ማርቆስ 3 FHB Father's Heart Bible™

3 ¹ኢየሱስ ድማ ደጊሙ ናብ ቤተ ፀሎት ኣይሁድ ኣተወ፤ ኣብኡ ኸዓ ኢዱ ዝደረቐት ሰብኣይ ነበረ። ²ንኢየሱስ ክኸስዎ ምእንቲ፥ በሰንበት ነቲ ሰብኣይ ዶ ኼሕውዮ እዩ ኢሎም ኣትኲሮም ይጥምቱ ነበሩ።

³ኢየሱስ ድማ ነቲ ኢዱ ዝደረቐት ሰብኣይ “ተንስእ ናብ ማእኸል ድማ ቕረብ” በሎ። ⁴ሽዑ ድማ “ኣብ ሰንበት ፅቡቕ ምግባር ወይ ክፉእ ምግባር፥ ህይወት ምድሓን ወይ ምቕታል ይግባእ ዲዩ?” ኢሉ ጠየቖም። ንሳቶም ግና ስቕ በሉ። ⁵ብትሪ ልቦም ድማ ሓዚኑ፥ ተቘጢዑ ኣብ ዙርያኡ ናብኣቶም ጠመተ፤ ነቲ ሰብኣይ ከዓ “ኢድካ ዘርግሕ” በሎ። ንሱ ድማ ዘርግሐ፤ ኢዱ ኸዓ ሓወየት።

⁶ሽዑ ፈሪሳውያን ወፂኦም፥ ከመይ ገይሮም ከም ዘጥፍእዎ፥ ምስ ሄሮድሳውያን ሽዑ ንሽዑ ክማኸሩ ጀመሩ።

ህዝቢ ነቲ መሕወይ ይስዕቡ

⁷ኢየሱስ ድማ ምስ ደቀ መዛሙርቱ ናብ ባሕሪ ኣግለሰ፤ ካብ ገሊላ፥ ካብ ይሁዳን ድማ ብዙሕ ህዝቢ ተኸተሉ፤ ⁸ካብ ኢየሩሳሌምን ካብ ኤዶምያስን፥ ካብ ማዕዶ ዮርዳኖስን ካብ ከባቢ ጢሮስን ሲዶንን፥ ዝገብሮ ዝነበረ ዅሉ ሰሚዖም፥ ብዙሕ ህዝቢ ናብኡ መፁ። ⁹ህዝቢ ምእንቲ ኸይጨቕጭቕዎ ድማ፥ ንደቀ መዛሙርቱ ንእሽተይ ጃልባ ኼዳልዉሉ በሎም። ¹⁰ብዙሓት ኣሕውዩ ስለ ዝነበረ፥ ኵሎም እቶም ሕማም ዝነበሮም ኽትንክፍዎ ይደፋፍኡ ነበሩ። ¹¹እቶም ርኹሳት መናፍስቲ ኸዓ ምስ ረኣይዎ፥ ኣብ ቅድሚኡ ይወድቁ፥ “ንስኻ ወዲ እግዚኣብሄር ኢኻ” እናበሉ ድማ ይእውዩ ነበሩ። ¹²ንሱ ግና ከይገልፅዎ ኣትሪሩ ኣጠንቀቖም።

እቶም ዓሰርተ ኽልተ ተሸሙ

¹³ኢየሱስ ድማ ናብ እምባ ደየበ፤ ነቶም ዝደለዮም ፀውዖም፤ ንሳቶም ከዓ ናብኡ መፁ። ¹⁴ምስኡ ምእንቲ ኽኾኑ፥ ክሰብኩ ድማ ምእንቲ ኽልእኾም፥ ሃዋርያት ዝበሃሉ ዓሰርተ ኽልተ ሸመ፤ ¹⁵ኣጋንንቲ ኸውፅኡ ድማ ስልጣን ኪህልዎም። ¹⁶እቶም ዝሸሞም ዓሰርተ ኽልተ ኸዓ እዚኣቶም እዮም፦ ነቲ ጴጥሮስ ዝበሎ ስምኦን፤ ¹⁷ያእቆብ ወዲ ዘብዴዎስን ሓዉ ዮሃንስን፥ ነዚኣቶም ደቂ ነጐድጓድ ማለት ቦኣኔርጌስ ዝበሎም፤ ¹⁸እንድርያስ፥ ፊልጶስ፥ በርተሎሜዎስ፥ ማቴዎስ፥ ቶማስ፥ ያእቆብ ወዲ እልፍዮስ፥ ታዴዎስ፥ ስምኦን ቀናኢ፥ ¹⁹እቲ ዘትሓዞ ይሁዳ ኣስቆሮታውን እዩ።

ዘይወድቕ መንግስቲ

²⁰ናብ ቤት ድማ ኣተወ፤ እቲ ህዝቢ ኸዓ ደጊሙ ተኣከበ እሞ፥ ንሱን ደቀ መዛሙርቱን እንጀራ እኳ ኽበልዑ ኣይከኣሉን። ²¹ቤተሰቡ ኸዓ ምስ ሰምዑ፥ “ኣእምሮ ስሒቱ ኣሎ” ይብሉ ስለ ዝነበሩ፥ ኪሕዝዎ ወፁ። ²²እቶም ካብ ኢየሩሳሌም ዝወረዱ መምህራን ሕጊ ድማ “ብኤል ዜቡል ኣለዎ” በሉ፤ “ብሓለቓ ኣጋንንቲ ኸዓ ንኣጋንንቲ የውፅኦም ኣሎ” ድማ በሉ።

²³ኢየሱስ ድማ ፀዊዑ ብምስላ ኸምዙይ በሎም፦ “ሰይጣን ከመይ ኢሉ ንሰይጣን ከውፅእ ይኽእል? ²⁴መንግስቲ ንስንሳታ እንተ ተፈላለየት፥ እታ መንግስቲ እቲኣ ክትቀውም ኣይትኽእልን እያ። ²⁵ቤት ከዓ ንስንሳታ እንተ ተፈላለየት፥ እታ ቤት እቲኣ ክትቀውም ኣይትኽእልን እያ። ²⁶ሰይጣን ከዓ ንርእሱ እንተ ተቓወመ ተፈላሊዩውን እንተ ኾነ፥ ክቐውም ኣይክእልን እዩ፤ መወዳእታኡ ደኣ መፂኡ። ²⁷ሓደ ሰብ ናብ ቤት ሓያል ሰብኣይ ኣትዩ ንብረቱ ኼሚ፥ ቅድም ነቲ ሓያል ሰብኣይ እንተ ዘይኣሰሮ ዘይከኣል እዩ፤ ሽዑ ድማ ነታ ቤት ክዘምታ እዩ።

²⁸ብሓቂ እብለኩም ኣለኹ፥ ንደቂ ሰብ ዝዛረብዎ ኵሉ ሓጢኣትን ኣብ ልዕሊ እግዚኣብሄር ዝብልዎ ፀርፍን ይሕደገሎም፤ ²⁹ኣብ ልዕሊ መንፈስ ቅዱስ ዝፀርፍ ግና ንዘለኣለም ይቕረታ የብሉን፤ ናይ ዘለኣለም ሓጢኣት ዝበደለ እዩ” በሎም፤

³⁰“ርኹስ መንፈስ ኣለዎ” ይብሉ ስለ ዝነበሩ እዩ።

ቤተሰብ ኣቦና

³¹ኣዲኡን ኣሕዋቱን ድማ መፁ፤ ኣብ ወፃኢ ደው ኢሎም ከዓ ኪፅውዕዎ ለኣኹ። ³²ብዙሕ ህዝቢ ኣብ ዙርያኡ ተቐሚጡ ነበረ፤ “እንሆ፥ ኣዴኻን ኣሕዋትካን ኣብ ወፃኢ ኾይኖም ንዓኻ ይደልዩ ኣለዉ” ድማ በልዎ።

³³ንሱ ኸዓ መሊሱ “ኣደይ መን እያ? ኣሕዋተይ መን እዮም?” በሎም። ³⁴ኣብ ዙርያኡ ናብቶም ተቐሚጦም ዘለዉ ጠሚቱ ኸዓ “እንሆ፥ ኣደይን ኣሕዋተይን! ³⁵ፍቓድ ኣቦና ዝገብር ዅሉ ንሱ ሓወይ፥ ሓብተይን ኣደይን እዩ” በለ።