Mariko 3 FHB Father's Heart Bible™

3 ¹Na rĩngĩ Jesũ agĩtoonya thunagogi, na kũu nĩ kwarĩ mũndũ warĩ na guoko kũhohu. ²Nao magĩikara makĩmũrora wega nĩguo moone kana nĩekũhonia mũndũ ũcio mũthenya wa Thabatũ, nĩgeetha mamũthitange.

³Nake Jesũ akĩĩra mũndũ ũcio warĩ na guoko kũhohu atĩrĩ, “Rũgama ũũke mbere.” ⁴Agĩcooka akĩmooria atĩrĩ, “Nĩ gwĩtĩkĩrĩku mũthenya wa Thabatũ gwĩka wega kana gwĩka ũũru, kũhonokia muoyo kana kũũraga?” No-o magĩkira ki. ⁵Nake akĩmarora othe arĩ na marakara, aiguĩte kĩeha nĩ ũndũ wa ũmũ wa ngoro ciao, agĩcooka akĩĩra mũndũ ũcio atĩrĩ, “Tambũrũkia guoko gwaku.” Nake agĩgũtambũrũkia, nakuo guoko gwake gũgĩcooka gũkĩhona.

⁶Nao Afarisai makiuma nja, na o rĩmwe makĩambĩrĩria gũciira na Aherodia ũrĩa mangĩmũniina.

Ikundi cia Andũ Irathingata Mũhonia

⁷Nake Jesũ agĩthiĩ na arutwo aake nginya iria-inĩ; nakĩo kĩrĩndĩ kĩnene kĩoimĩte Galili gĩkĩmũrũmĩrĩra, o na kĩoimĩte Judea, ⁸kĩoimĩte Jerusalemu, na Idumea, na mũrĩmo ũrĩa ũngĩ wa Jorodani, na bũrũri ũrĩa warĩ hakuhĩ na Turo na Sidoni—maigua maũndũ mothe marĩa aarĩĩkaga, kĩrĩndĩ kĩnene gĩgĩũka kũrĩ we. ⁹Nake akĩĩra arutwo aake mamũhaarĩrie gatarũ nĩ ũndũ wa kĩrĩndĩ kĩu, nĩguo matikamũhatĩkanie. ¹⁰Amu nĩahonetie andũ aingĩ mũno, nginya arĩa othe maarĩ na mĩrimũ makĩmũhatĩkania nĩguo mamũhutie. ¹¹Na rĩrĩa rĩothe maroho marĩa mathũku maamuonaga, maagũaga thĩ mbere yake, makaanĩrĩra, makoiga atĩrĩ, “Wee nĩwe Mũrũ wa Ngai!” ¹²No we akĩmakaania na hinya matikamũguũrie.

Arĩa Ikũmi na Eerĩ Nĩmaamũrwo

¹³Nake Jesũ akĩambata kĩrĩma-inĩ, agĩĩta arĩa eendaga; nao magĩũka kũrĩ we. ¹⁴Nake agĩthuura andũ ikũmi na eerĩ, akĩmatua atũmwo, nĩguo makoragwo hamwe nake, na nĩguo amatũme makahunjie, ¹⁵o na magĩe na ũhoti wa kũingata ndaimono. ¹⁶Nao andũ ikũmi na eerĩ arĩa aathuurire nĩ aya: Simoni, ũrĩa aaheire rĩĩtwa Petero; ¹⁷na Jakubu mũrũ wa Zebedi, na Johana mũrũ wa nyina, arĩa aatuire Boanerigesi, naguo nĩ kuuga Ariũ a Marurumĩ; ¹⁸na Anderea, na Filipo, na Baratholomayo, na Mathayo, na Toma, na Jakubu mũrũ wa Alifayo, na Thadayo, na Simoni ũrĩa Mũzelote, ¹⁹na Judasi Mũisikariota, ũrĩa wamũkũũrire.

Ũthamaki Ũrĩa Ũtangĩgũa

²⁰Nake agĩthiĩ mũciĩ; nakĩo kĩrĩndĩ gĩgĩcookanĩrĩra rĩngĩ, nginya we na arutwo aake matingĩahotire o na kũrĩa. ²¹Na rĩrĩa andũ ao maiguire ũguo, makiuma makamũnyiite, nĩgũkorwo moigaga atĩrĩ, “Nĩagũrũkĩte.” ²²Nao aandĩki-marũa arĩa maikũrũkĩte kuuma Jerusalemu makiuga atĩrĩ, “Arĩ na Belizebuli,” na, “Aingataga ndaimono na hinya wa mũnene wa ndaimono.”

²³Nake Jesũ akĩmeeta harĩ we, akĩaria nao na ngerekano atĩrĩ, “Shaitani angĩhota atĩa kũingata Shaitani? ²⁴Angĩkorwo ũthamaki nĩwĩgayanĩte guo mwene, ũthamaki ũcio ndũngĩhota kwĩhaanda. ²⁵Na angĩkorwo nyũmba nĩĩgayanĩte yo nyene, nyũmba ĩyo ndĩngĩhota kwĩhaanda. ²⁶Na angĩkorwo Shaitani nĩereganĩte we mwene na akagayũkana, ndangĩhota kwĩhaanda; ithiru rĩake nĩikinyu. ²⁷Gũtirĩ mũndũ ũngĩhota gũtoonya nyũmba ya mũndũ njamba na atahe indo ciake atambĩte kuoha mũndũ ũcio njamba—thuutha ũcio no ahote gũtaha nyũmba ĩyo.

²⁸Ngũmwĩra na ma atĩ, ciana cia andũ nĩikarekerwo mehia mao mothe na irumi ciothe iria irumaga Ngai, o ũndũ wothe ingĩaria, ²⁹no ũrĩa wothe ũkaaruma Roho Mũtheru ndarĩ hĩndĩ akaarekerwo; nĩahĩtĩtie rĩhia rĩa tene na tene,”

³⁰nĩgũkorwo moigaga atĩrĩ, “Arĩ na roho mũthũku.”

Nyũmba ya Ithe witũ

³¹Nake nyina na ariũ a nyina magĩũka, na marũgamĩte nja, magĩtũma mũndũ kũrĩ we, makĩmwĩta. ³²Nakĩo kĩrĩndĩ gĩgĩikara thĩ kĩmũthiũrũrũkĩirie, gĩkĩmwĩra atĩrĩ, “Ta rora, nyũkwa na ariũ a nyũkwa marĩ nja, nĩmaragũcaria.”

³³Nake akĩmacookeria atĩrĩ, “Maitũ na ariũ a maitũ nĩ arĩkũ?” ³⁴Agĩcooka akĩrora arĩa maikarĩte thĩ mamũthiũrũrũkĩirie, akiuga atĩrĩ, “Aya nĩ o maitũ na ariũ a maitũ! ³⁵Ũrĩa wothe wĩkaga wendi wa Ithe witũ, ũcio nĩwe mũrũ wa maitũ, na mwarĩ wa maitũ, na maitũ.”