Kipfumu kya Tata Wetu Kyenina yi Matu ma Kuyuka
Mu kulonga tukidila mu mudimba, Yesu wuzimbudi bwosu Kipfumu kya Tata wetu kisi kwisa: kheni yisi bwa mu nzila, ha matadi, mu tsaku yi mu mafu ma bukheti, mwinda, bule bwisi kola buna musadi wa kilanga kenina leka, yi kheni yakhunda kuluta. Kunima wákandika pfunzi yangolu yina balonguki bandi bakala banza ni yabadibula.
4 1Yesu wáyandika hika longa ku khungu ya yanga. Mulumba-lumba wa batu wa lawu wákutakana kunzyungila yandi, hanga wákota mu mudimba hana mamba amana wázakala, amana mulumba-lumba wosu wa batu wákala ha mafu ku khungu ya yanga. 2Wábalonga mambu ma lawu mu bingana, amana muna malongi mandi wubazimbwadini:
3«Yukenu! Mukuni mosi wálubuka mu kukwenda kuna. 4Amana buna kakala mwanga kheni, ndambu yahika yenda bwila mu nzila, amana banuni bisa bisiya dya. 5Kheni yikwawu yábwila muma mwa matadi, muna mwakonda mafu ma lawu; amana yibufudi tswalu, mukuma mafu mákalaku ma lawu kuna tsi; 6Kaasi buna tangwa dyábala, miti myáyokama; amana kikuma myákalaku yi misodi, myáyumuka. 7Kheni yikwawu yenda bwila mu kati dya tsaku, amana tsaku záleya, zákakidisaya, konda kubuta keti kibundu. 8Kaasi kheni yikwawu yábwila mu mafu ma bukheti, yámena, yákola, amana yihe phi bibundu: yikwawu makumatatu, yikwawu makumasambanu, yikwawu khama, mu mana bákuni.» 9Amana wuzimbudini: «Wuna wenina yi matu ma kuyuka, kayuka!»
10Muna tangwa kákala yandi mosi, bana bákala kunzyungila yandi, hakimosi yi balonguki kumi na bodi, bámuyufula mu kikuma kya bingana.
11Amana wubazimbwadini: «Benu, luhánwa kitsweki kya Kipfumu kya Tata wetu, kaasi kwena bana ba ku mbazi, byosu bisi kwisa mu bingana, 12hanga ‹bisi tala kwawu kaasi bamonaku, amana bisi yuka kwawu kaasi bábakisaku, ndangu babwelukaku amana balolukwilwa.›»
13Amana wubazimbwadini: «Lubakisiku kingana kyaki? Buna abweti lubati bakisa bingana byosu? 14Mukuni wisi kuna Ndinga. 15Bawu benina bana ba mu nzila homa bamwanga Ndinga: buna bayuka, muna mbala mosi Satana wisa amana wubwotula Ndinga yina yákunwa mwena bawu. 16Bwabuna phi, bawu benina bana bamwanga muma mwa matadi: buna bayuka Ndinga, muna mbala mosi bisi tambula yawu yi kyesi, 17kaasi keku yi misodi mwena bawu meni, bisi zinga kaka mu tangwa dya khunda; amana yuka ni kiwayi holo munyanga wisa kikuma kya Ndinga, muna mbala mosi bisi bwa. 18Amana bana bakwawu benina bana bamwanga mu kati kya tsaku. Bawu benina bana bisi yuka Ndinga, 19kaasi kiwayi kya tsi yayi, yi luvunu lwa kimvwama, yi tsatu ya thinu bikwawu, bisi kota amana bisi kakidikisa Ndinga, hanga konda kubuta keti kibundu. 20Amana bawu benina bana bamwanga mu mafu ma bukheti: bisi yuka Ndinga, bisi tambula yawu, amana bisi buta bibundu — yikwawu makumatatu, yikwawu makumasambanu, yikwawu khama.»
Kyesesi Kyisi Lemisa Hanga Kyakenzula
21Amana wubazimbwadini: «Keti mutu wisi nata mwinda hanga kasya ku tsi ya nzungu ya tuma holo ku tsi ya thangi, kaasi ha muzanga? 22Mukuma kweku kima kyaswamana kyakonda tunguluka; kweku kitsweki kyakonda monika ha kitelengeni. 23Yuka ni mutu wenina yi matu ma kuyuka, kayuka!»
24Amana wubazimbwadini: «Kebenu mana lwisi yuka. Mu kitesu kina lwisi tesila, kyakina phi balútesila benu, amana bakúluyikila hika. 25Mukuma wuna wenina yi kima, bamúheka hika; kaasi wuna kakondi kima, keti kina kenina yandi, bakámbotula.»
Kheni Yisi Kola Yawu-Meni
26Amana wuzimbudini: «Kipfumu kya Tata wetu kifwanakani bwabu: mutu mosi wisi mwanga kheni ha mafu. 27Phipha yi muini, buna kaleka holo katokama, kheni yisi mena amana yisi kola, kaasi yandi kázayaku bwosu bwenina. 28Mafu masi buta bibundu mawu-meni: theti mwangu, kunima mutwa, amana kunima ngenza zilungidi mu mutwa. 29Kaasi tangwa bibundu bikodidini, muna mbala mosi wisi fidisa mbedi, mukuma tangwa dya kuhela dikwisi.»
Ngenza ya Tidi
30Amana wuzimbudini: «Yi biki pfwani tufwanikisa Kipfumu kya Tata wetu, holo yi kingana kyayi pfwani tusadila mu kikuma kyandi? 31Kifwanakani yi ngenza ya tidi, yina yiluti kukeya mu ngenza zoosu tangwa bamwanga yawu ha mafu. 32Kaasi tangwa bamwanga yawu, yisi kola amana yisi kituka miti wa mbuta kuluta mikhengedi myosu mina myakala mu kilanga, yisi buta mihandi mya lawu, hanga banuni ba ku zilu bisi lenda tunga mazamba ma bawu muna kinzundu kyandi.»
33Mu bingana bya lawu bya mutindu wawu, wábazimbwala Ndinga, bwosu balenda mu kuyuka. 34Kazónzaku kwena bawu kaasi mu bingana lwesi; kaasi mu kitsweki wábatendwala byosu kwena balonguki bandi meni.
Yesu Wisi Lembikisa Pfunzi
35Kilumbu kyakina, tangwa masika makwísa, wubazimbwadini: «Tulabukenu ku kyana kyahika.»
36Basisi mulumba-lumba wa batu, bámunata buna kákala, mu mudimba; amana midimba mikwawu myákala kulanda yandi. 37Kimbongila kya ngolu kitukudi. Makaka mabasa mudimba, hanga wekina yandika kukota mamba. 38Kaasi Yesu wánimba kuna manima ma mudimba, hana mulongu. Bámutokamisa amana bazimbudi: «Mulongi, kusiku mona kyadi kikuma tukuluki?»
39Wátokama, wákayaya pfunzi, amana wuzimbudini kwena yanga: «Lembama! Dibata!» Pfunzi yádibata, amana talala dya lawu dyávutuka. 40Amana wubazimbwadini: «Kikuma kya biki lwenina yi bweya bwa lawu? Buna lwenina yi lukwikilu ku?»
41Bweya bwa lawu bwábakwata, amana bazimbudi bawu yi bawu: «Nani buna kenina mutu wawu, wuna keti pfunzi yi yanga bisi mulemvukila?»
