Amar Pitri laga Rajyo logote Hunibole Kan Ase

Ekta naw pora sikhai kene, Jisu koise Amar Pitri laga rajya kineka ahhe: rasta, pathor, kata aru bhal mati te giri juwa bij, ekta saki, kheti kora manuh hui thaka homoi te bhi dhaan bari thaka, ekta sorioh bij. Aru Tar chella khan dubi jabo koi kene bhabi thaka ekta tufan ke Tai saant kori dise.

Adhyay 4.

Jisu aru samundar kinar te sikhai thakise. Tar usorte eneka dangor bhir joma hoise, titia Tar pani uporte thaka ekta naw te uthi kene bohise, aru pura bhir tu samundar kinar matite thakise. Tar pora dristanto khan pora tarkhan ke bisi kotha sikhai dise, aru Tar sikhai diya te tarkhan ke koise:

“Huni bi! Ekjon kheti kora manuh bijon phela bole bahar te jaise. Aru tar pora bijon phela somoite, kunba bijon rasta kinar te girise, aru chiriya khan ahhi kene eitu khai loise. Dusra bijon pathor thaka matite girise, jun jagate bisi mati nathaka, aru mati tu gaahir nathaka karone joldi uthi ahhise. Jitia suryo uthise, gach khan juli jaise, aru shikor nathaka karone, sukhi jaise. Dusra bijon kata khan majote girise, aru kata khan dangor hoi kene eitu ke chapai dise, aru eku dhaan ulua nai. Dusra bijon bhal matite girise, aru dhaan ulai kene, dangor hoi kene, phela bijon pora tis gun, sathi gun, ekso gun phol dise.” Aru Tar pora koise, “Kun manuh logote hunibole kan ase, tai huni lobi.”

Jitia Tar ekla thakise, Tar usorte thaka khan, baro jon logote, dristanto khan laga kotha Tar ke hudise.

Tar pora tarkhan ke koise, “Tumikhan ke amar Pitri laga rajyo laga lukai thaka kotha dise, kintu bahar te thaka khan ke, sob kotha dristanto pora ahe, eneka hobole ‘tarkhan sabo kintu nadekhibo, aru hunibo kintu nabujibo, aru ghuri nahibo aru maph napabo.’”

Tar pora tarkhan ke koise, “Tumikhan eitu dristanto nabuje? Tene hoile sob dristanto khan kineka bujibo? Kheti kora manuh pora kotha tu phela ase. Eitu khan rasta kinar te kotha phela khan ase: jitia tarkhan hune, Saitan joldi ahhi kene tarkhan bhitorte phela kotha tu loijai. Aru eitu khan pathor matite phela khan ase, jun kotha tu huni kene joldi khushi pora grohon kore. Kintu tarkhan nijor bhitorte shikor nai, khali olop somoi karone thake; jitia kotha laga karone dukh nahole digdar ahe, tarkhan joldi giri jai. Aru dusra khan kata majote phela khan ase. Eitu khan kotha tu huna khan ase, kintu etiya somoi laga chinta khan, dhun-sampoti laga thogai, aru dusra jinis khan laga itcha khan ahhi kene kotha tu ke chapai dei, aru eitu eku phol nadiye. Aru eitu khan bhal matite phela khan ase: tarkhan kotha tu hune, grohon kore, aru phol diye—tis gun, sathi gun, ekso gun.”

Puhor ke Jiliki bole Bonaise

Tar pora tarkhan ke koise, “Kunba manuh pora saaki ekta ani kene tukri nahole bisna nichete rakhe naki—saaki rakha jagate nohoi? Eku bhi lukai thaka nai, khali prokash hobole; eku bhi gupto thaka nai, khali bahar ahhibole. Jodi kunba logote hunibole kan ase, tai huni lobi.”

Tar pora tarkhan ke koise, “Tumikhan ki hune, eitu sa bi. Tumikhan ji naap pora naape, eitu pora tumikhan ke bhi naapi dibo—aru bisi milai dibo. Kilemane kun logote ase tai ke aru bisi dibo; kun logote nai, tai logote thaka eitu bhi loijabo.”

Bijon tu Nijor pora Dangor Hoi Jai

Tar pora koise, “Amar Pitri laga rajyo eneka ase: ekjon manuh pora matite bijon phela ase. Rati aru din, ghumai thakile nahole uthi thakile, bijon tu ulai kene dangor hoi jai, kintu tai kineka hoi najane. Mati tu nijor pora dhaan diye—prothom pat, titia pichete thoka, titia thoka bhitorte bhorta dhaan. Kintu jitia dhaan paki jai, tai joldi kasi pathai diye, kilemane kheti kata somoi ahhi jaise.”

Sorso Bijon

Tar pora koise, “Amar Pitri laga rajyo ke ki logote tulona koribo, nahole eitu nimite ki dristanto cholabo? Eitu sorso bijon nisina ase, jun to matite phela somoite sob bijon bhitorte sob to chuto ase. Kintu ekbar phela pichete, eitu dangor hoi kene bagan laga sob gach bhitorte sob to dangor hoi jai, aru eneka dangor dal ulai kene akas laga chiriya khan eitu laga chaya te ghor bona bole pare.”

Eneka bisi dristanto khan pora Tar pora tarkhan ke kotha koise, jineka tarkhan huni bole parise. Tar pora tarkhan ke khali dristanto pora koise, kintu lukai kene Tar nijor chella khan ke sob bujhai dise.

Jisu pora Toofan ke Thir Koridise

Hei dinte, jitia saanjh hoise, Tar pora tarkhan ke koise, “Ahh, amikhan dusra phale paar hoi jabo.”

Tarkhan bhir ke chari kene, Tar jineka thakise teneka, naw te Tar ke loi jaise, aru dusra naw khan bhi Tar logote ahhise. Ekta dangor andhi uthise. Dhou khan naw uporte lagi kene, naw tu pani pora bhorti hoi jaise. Kintu Jisu naw laga pichete ekta gilaf uporte ghumai thakise. Tarkhan Tar ke uthai kene koise, “Guruji, amikhan mori ase, Apuni iman chinta nai naki?”

Tar pora uthi kene, hawa ke dhomkai dise, aru samundar ke koise, “Chup! Thir hoi ja!” Titia hawa rukhi jaise, aru sob pura thanda hoi jaise. Tar pora tarkhan ke koise, “Tumikhan kile iman bhoi kore? Tumikhan logote etiya tak bhi biswas nai naki?”

Tarkhan bisi bhoi khaise aru ekjon-ekjon ke hudise, “Tene hoile Eitu kun ase, jun ke hawa aru samundar bhi kotha mane?”