Mark 4

4 ¹Jishuna shamadru ngayipheili latluida tamchitheiluishita. Mi kachungkhana ali puiruikhama, chiwui vang eina ana marikhong akhali kātonglaga tara̱tungli pama, kala yarui saikora shamadru ngayipheili ngaleili pama. ²Ana athumli apong tarākha chānjam eina tamchithei, kala awui tamchitheili athumli hānga:

³"Nganālu! Athā khayaoa akhana athā yaokhavai vai. ⁴Kala ana khayao eina, shongfapheili athā kaikhana tātunga, kala chi vānaobingna rāngamuizāhaowa. ⁵Athā kaikhana ngalei tarākha makhalei lunggui khaleipamli tāzangda, ngalei mathukwui vang thaklāk eina kharshoka. ⁶Zimik kashok eina alungbing chi zinghām kaprorda, angayung makhaleiwui vang ngahuihaowa. ⁷Ka̱shātbingwui ngachaili athā kaikhana tāzangda ka̱shātrongbing hakkasang eina shangthathaowa, athei matheithuwa. ⁸Kala athā kaikhana ngalei katumli tāzangda, kharshokta haksangda, athei thumrārā, hangtharuruk kala shāshā mathei." ⁹Kala ana hānga, "Shākhui khavai khanā kakā a china shākhuiranu."

¹⁰Ana kachiphun tharan, awui kuinam khalei mibing eina tharāda khani chili ngasoda, chānjambing chiwui pongli ali khangahāna.

¹¹Ana athumli hānga, "Nathumli ithumwui Avā wungramwui khangathuma chi mihaira, kha ayarli khaleibingwui vang saikora chānjam thada lei, ¹²chiwui vang eina 'athumna yanglala matheimara, kala shālala bhap matāmara, kala mangalanhaida athumli morei mapheomimara.'"

¹³Ana athumli hānga, "Nathumna chānjam hi bhap matāranglā? Chithākha kathada chānjam saikora chi bhap tārakhala? ¹⁴Athā khayaoa china Tui chi yaowa. ¹⁵Hibing chi Tui yaosang kahai shongfapheili khalei kathābingna; athumna shākhaleoda, Satanna ngalāngda rālaga athumli yaosang kahai Tui chi khuithuihaowa. ¹⁶Hibing chi ngalei makhalei lungguipamli yaokahai kathābingna, athumna Tui chi shākhaleoda hengsāda khamathān eina khuikasanga. ¹⁷Kha athumli angayung maleithuda, kasha̱khawui vang tangda leisāra; kakhanang kachot lah rekakharek Tui chiwui vang nilala kharā tharan, ngalāngda sana̱unghaowa. ¹⁸Kha khangatei kaikha chiya ka̱shātwui ngachaili yaosang kahaibingna; athum tui shākhui kahaibingna, ¹⁹kha okathui hiwui lumlao, lanwui leikashi kala kateibingwui ningkachāng china zangda tui chi shangthathaowa, kala atheila mamatheimana. ²⁰Kha hibing chi ngalei katumpamli yaosang kahaibingna; athumna tui chi shālaga khuikasanga, kala thumrārā, hangtharuruk kala shāshā atheila mathei."

Kahor Samphangkhavai

²¹Ana athumli hānga, "Mi akhana thaomei khuirālaga luk eina lah pet azingli khumkhavai maningmana? Meishongli sharkhavai maningmala? ²²Phongshok khavai maningla ngathumda leikahai khikha maleimana; kala mathingrik eina phongkhavai maningla ngathum kahai khikha maleimana. ²³Shākhui khavai khanā kakā a china shākhuiranu."

²⁴Ana athumli hānga, "Nathumna khisa shālaka nganākhuikazaklu. Nathumna tamsākhui chi tākam eina nathumlila tamkhuira, kala chungmeida ngarumsangmira. ²⁵Khikhalajila khaleia chili chungmeida mira; kha makhaleia chiwui eina ana khalei chila khuithuihaora."

Athā Khalatta Hakkasanga

²⁶Ana hānga, "Ithumwui Avā wungram hiya hithai: mi akhana ngaleili athā yaosang kahaina. ²⁷Ngashun ngayā, ana pihaisālala ngakarthuihaisālala, athā chi shonluida haksanga, kha kathada shokkahaina da ana matheimana. ²⁸Ngaleina khalattana atheila mathei; khare thingnā shoka, chiwui thili kui shoka, chiwui thili akuili mākei pemtinghai. ²⁹Kha athei matheiphok tharan, mahā rāhaira da ana ngalāngda chāngkui eina hātkhui."

Kayānghanthā Athā

³⁰Ana hānga, "Ithumwui Avā wungram hi ithumna khili ngaheosikhala, lah khikathā chānjam eina hāngchitheisikhala? ³¹Hiya kayānghanthā athā kathāna, ngaleili yaosang tharan athā saikorawui ngachaili teomeikapa. ³²Kha yaosang tharan, hi hakkasang eina khawobingwui ngachaili hakmeikap kaje ngasāra, kala aphāng kapang shokta yongkazata vānaobingna chiwui khaya̱li athip rākasā ngasāra."

³³Athumna shāser tākam eina chikathā chānjam kachungkha eina ana athumli tui hāngchithei. ³⁴Chānjam maningla ana athumli mahāngmana, kha ngathumsāda awui khalatta sākhangatha̱bingli saikora khalatmisera.

Jishuna Siphan Zingrot Chingngasaka

³⁵Chithang ngazin ana athumli hānga, "Ithum ngayi vāklaida kāusa."

³⁶Athumna yarui chi nothāhailaga, Jishu marikhongli leikahai thāda ali khuiphungda vai; kala marikhong khangateibingla ali ngasoda vai. ³⁷Siphan zingrot panglāk akha ungrāsai. Tara̱ khangaphao chi marikhongli shokta, marikhong chi aruichang ngaphumki jihaowa. ³⁸Kha Jishuva akhanukvāk khamkui sanglaga piphuphaira̱sai. Athumna ali amathotkhuilaga hānga, "Ojā, ithum shimānki jiu hi nana khikha maphaningmimaralā?"

³⁹Ana ngakarthuida, masi chili kharara, kala shamadru chili hānga, "Chingrihairanu! Kasainakha pamlu!" Masi chi maphanthuwa, kala kasaikha va̱rihaowa. ⁴⁰Ana athumli hānga, "Khisāda nathum hikathā ngacheehaokhala? Nathum aruila shitkasang makhaleiranglā?"

⁴¹Athumna ngacheenāhaida akha eina akha ngazek ngaroka, "Hi kachikathā mida, masinala shamadrula awui kahāng khanganākhala?"