Bisram din te jivon bhal kori dise

Jisu Bisram din te sukai juwa hath ekta bhal kori dise aru Pharisee khan Tai ke morabole uppai bonabole shuru korise. Tai baarajon ke basi loise. Niyom likha manuh khan koise Tai bhoot dhorise, aru Tar nijor ghor manuh khan koise Tar mathai biya hoise; Tai jowab dise, jun Amar Pitri laga itcha kore, wohi Tar ghor manuh ase.

Adhyay 3.

Aru ekbar Jisu prathana ghor te ghusise, aru ta te ekjon manuh jun laga hath sukhi juwa thakise. Tarkhan pora dhyan di kene saise, jodi tai Bisram din te etu manuh ke bhal kori dibo, titia Jisu ke dosh dibole.

Jisu pora hath sukhi juwa manuh ke koise, “Uthi kene age te ahhibi.” Titia tai tarkhan ke hudise, “Bisram din te bhal kaam kora, na biya kaam kora, jivon bachana, na morai diya — kun tu niyom te ase?” Kintu tarkhan chup-chap thakise. Tai khong pora tarkhan ke chari-phale saise, tarkhan laga mon tan juwa dekhi kene dukh paise, aru etu manuh ke koise, “Tumar hath mela dibi.” Tai hath mela dise, aru tar hath bhal hoi jaise.

Titia Pharisee khan bahar ulai jaise, aru joldi Herod laga manuh khan logot te, Jisu ke kineka morai dibo, etu salah korise.

Bhir khan Bhal Kori Diya Jon ke bisari ahhise

Jisu tar chella khan logot te samundar phale jaise; Galilee pora dangor bhir ekta tar pichete ahhise, aru Judea pora, Jerusalem pora, Idumea pora, Jordan nodi laga opar pora, aru Tyre aru Sidon usor laga jaga pora — tai ki ki kaam kori ase etu sob huni kene, dangor bhir ekta tar logot te ahhise. Tai tar chella khan ke koise, ekta chutu naw taiyar rakhibole, bhir karone, titia tarkhan pora tai ke chepa-chepi nakoribo. Kilemane tai bisi manuh ke bhal kori disile, etu karone bemar thaka sob manuh tai ke chubole age te chepa-chepi kori ahhise. Jitia letera atma khan tai ke dikhise, tarkhan tai laga age te giri jaise, aru hala kori koise, “Apuni Isor laga Putro ase!” Kintu tai tarkhan ke kara pora takid di koise, tai ke kun ase etu janai nadibole.

Baro jon ke basi loise

Jisu pahar uporte uthi jaise aru tai kunke lage taikhan ke matise; tarkhan tai logot te ahhise. Tai baro jon ke basi loise, aru taikhan ke apostle koi kene nam dise, titia tarkhan tai logot te thakibo aru tai taikhan ke prachar koribole pathai dibo, aru bhoot khan khedabole adhikar thakibo. Tai basi luwa baro jon eitu ase: Simon, jun ke tai Peter koi kene nam dise; Zebedee laga chokra James, aru tar bhai John, jun duijon ke tai Boanerges nam dise, jun laga ortho ase Bijili laga Chokra khan; Andrew, Philip, Bartholomew, Matthew, Thomas, Alphaeus laga chokra James, Thaddaeus, Zealot Simon, aru Judas Iscariot, jun pora tai ke thogai dise.

Giribo napara ekta rajyo

Tai ghor te jaise; bhir ekbar aru joma hoise, etu karone tai aru tar chella khan khana bhi khabole napari se. Jitia tar ghor manuh khan etu hunise, tarkhan tai ke dhori anibole bahar te jaise, kilemane tarkhan koise, “Tai pagol hoi jaise.” Jerusalem pora ahhi juwa niyom likhi diya manuh khan koise, “Tai logot te Beelzebul ase,” aru, “Bhoot khan laga raja pora tai bhoot khan ke khedai ase.”

Titia Jisu pora tarkhan ke matise aru dristanto pora koise: “Saitan pora Saitan ke kineka khedabo paribo? Jodi ekta rajyo nijor bhitor te bhag hoi jai, etu rajyo khara koribo napare. Aru jodi ekta ghor nijor bhitor te bhag hoi jai, etu ghor khara koribo naparibo. Aru jodi Saitan nijor birudh te uthi kene bhag hoi jai, tai khara koribo napare; tar khotom homoi ahhi jaise. Kun bhi ekjon takator manuh laga ghor te ghusi kene tar jinis loribo napare, jodi tai poila takator manuh ke nabandhe — titia he tai ghor lut koribo paribo.

Hosa kotha Moi tumikhan ke koi ase, manuh laga chokra khan ke sob paap aru Isor laga birudh te kowa biya kotha khan maph kori dibo, tarkhan ki koile bhi, kintu kun pora Pobitro Atma laga birudh te ninda koribo, tai kitia bhi maph napabo; tai ananta paap laga doshi ase,”

kilemane tarkhan koi thakise, “Tai logot te letera atma ase.”

Pitri laga poribar

Tar ama aru bhai khan ahhise, aru bahar te khara hoi kene, tai ke matibole khobor pathaise. Bhir ekta tai laga chari-phale bohi thakise aru tai ke koise, “Sabi, apuni laga ama aru apuni laga bhai khan bahar te ase, aru apuni ke bisari ase.”

Tai tarkhan ke jawab dise, “Moi laga ama aru moi laga bhai khan kun ase?” Tai laga chari-phale ghuri kene bohi thaka manuh khan ke sai kene, tai koise, “Sabi, eitu moi laga ama aru moi laga bhai khan ase! Kun pora amar Pitri laga itcha pura koribo, tai he moi laga bhai, aru bhoini, aru ama ase.”