Keweekyi Saboondo eng' Sabato
Kisoop Jeso euut ne kigayaam eng' sabato, ak kotoi Pharisaik kochop kobar ineendet. Kilewen taman ak aeng'. Kole siriik kole tinyei tamirmiryet ak kole piigap kaa kole kagoweek met; kowol kole age tugul ne yaei machetap Kwandanyo ko ko po kaa.
3 1Ki wo kogeny Jeso sinagogit, ak ki mi olooto chii ne kigayaam eunnyi. 2Ki riibe komyee kole koger ngot ko isoop chiichooto eng' sabato, si komang'u Jeso.
3Koleenji Jeso chiichooto ne kigayaam eunnyi, “Ng'eet ak ibwa tai.” 4Yeityo koteebe icheek koleenji, “Tos ki nyolu eng' sabato keyai ne myee anan keyai ne ya, kesar saboondo anan kebar?” Ago ki silem icheek. 5Ki welelgei kogeer icheek komugul eng' angeet, koimak amu ki ng'omek mugulelwekwak, ak koleenji chiichooto, “Chuul eung'ung'.” Ki chuul, ak ki komyeeit eunnyi.
6Ki mang'u anyun Pharisaik ak koma tyanit kotoi kochop yaityet kobooto Herodiaik kole kobar ineendet.
Rubei Tuiyosyek Chii ne Soobei
7Ki istoegei Jeso kobooto kasubikyik koba araraita; ak ki osup tuiyet ne oo ne punu Galilaya, ak Judea, 8ak Jerusalem, Idumea, tabanda ne po Jordan, ak komoswek che neegitee Tyro ak Sidon—kingo kas tuguuk tugul che yaei, kobwonji tuiyet ne oo ole mi ineendet. 9Ki leenji kasubikyik kochobchini moinget ne ming'in si koik ne ityin, amu tuiyet, si matinyaliil ineendet. 10Amu ki isoop che chaang' miising', kot kotoi tugul che tinyei myanwogik koriich si konam ineendet. 11Ye kigeer tamirmirik che murwonen ineendet, kolugui tainnyi, kowaach kole, “Ii Weeriitap Kamuktaindet!” 12Ago ki igimgimei icheek koleenji si matiboorun ineendet.
Kelewen Taman ak Aeng'
13Ki togosta Jeso tulweet ak koguur che kimachei; kobwonji ineendet. 14Ki lewen taman ak aeng', koguur icheek che kiyooktoi, si kotebi kobooto ineendet, ak si koiyookto koamda, 15ak si kotinyei kimnateet koon oik. 16Chu taman ak aeng' che ki lewen: Simion, ne ki goochi kainet ne Petero; 17Jakobo weeriitap Zebedayo, ak Johana ng'eetap kamet, che ki kuur Boanerges, ye kiweech, Weeriigap iryageet; 18Andrea, Philipu, Bartolomayo, Matayo, Thomas, Jakobo weeriitap Alphayo, Thadeo, Simion Selote, 19ak Judas Iskaryot, ne king'wektoi ineendet.
Laitornatet ne Ma Muuch Kobut
20Ki wo koo; ak koyumjigei tuiyet kogeny, kot ma komuuch kobooto kasubikyik agot koam amitwogik. 21Ye kingo kas piigap koonnyi, komang'u kochop konam ineendet, amu ki le, “Kagomindilil.” 22Ki le siriik che ki punu Jerusalem, “Tinyei Beelsebul,” ak, “Oone oik eng' laitoryat ne po oik.”
23Ki kuur anyun Jeso icheek ak kong'alaalji eng' paraisisyek: “Koonei ano Setani Setani? 24Ngot ko pchegei laitornatet, koma muuchi kotonon laitornatani. 25Ak ngot ko pchegei koot, koma muuchi kotonon koonooto. 26Ak ngot ko ng'eetyigei Setani ineegei ak kopcheigei, koma muuchi kotonon; kagoit letnyi. 27Ma mi chii age ne muuchi kochut kootap chii ne tinyei kimnateet ak koip tuguukyik, ngot ko ma sip korat chii ne tinyei kimnateet—yeityo komuuch kogany tuguuk che po koonnyi.
28Amwaiwok iman ale, kenyochin lagogap chii kaat eng' tengekwogik tugul ak kalilanaik tugul che chubei Kamuktaindet, kiy age tugul ne mwaei, 29ago age tugul ne chubei Kabuuset ne Tiliil, ma konyoor nyoetap kaat agoi; koriikyin tengekto ne po koigeny,”
30amu ki le, “Tinyei tamirmiryet ne murwoon.”
Piigap Kwanda
31Ki nyoonu kamennyi ak tupchoikyik, ak kotonon saang', koiyookto chii ole mi ineendet, si koguur ineendet. 32Ki tebee tuiyet kokirwoogi ineendet, ak koleenji, “Keero, mi saang' kamenng'ung' ak tupchoiguk, cheeng'in inyee.”
33Kowolji icheek koleenji, “Ng'oo kamennyu ak tupchoikyuk?” 34Ki welelgei kogeer che tebee kokirwoogi ineendet, koleenji, “Chu kamennyu ak tupchoikyuk! 35Age tugul ne yaei mogutyetap Kwandanyo, ko ineendet tupchennyu ak sengenyu ak kamennyu.”