Marku 4

4 ¹Jesu tún bẹ̀rẹ̀ sí kọ́ni ní etí Òkun. Ọ̀pọ̀ ìjọ ènìyàn péjọ yí i ká tó bẹ́ẹ̀ gẹ́ẹ́ tí ó fi wọ inú ọkọ̀ ojú omi kan, ó sì jókòó, nígbà tí gbogbo ìjọ ènìyàn náà wà lórí ilẹ̀ ní etí Òkun. ²Ó kọ́ wọn ní ohun púpọ̀ ní ọ̀nà òwe, nínú ẹ̀kọ́ rẹ̀ ó sì wí fún wọn pé:

³“Ẹ gbọ́! Afúnrúgbìn kan jáde lọ láti fúnrúgbìn. ⁴Bí ó ti ń fúnrúgbìn, àwọn irúgbìn kan bọ́ sí ẹ̀gbẹ́ ọ̀nà, àwọn ẹyẹ sì wá jẹ wọ́n run. ⁵Àwọn irúgbìn mìíràn bọ́ sórí ilẹ̀ orí àpáta, níbi tí erùpẹ̀ kò ti pọ̀, wọ́n sì hù jáde lẹ́sẹ̀kẹsẹ̀ nítorí erùpẹ̀ kò jin. ⁶Nígbà tí oòrùn yọ, ó jó àwọn ewéko náà, nítorí tí wọn kò ní gbòǹgbò, wọ́n sì rọ. ⁷Àwọn irúgbìn mìíràn bọ́ sáàrin ẹ̀gún, àwọn ẹ̀gún sì dàgbà, wọ́n fún un pa, bẹ́ẹ̀ ni kò so èso. ⁸Àwọn irúgbìn mìíràn bọ́ sínú ilẹ̀ rere, ó sì so èso tí ó rú, tí ó dàgbà, tí ó sì so èso ní ọgbọ̀n ìlọ́po, ọgọ́ta ìlọ́po, àti ọgọ́rùn-ún ìlọ́po ju èyí tí a gbìn lọ.” ⁹Ó sì wí pé, “Ẹnikẹ́ni tí ó bá ní etí láti fi gbọ́rọ̀, kí ó gbọ́.”

¹⁰Nígbà tí ó dá wà, àwọn tí ó wà ní àyíká rẹ̀, pẹ̀lú àwọn Méjìlá, béèrè lọ́wọ́ rẹ̀ nípa àwọn òwe náà.

¹¹Ó wí fún wọn pé, “A fi àṣírí ìjọba Baba wa fún yín, ṣùgbọ́n fún àwọn tí ó wà lóde, ohun gbogbo ń wá ní ọ̀nà òwe, ¹²kí ó lè jẹ́ pé ‘wọ́n a máa wò ṣùgbọ́n wọn kì yóò ríran, wọ́n a máa gbọ́ ṣùgbọ́n wọn kì yóò ní òye, kí wọ́n má baà yí padà, kí a sì dárí jì wọ́n.’”

¹³Ó wí fún wọn pé, “Ẹ kò ní òye òwe yìí bí? Báwo ni ẹ ó ṣe ní òye gbogbo àwọn òwe náà? ¹⁴Afúnrúgbìn náà ń fúnrúgbìn ọ̀rọ̀ náà. ¹⁵Wọ̀nyí ni àwọn tí ó wà ní ẹ̀gbẹ́ ọ̀nà níbi tí a gbìn ọ̀rọ̀ sí: ní kété tí wọ́n bá gbọ́, Satani a wá lẹ́sẹ̀kẹsẹ̀, yóò sì gba ọ̀rọ̀ tí a gbìn sínú wọn kúrò. ¹⁶Bẹ́ẹ̀ gẹ́gẹ́ ni àwọn tí a gbìn sórí ilẹ̀ orí àpáta, àwọn tí ó gbọ́ ọ̀rọ̀ náà, tí wọ́n sì fi ayọ̀ gbà á lẹ́sẹ̀kẹsẹ̀. ¹⁷Ṣùgbọ́n wọn kò ní gbòǹgbò nínú ara wọn, wọ́n a dúró fún ìgbà díẹ̀ péré; nígbà tí wàhálà tàbí inúnibíni bá dé nítorí ọ̀rọ̀ náà, wọ́n a ṣubú kúrò lẹ́sẹ̀kẹsẹ̀. ¹⁸Àwọn mìíràn ni àwọn tí a gbìn sáàrin ẹ̀gún. Wọ̀nyí ni àwọn tí ó gbọ́ ọ̀rọ̀ náà, ¹⁹ṣùgbọ́n àwọn àníyàn ayé yìí, ẹ̀tàn ọrọ̀, àti ìfẹ́kúfẹ̀ẹ́ sí ohun mìíràn wọ inú wọn, wọ́n sì fún ọ̀rọ̀ náà pa, bẹ́ẹ̀ ni kò so èso. ²⁰Àwọn wọ̀nyí ni àwọn tí a gbìn sórí ilẹ̀ rere: wọ́n gbọ́ ọ̀rọ̀ náà, wọ́n gbà á, wọ́n sì so èso—ní ọgbọ̀n ìlọ́po, ọgọ́ta ìlọ́po, àti ọgọ́rùn-ún ìlọ́po.”

A Ṣe Ìmọ́lẹ̀ Kí Ó Lè Tàn

²¹Ó wí fún wọn pé, “Ǹjẹ́ ẹnikẹ́ni a mú fìtílà wá láti fi sábẹ́ agbọ̀n tàbí àkéte, dípò kí ó fi í sórí ọ̀pá fìtílà? ²²Kò sí ohun tí ó pamọ́ àfi kí a fi í hàn; kò sí ohun ìkọ̀kọ̀ àfi kí ó yọjú. ²³Bí ẹnikẹ́ni bá ní etí láti fi gbọ́rọ̀, kí ó gbọ́.”

²⁴Ó wí fún wọn pé, “Ẹ kíyè sí ohun tí ẹ ń gbọ́. Òṣùwọ̀n tí ẹ bá fi wọn ni a ó fi wọn fún yín—a ó sì fi kún un. ²⁵Nítorí ẹnikẹ́ni tí ó bá ní ni a ó fún sí i; ẹni tí kò ní, àní ohun tí ó ní ni a ó gbà lọ́wọ́ rẹ̀.”

Irúgbìn Ń Dàgbà Fúnra Rẹ̀

²⁶Ó wí pé, “Báyìí ni ìjọba Baba wa ṣe rí: ọkùnrin kan fún irúgbìn ká sórí ilẹ̀. ²⁷Ní òru àti ní ọ̀sán, yálà ó ń sùn tàbí ó jí, irúgbìn náà a rú, yóò sì dàgbà, bí ó tilẹ̀ jẹ́ pé òun kò mọ bí ó ti ń rí bẹ́ẹ̀. ²⁸Ilẹ̀ náà a so èso fúnra rẹ̀—koríko ni àkọ́kọ́, lẹ́yìn náà ni síírí, lẹ́yìn náà ni hóró kíkún nínú síírí náà. ²⁹Ṣùgbọ́n nígbà tí ọkà náà bá gbó, ó rán dòjé lẹ́sẹ̀kẹsẹ̀, nítorí ìkórè ti dé.”

Irúgbìn Músítádì

³⁰Ó wí pé, “Kí ni àwa ó fi ìjọba Baba wa wé, tàbí òwe wo ni àwa ó fi ṣàpẹẹrẹ rẹ̀? ³¹Ó dàbí irúgbìn músítádì, èyí tí ó kéré jù nínú gbogbo irúgbìn nígbà tí a bá gbìn ín sórí ilẹ̀. ³²Síbẹ̀, ní kété tí a bá gbìn ín, ó a dàgbà, yóò sì di èyí tí ó tóbi jù nínú gbogbo ewéko ọgbà, yóò sì yọ ẹ̀ka ńlá tó bẹ́ẹ̀ tí àwọn ẹyẹ ojú ọ̀run fi lè kọ́ ìtẹ́ sí abẹ́ òjìji rẹ̀.”

³³Pẹ̀lú ọ̀pọ̀ àwọn òwe báwọ̀nyí ni ó fi sọ ọ̀rọ̀ náà fún wọn, gẹ́gẹ́ bí wọ́n ti lè gbọ́. ³⁴Kò sọ̀rọ̀ fún wọn bí kò ṣe ní ọ̀nà òwe, ṣùgbọ́n ní ìkọ̀kọ̀ ó ṣàlàyé ohun gbogbo fún àwọn ọmọ-ẹ̀yìn rẹ̀.

Jesu Mú Ìjì Dákẹ́

³⁵Ní ọjọ́ náà, nígbà tí alẹ́ lẹ́, ó wí fún wọn pé, “Ẹ jẹ́ kí a rékọjá sí òdìkejì.”

³⁶Wọ́n fi ọ̀pọ̀ ènìyàn náà sílẹ̀, wọ́n sì mú un lọ pẹ̀lú wọn, gẹ́gẹ́ bí ó ti wà, nínú ọkọ̀ náà, àwọn ọkọ̀ mìíràn sì ń bá a lọ. ³⁷Ìjì líle kan sì dìde. Àwọn ìgbì omi ń ya lu ọkọ̀ náà, tó bẹ́ẹ̀ tí ọkọ̀ náà ti fẹ́rẹ̀ kún fún omi. ³⁸Ṣùgbọ́n Jesu ń sùn ní ìdí ọkọ̀ lórí ìrọ̀rí. Wọ́n jí i, wọ́n sì wí pé, “Olùkọ́, ṣé kò jẹ yín lógún pé àwa ń ṣègbé?”

³⁹Ó dìde, ó bá afẹ́fẹ́ náà wí, ó sì sọ fún Òkun pé, “Dákẹ́! Palẹ̀ jẹ́ẹ́!” Afẹ́fẹ́ náà sì dúró, ó sì dẹ́rọ̀ pátápátá. ⁴⁰Ó wí fún wọn pé, “Èéṣe tí ẹ̀rù fi ń bà yín tó bẹ́ẹ̀? Ṣé ẹ ṣì kò ní ìgbàgbọ́ síbẹ̀?”

⁴¹Ẹ̀rù sì bà wọ́n gidigidi, wọ́n sì ń bi ara wọn pé, “Ta ni èyí gan-an, tí àní afẹ́fẹ́ àti Òkun fi ń gbọ́ tirẹ̀?”