumna ali makachup khavai, ana awui sākhangatha̱bingli marikhong kateo akha ngarānda leili khavai hānga. ¹⁰Kaja ana mi kachungkha raimi kahaiwui vang, kazāt khalei saikorana ali singkhui khavai awui mangāli zata. ¹¹Makathar manglābingna ali theikup tharan, awui mangāli mashunzangda, "Na Varewui Naomayarana!" da vaowa. ¹²Kha ana athumli ali makachitheialu da saklak eina ningmi.

Tharāda Khani Kapangkhuihai

¹³Jishuna kaphungli kai, kala awui ningkachāng kahaibingli hokhui; athum awuili rai. ¹⁴Ana tharāda khani kapangkhui, paokazat da nameia, athum awuili ngasomi khavai kala pao hāshok khavai athumli chihovā khavai, ¹⁵kala kameobing kashamshok khavai pangshap leili khavaina. ¹⁶Ana kapangkhui tharāda khani chi hina: Simon, ana ali Peter da aming phokmi; ¹⁷Zebedeewui naomayara James eina agato John, ani chili Boanerges da aming phokmi, chi kakhalatna Kazing Khangashumwui Naomayarabing; ¹⁸Andrew, Philip, Bartholomew, Matthew, Thomas, Alphaeuswui naomayara James, Thaddaeus, Zealotla kaho Simon, ¹⁹kala ali yankasaia Judas Iscariot.

Kongluirarmara Wungram Akha

²⁰Ana shimli unghaowa; mi kachungkha rakazipluishitta, chiwui vang eina a eina awui sākhangatha̱bingna kashakazā tangda masamphangthuwa. ²¹Awui shimkhurwui mibingna chi kashā tharan, ali ngarin khavai kayāngli shoka, kaja athumna "A ning maleimara" da hānga. ²²Jerusalemwui eina kharā ain kathemabingna hānga, "Ana Beelzebul kai," kala, "Kameobingwui akhavāwui pangshap eina ana kameo kashamshoka."

²³Chieina Jishuna athumli hokhuida chānjam eina hānga: "Kathada Satanna Satanli kashamshokrakhala? ²⁴Wungram akha khalatta ngayarkazamhaiakha, wungram chi manganingrarmara. ²⁵Kala shim akha khalatta ngayarkazamhaiakha, shim chi manganingrarmara. ²⁶Kala Satanna akhalattali ngakaishida ngayarhaiakha, a manganingrarmara; awui machut rāhaira. ²⁷Kachikathāna kapanga mi chi pheipāng makhalaphaila, awui shimli azanglaga awui otbing ngaponra masamphangmara; khalap kahaiwui thili awui shim chi ngaponra.

²⁸Kachangkhat eina ina nathumli kahāngna, morei saikora kala Vareli khonkashe khamatui saikora, athumna khi hānglala, mibingwui naongarabingli pheomira, ²⁹kha Manglā Katharali kachipata chi katang mapheomimara; a katang makhavai morei kasāwui vang yon kahaina,"

³⁰kaja athumna "Ana makathar manglā kai" da hānghairasai.

Avāwui Shimkhur

³¹Awui ava̱ eina achinā ngarā rai; kayāngli nganinglaga ali hokhui khavai awuili mi chihovai. ³²Awui kuimareida pamkasa mi kachungkhana ali hānga, "Yanglu, nawui ava̱ eina nachinā ngarā kayāngli lei, nali phāda lei."

³³Ana athumli ngahānkai, "Iwui ava̱ eina ichinā ngarā khipālongkhala?" ³⁴Awui kuimareida pamkasa mibingli yanglaga, ana hānga, "Iwui ava̱ eina ichinā ngarā hina! ³⁵Ithumwui Avāwui kaphaning kasaa mi chi, a igato, izarva̱ kala ishava̱na."