NgokukaMakhu 3

3 ¹UJesu waphinda wangena esinagogeni, kwakukhona lapho indoda enesandla esishwabene. ²Bamqaphela ngokucophelela ukuze babone ukuthi wayeyoyiphilisa yini le ndoda ngeSabatha, ukuze bammangalele uJesu.

³UJesu wathi kule ndoda enesandla esishwabene: “Sukuma uze phambili.” ⁴Wayesebabuza: “Kuvunyelwe yini ngeSabatha ukwenza okuhle noma ukwenza okubi, ukusindisa impilo noma ukubulala?” Kodwa bathula. ⁵Wabheka nxazonke kubo ngentukuthelo, edabukile ngenxa yobulukhuni benhliziyo yabo, wathi kule ndoda: “Yelula isandla sakho.” Waselula, sabuyiselwa isandla sakhe.

⁶AbaFarisi baphuma, masinyane baqala ukwakha itulo namaHerodiya lokuthi bangambulala kanjani.

Izixuku Zilandela uMelaphi

⁷UJesu wamuka nabafundi bakhe waya elwandle; kwamlandela isixuku esikhulu esivela eGalile, nesivela eJudiya, ⁸nesivela eJerusalema, e-Idumeya, ngaphesheya kweJordani, nasezweni elizungeze iThire neSidoni—bathi bezwa konke ayekwenza, isixuku esikhulu seza kuye. ⁹Watshela abafundi bakhe ukuba bamlungiselele isikebhe esincane, ngenxa yesixuku, ukuze singamcindezeli. ¹⁰Ngokuba wayephilise abaningi kangangokuba bonke ababenezifo babeminyana besondela ukuze bamthinte. ¹¹Kwakuthi njalo lapho omoya abangcolile bembona, bawe phambi kwakhe, bememeza bethi: “Wena uyiNdodana kaNkulunkulu!” ¹²Kodwa wabayala ngokuqinile ukuba bangamdaluli.

Ukumiswa Kwabayishumi Nambili

¹³UJesu wakhuphukela entabeni wabiza labo ayebafuna; beza kuye. ¹⁴Wamisa abayishumi nambili, wababiza ngokuthi abaphostoli, ukuze babe naye nokuze abathume ukuyoshumayela, ¹⁵nokuba babe negunya lokukhipha amademoni. ¹⁶Yilaba abayishumi nambili abamisa: uSimoni, amnika igama lokuthi uPetru; ¹⁷uJakobe indodana kaZebediya, noJohane umfowabo, abaqamba igama lokuthi oBowanergesi, okungukuthi aMadodana Omdumo; ¹⁸u-Andreya, uFiliphu, uBartolomeyu, uMatewu, uTomase, uJakobe indodana ka-Alfewu, uTadewu, uSimoni umZeloti, ¹⁹noJuda Iskariyothe, owamkhaphela.

Umbuso Ongenakuwa

²⁰Wagoduka; isixuku sabuthana futhi, kangangokuba yena nabafundi bakhe babengakwazi nokudla. ²¹Kwathi lapho abakwabo bezwa, baphuma ukuba bambambe, ngokuba bathi: “Uphambene.” ²²Ababhali ababehle bevela eJerusalema bathi: “UneBelzebuli,” futhi: “Ukhipha amademoni ngenkosi yamademoni.”

²³UJesu wayesebabizela kuye wakhuluma nabo ngemifanekiso: “USathane angamkhipha kanjani uSathane? ²⁴Uma umbuso wahlukene phakathi, lowo mbuso ngeke ume. ²⁵Futhi uma indlu yahlukene phakathi, leyo ndlu ngeke ikwazi ukuma. ²⁶Futhi uma uSathane ezimelene naye uqobo, ehlukene phakathi, ngeke akwazi ukuma; ukuphela kwakhe sekufikile. ²⁷Akekho ongangena endlini yomuntu onamandla athathe impahla yakhe engaqali ukumbopha umuntu onamandla—khona-ke angayiphanga indlu yakhe.

²⁸Ngiqinisile ngithi kini, zonke izono nokuhlambalaza uNkulunkulu kuyakuthethelelwa abantwana babantu, noma yini abayishoyo, ²⁹kodwa noma ngubani ohlambalaza uMoya oNgcwele akasoze athethelelwe; unecala lesono esiphakade,”

³⁰ngokuba babethi: “Unomoya ongcolile.”

Umndeni kaBaba wethu

³¹Kwafika unina nabafowabo, bathi bemi ngaphandle, bathumela kuye bembiza. ³²Isixuku sasihlezi simzungezile, sathi kuye: “Bheka, unyoko nabafowenu baphandle, bayakufuna.”

³³Wabaphendula wathi: “Ngobani umame nabafowethu?” ³⁴Wabheka nxazonke kulabo ababehlezi bemzungezile, wathi: “Nampa umame nabafowethu! ³⁵Noma ngubani owenza intando kaBaba wethu nguye umfowethu nodadewethu nomame.”