Ũthamaki wa Ithe witũ Ũrĩ na Matũ ma Kũigua

Akĩrutanĩra gatarũinĩ, Jesũ akĩonania ũrĩa ũthamaki wa Ithe witũ ũũkaga: mbeũ ikĩgũa njĩrainĩ, ihigainĩ, mĩiguainĩ na tĩĩri mwega, tawa, ngano ĩkũraga mũrĩmi akomete, mbeũ ya haradali. Agĩcooka akĩhooreria kĩhuhũkanio kĩrĩa arutwo ake meehokaga nĩ gĩkũmarikia.

Gĩcunjĩ 4.

Naake Jesũ akĩambĩrĩria kũrutana rĩngĩ hakuhĩ na iria. Nakĩo kĩrĩndĩ kĩnene mũno gĩkĩũngana gĩkĩmũthiũrũrũkĩria, o nginya agĩtoonya gatarũinĩ karĩa kaarĩ maaĩinĩ agĩikara thĩ, nao andũ acio othe maarĩ hũgũrũrũinĩ cia iria thĩ nyũmũ. Nake akĩmaruta maũndũ maingĩ na ngerekano, na ũrutaniinĩ wake akĩmeera atĩrĩ:

“Thikĩrĩriai! Mũhaandi nĩoimagarire agĩthiĩ kũhaanda mbeũ. Na rĩrĩa aahaandaga, mbeũ imwe ikĩgũa njĩrainĩ, nacio nyoni igĩũka ikĩmĩrĩa. Mbeũ ingĩ ikĩgũa handũ ha mahiga, kũrĩa gũtaarĩ na tĩĩri mũingĩ, ikĩmera o rĩmwe tondũ tĩĩri ũcio ndwarĩ mũriku. Na rĩrĩa riũa rĩarire, mĩmera ĩyo ĩkĩhĩa, na tondũ ndĩarĩ na mĩri, ĩkĩhooha. Mbeũ ingĩ ikĩgũa mĩiguainĩ, nayo mĩigua ĩgĩkũra ĩkĩmĩhinyĩrĩria, nayo ndĩaciarire ngano. Mbeũ ingĩ ikĩgũa tĩĩriinĩ mwega, nayo ĩgĩciara ngano, ĩgĩthundũka, ĩgĩkũra, na ĩgĩciara maita mĩrongo ĩtatũ, maita mĩrongo ĩtandatũ, na maita igana rĩmwe ya kĩrĩa kĩahaandĩtwo.” Nake akiuga atĩrĩ, “Ũrĩa wothe ũrĩ na matũ ma kũigua, nĩakĩigue.”

Na rĩrĩa aarĩ wiki, andũ arĩa maarĩ nake hamwe na arĩa Ikũmi na Eerĩ, makĩmũũria ũhoro wa ngerekano icio.

Nake akĩmeera atĩrĩ, “Inyuĩ nĩmũheetwo kũmenya hitho ya ũthamaki wa Ithe witũ, no arĩa marĩ nja, maũndũ mothe mookaga na ngerekano, nĩguo ‘makĩrora no matikoona, na makĩigua no matikũmenya, matikagarũrũke marekerwo.’”

Nake akĩmeera atĩrĩ, “Inyuĩ mũtiramenya ngerekano ĩno? Mũgĩgaakĩmenya atĩa ngerekano ciothe? Mũhaandi ahaandaga kiugo. Nao aya nĩo arĩa marĩ njĩrainĩ kũrĩa kiugo kĩhaandagwo: maarĩkia kũigua, o rĩmwe Shaitani ookaga akoora kiugo kĩrĩa kĩhaandĩtwo thĩinĩ wao. Nao aya nĩo arĩa mahaandĩtwo handũ ha mahiga, arĩa maigua kiugo, o rĩmwe magakĩamũkĩra marĩ na gĩkeno. No matirĩ na mĩri thĩinĩ wao, magĩikaraga o kahinda kanini; na rĩrĩa thĩĩna kana kũnyariirwo gũgĩũka nĩ ũndũ wa kiugo kĩu, makagũa o rĩmwe. Nao angĩ nĩo arĩa mahaandĩtwo mĩiguainĩ. Aya nĩ arĩa maiguaga kiugo, no mĩhang'o ya mahinda maya, na kũheenio nĩ ũtonga, na merirĩria ma maũndũ mangĩ, igatoonya ikahinyĩrĩria kiugo, nakĩo gĩkaaga gũciara maciaro. Nao aya nĩo arĩa mahaandĩtwo tĩĩriinĩ mwega: nĩo maiguaga kiugo, makagĩkĩamũkĩra, na magaciara maciaro—maita mĩrongo ĩtatũ, maita mĩrongo ĩtandatũ, na maita igana rĩmwe.”

Ũtheri Nĩũigĩtwo Nĩguo Ũare

Nake akĩmeera atĩrĩ, “Hihi kũrĩ mũndũ ũrehaga tawa nĩguo aũige rungu rwa gĩkabũ kana rungu rwa ũrĩrĩ—no ti igũrũ rĩa gĩtĩ kĩa tawa? Gũtirĩ kĩndũ kĩhithe gĩtakaaguũrio; na gũtirĩ kĩndũ kĩrĩ hithoinĩ gĩtakooneka. Mũndũ o wothe angĩkorwo arĩ na matũ ma kũigua, nĩakĩigue.”

Nake akĩmeera atĩrĩ, “Mwĩmenyagĩrĩrei ũrĩa mũiguaga. Gĩthimi kĩrĩa mũthimaga nakĩo nĩkĩo mũgaathimĩrwo nakĩo—o na mũkoongererwo makĩria. Amu ũrĩa wothe ũrĩ na kĩndũ nĩakoongererwo; na ũrĩa ũtarĩ, o na kĩrĩa arĩ nakĩo nĩagaatuunywo.”

Mbeũ Ĩkũraga Yo Nyene

Nake akiuga atĩrĩ, “Ũthamaki wa Ithe witũ ũhaanaine ũũ: mũndũ ahuurĩire mbeũ thĩ. Naake ũtukũ na mũthenya, arĩ toro kana okĩte, mbeũ ĩgathundũka ĩgakũra, o na gũtuĩka ndooĩ ũrĩa gwĩkĩkaga. Tĩĩri ũciaraga maciaro wo nyene—mbere mũmera, gĩcooka gĩthũngũ, gĩcooka ngano ĩiyũrĩte thĩinĩ wa gĩthũngũ. No rĩrĩa ngano yagĩĩa, o rĩmwe atũmaga rũhiũ rwa kũgetha, tondũ magetha nĩmakinyu.”

Mbeũ ya Haradali

Nake akiuga atĩrĩ, “Ũthamaki wa Ithe witũ tũngĩũgerekania na kĩĩ, kana tũngĩũhũthĩra ngerekano ĩrĩkũ? Ũhaana ta mbeũ ya haradali, ĩrĩa nini mũno gũkĩra mbeũ ciothe rĩrĩa yahaandwo thĩ. No yaarĩkia kũhaandwo, ĩgakũra ĩgatuĩka nene gũkĩra mĩmera yothe ya mũgũnda, ĩkaruta honge nene mũno, nginya nyoni cia rĩerainĩ ciahota gwaka itara kĩĩrurũinĩ kĩayo.”

Na ngerekano nyingĩ ta icio, akĩmaarĩria kiugo, o ta ũrĩa mangĩahotire kũigua. Ndaamaarĩirie tiga na ngerekano; no rĩrĩa aarĩ oiki na arutwo ake mwene, akĩmataarĩria maũndũ mothe.

Jesũ Akĩhooreria Kĩhuhũkanio

Mũthenya ũcio, hwaĩinĩ wakinya, akĩmeera atĩrĩ, “Nĩtũringe mũrĩmo ũrĩa ũngĩ.”

Nao magĩtiga kĩrĩndĩ, makĩmũkuua o ũrĩa aarĩ thĩinĩ wa gatarũ, na tũtarũ tũngĩ tũkĩmũrũmĩrĩra. Nakĩo kĩhuhũkanio kĩnene kĩa rũhuho gĩgĩũka. Namo makũmbĩ ma maaĩ magĩtoonya gatarũ, o nginya kaambĩrĩirie kũiyũra maaĩ. No Jesũ aarĩ toro mũthiainĩ wa gatarũ, akomeire ngũũ. Nao makĩmũũkĩria, makĩmwĩra atĩrĩ, “Mũrutani, kaĩ ũtarũmbũyanĩtie atĩ nĩtũrathira?”

Nake agĩũkĩra, agĩkaania rũhuho, akĩĩra iria atĩrĩ, “Hoorera! Kira!” Naruo rũhuho rũgĩtiga, na gũgĩkira biũ. Nake akĩmeera atĩrĩ, “Nĩkĩĩ mwĩtigĩrĩte ũguo? Kaĩ mũtarĩ na wĩtĩkio o na rĩu?”

Nao magĩĩtigĩra mũno, makĩũrania ene atĩrĩ, “Kaĩ ũyũ akĩrĩ ũ, atĩ o na rũhuho na iria nĩimwathĩkagĩra?”