ማርቆስ 3

3 ¹ኢየሱስ እንደገና ወደ ምኵራብ ገባ፤ በዚያም እጁ የሰለለ ሰው ነበረ። ²ኢየሱስን ይከሱት ዘንድ፣ በሰንበት ሰውየውን ይፈውሰው እንደሆነ በጥንቃቄ ይከታተሉት ነበር።

³ኢየሱስም እጁ የሰለለውን ሰው፣ “ተነሥተህ ወደ መካከል ና” አለው። ⁴ከዚያም፣ “በሰንበት መልካም ማድረግ ተፈቅዷል ወይስ ክፉ ማድረግ? ነፍስ ማዳን ወይስ መግደል?” ብሎ ጠየቃቸው፤ እነርሱ ግን ዝም አሉ። ⁵በልባቸው መደንደን አዝኖ በቍጣ ዙሪያውን ተመለከታቸው፤ ሰውየውንም፣ “እጅህን ዘርጋ” አለው። እርሱም ዘረጋ፤ እጁም ዳነ።

⁶ፈሪሳውያንም ወጥተው ወዲያውኑ እንዴት እንደሚያጠፉት ከሄሮድሳውያን ጋራ መማከር ጀመሩ።

ሕዝቡ ፈዋሹን ይከተላል

⁷ኢየሱስም ከደቀ መዛሙርቱ ጋራ ወደ ባሕር ፈቀቅ አለ፤ ከገሊላም ታላቅ ሕዝብ ተከተለው፤ ከይሁዳም፣ ⁸ከኢየሩሳሌም፣ ከኤዶምያስ፣ ከዮርዳኖስ ማዶ፣ ከጢሮስና ከሲዶና አካባቢም ያደረገውን ሁሉ ሰምተው ብዙ ሕዝብ ወደ እርሱ መጡ። ⁹ስለ ሕዝቡ ብዛት እንዳያጨናንቁት ትንሽ ጀልባ እንዲያዘጋጁለት ደቀ መዛሙርቱን አዘዘ። ¹⁰ብዙዎችን ፈውሶ ነበርና በሽታ ያለባቸው ሁሉ ሊነኩት ይገፋፉ ነበር። ¹¹ርኩሳን መናፍስትም ባዩት ጊዜ ሁሉ በፊቱ ወድቀው፣ “አንተ የእግዚአብሔር ልጅ ነህ!” እያሉ ይጮኹ ነበር። ¹²እርሱ ግን እንዳይገልጡት አጥብቆ አስጠነቀቃቸው።

ዐሥራ ሁለቱ ተሾሙ

¹³ኢየሱስም ወደ ተራራ ወጥቶ የወደዳቸውን ጠራ፤ እነርሱም ወደ እርሱ መጡ። ¹⁴ከእርሱ ጋራ እንዲሆኑ፣ ሊሰብኩም ሊልካቸው ዐሥራ ሁለቱን ሾመ፤ ሐዋርያትም ብሎ ሰየማቸው፤ ¹⁵አጋንንትንም ለማውጣት ሥልጣን እንዲኖራቸው። ¹⁶የሾማቸውም ዐሥራ ሁለቱ እነዚህ ናቸው፤ ጴጥሮስ ብሎ ስም የሰጠው ስምዖን፤ ¹⁷የዘብዴዎስ ልጅ ያዕቆብ፣ ወንድሙም ዮሐንስ፤ የነጎድጓድ ልጆች ማለት ቦአኔርጌስ ብሎ ሰየማቸው፤ ¹⁸እንድርያስ፣ ፊልጶስ፣ በርተሎሜዎስ፣ ማቴዎስ፣ ቶማስ፣ የእልፍዮስ ልጅ ያዕቆብ፣ ታዴዎስ፣ ቀናተኛው ስምዖን፣ ¹⁹አሳልፎም የሰጠው የአስቆሮቱ ይሁዳ።

የማይወድቅ መንግሥት

²⁰ወደ ቤትም ገባ፤ ሕዝቡ እንደገና ስለ ተሰበሰበ እርሱና ደቀ መዛሙርቱ እንጀራ እንኳ ሊበሉ አልቻሉም። ²¹ቤተ ዘመዶቹም ይህን ሰምተው፣ “አእምሮውን ስቷል” ይሉ ነበርና ሊይዙት ወጡ። ²²ከኢየሩሳሌም የወረዱ ጸሐፍትም፣ “ብዔል ዜቡል አለበት” አሉ፤ ደግሞም፣ “አጋንንትን የሚያወጣው በአጋንንት አለቃ ነው” አሉ።

²³ኢየሱስም ወደ እርሱ ጠርቶ በምሳሌ እንዲህ አላቸው፤ “ሰይጣን ሰይጣንን እንዴት ሊያወጣ ይችላል? ²⁴አንድ መንግሥት እርስ በርሱ ከተከፋፈለ ያ መንግሥት ሊቆም አይችልም። ²⁵አንድ ቤትም እርስ በርሱ ከተከፋፈለ ያ ቤት ሊቆም አይችልም። ²⁶ሰይጣንም ራሱን ተቃውሞ ከተከፋፈለ ሊቆም አይችልም፤ ፍጻሜው ደርሷል። ²⁷ማንም ኀይለኛውን አስቀድሞ ሳያስር ወደ ኀይለኛው ሰው ቤት ገብቶ ንብረቱን ሊወስድ አይችልም፤ ከዚያም ቤቱን ይበዘብዛል።

²⁸እውነት እላችኋለሁ፤ የሰው ልጆች የሚናገሩት ሁሉ፣ ኀጢአታቸውም ሆነ በእግዚአብሔር ላይ የሚሳደቡት ስድብ ሁሉ ይቅር ይባልላቸዋል፤ ²⁹መንፈስ ቅዱስን የሚሳደብ ግን ከቶ ይቅርታ የለውም፤ የዘላለም ኀጢአት ዕዳ አለበት።”

³⁰ይህን ያለው፣ “ርኩስ መንፈስ አለበት” ይሉ ነበርና።

የአባታችን ቤተሰብ

³¹እናቱና ወንድሞቹም መጡ፤ በውጭም ቆመው ወደ እርሱ ልከው አስጠሩት። ³²በዙሪያውም የተቀመጠው ሕዝብ፣ “እነሆ፣ እናትህና ወንድሞችህ በውጭ ሆነው ይፈልጉሃል” አለው።

³³እርሱም መልሶ፣ “እናቴና ወንድሞቼ እነማን ናቸው?” አላቸው። ³⁴በዙሪያው ተቀምጠው የነበሩትን ተመልክቶ፣ “እነሆ፣ እናቴና ወንድሞቼ! ³⁵የአባታችንን ፈቃድ የሚያደርግ ማንም ቢሆን፣ እርሱ ወንድሜ፣ እኅቴና እናቴ ነው።”