Mak 3 FHB Father's Heart Bible™

3 ¹Yon lòt fwa ankò, Jezi antre nan sinagòg la, epi te gen yon nonm la ki te gen yon men pòk. ²Yo t'ap veye l byen pre pou wè si l'ap geri nonm nan jou repo a, dekwa pou yo ka akize Jezi.

³Jezi di nonm ki te gen men pòk la: “Leve kanpe, vin devan.” ⁴Apre sa li mande yo: “Èske lalwa bay dwa pou fè byen osinon pou fè mal jou repo a, pou sove yon lavi osinon pou touye?” Men yo pa di anyen. ⁵Li gade yo toutotou ak kòlè, kè l te sere poutèt kè di yo, epi li di nonm nan: “Lonje men ou.” Nonm nan lonje l, epi men l geri nèt.

⁶Lè sa a farizyen yo soti, epi lapoula yo pran fè konplo ak patizan Ewòd yo sou kijan yo ta ka touye l.

Foul la kouri dèyè moun k'ap bay gerizon an

⁷Jezi wete kò l ansanm ak disip li yo, li ale bò lanmè a. Yon gwo foul moun soti nan Galile swiv li, ansanm ak moun ki soti nan Jide, ⁸moun lavil Jerizalèm, moun Idime, moun ki rete lòt bò larivyè Jouden an, ak moun ki rete nan zòn Tir ak Sidon. Lè yo tande tou sa l t'ap fè, yon gwo foul moun vin jwenn li. ⁹Li di disip li yo pou yo pare yon ti kannòt pou li, poutèt foul la, pou moun yo pa peze l twòp. ¹⁰Paske li te geri anpil moun, kifè tout moun ki te gen maladi t'ap pouse pou yo touche l. ¹¹Chak fwa move lespri yo te wè l, yo te tonbe devan l, yo t'ap rele byen fò: “Se ou menm ki Pitit Bondye a!” ¹²Men li te pase yo lòd byen sevè pou yo pa fè konnen ki moun li ye.

Li chwazi douz yo

¹³Jezi moute sou mòn nan, li rele moun li te vle yo, epi yo vin jwenn li. ¹⁴Li chwazi douz ladan yo, li rele yo apòt, pou yo ka rete avèk li, epi pou l ka voye yo al preche, ¹⁵ak pou yo gen otorite pou chase demon yo. ¹⁶Men douz moun li te chwazi yo: Simon, li te ba li yon lòt non, Pyè; ¹⁷Jak, pitit Zebede, ak Jan, frè li, li te rele yo Boanèj, ki vle di Pitit Loraj; ¹⁸Andre, Filip, Batèlmi, Matye, Toma, Jak pitit Alfe, Tade, Simon Zelòt la, ¹⁹ak Jida Iskariòt, nonm ki te trayi l la.

Yon wayòm ki pa ka tonbe

²⁰Jezi tounen lakay; foul la sanble ankò, kifè ni li menm ni disip li yo pa t' menm ka manje. ²¹Lè fanmi l tande sa, yo soti pou yo vin kenbe l, paske yo t'ap di: “Li pèdi tèt li.” ²²Dirèktè lalwa ki te desann soti Jerizalèm yo t'ap di: “Li gen Bèlzeboul sou li,” epi: “Se chèf demon yo ki ba l pouvwa pou l chase demon yo.”

²³Se konsa Jezi rele yo vin jwenn li, epi li pale ak yo an parabòl: “Kijan Satan ka chase Satan? ²⁴Si yon wayòm divize kont tèt li, wayòm sa a p'ap ka kanpe. ²⁵Epi si yon kay divize kont tèt li, kay sa a p'ap ka kanpe. ²⁶Epi si Satan leve kont tèt li, si l divize, li p'ap ka kanpe; lafen li rive. ²⁷Pèsonn pa ka antre lakay yon nonm ki gen fòs pou l pran byen li, si li pa mare nonm fò a anvan. Se lè sa a l'a ka piye kay la.

²⁸Sa m'ap di nou la a, se vre wi: Bondye ap padonnen pitit lèzòm tout peche yo ak tout jouman yo di kont Bondye, kèlkeswa sa yo di, ²⁹men nenpòt moun ki pale mal kont Sentespri a p'ap janm jwenn padon; li koupab yon peche etènèl.”

³⁰Li te pale konsa paske yo t'ap di: “Li gen yon move lespri sou li.”

Fanmi Papa a

³¹Manman l ak frè l yo rive. Yo kanpe deyò a, yo voye rele l. ³²Yon foul moun te chita bò kote l, yo di l: “Gade, manman ou ak frè ou yo deyò a, y'ap mande pou ou.”

³³Li reponn yo: “Ki moun ki manman m ak frè m yo?” ³⁴Li gade moun ki te chita fè wonn bò kote l yo, epi li di: “Men manman m ak frè m yo! ³⁵Nenpòt moun ki fè volonte Papa nou, se li menm ki frè m, sè m ak manman m.”