ማርቆስ 4 FHB Father's Heart Bible™

4 ¹ኢየሱስ ድማ ኣብ ጥቓ ባሕሪ እንደገና ምምሃር ጀመረ። ኣብ ዙርያኡ ብዙሕ ህዝቢ ስለ ዝተኣከበ ድማ፥ ናብ ጃልባ ኣብ ልዕሊ ባሕሪ ኣትዩ ተቐመጠ፤ ኵሉ እቲ ህዝቢ ኸዓ ኣብ ጥቓ ባሕሪ ኣብ ምድሪ ነበረ። ²ብምስላታት ድማ ብዙሕ ነገር መሃሮም፤ ብትምህርቱ ኸዓ ከምዙይ በሎም፦

³“ስምዑ! እንሆ፥ ሓደ ዘራኢ ኽዘርእ ወፀ። ⁴ክዘርእ እንተሎ ድማ፥ ገለ ዘርኢ ኣብ ጥቓ መንገዲ ወደቐ፤ ኣዕዋፍ ከዓ መፂአን በልዓኦ። ⁵ገለ ድማ ብዙሕ ሓመድ ኣብ ዘይብሉ ኰረቷ ቦታ ወደቐ፤ ሓመድ ዓሚቝ ስለ ዘይነበረ ኸዓ ሽዑ ንሽዑ በቘለ። ⁶ፀሓይ ምስ ወፀት ግና፥ እቲ በቝሊ ነቐፀ፤ ሱር ስለ ዘይነበሮ ኸዓ ደረቐ። ⁷ገለ ድማ ኣብ መንጎ እሾዅ ወደቐ፤ እቲ እሾዅ ከዓ በቚሉ ሓነቖ፤ ፍረ ኸዓ ኣይሃበን። ⁸ገለ ድማ ኣብ ፅቡቕ ሓመድ ወደቐ፤ በቚሉ፥ ዓብዩ፥ ፍረ ሃበ፤ ሓደ ሰላሳ፥ ሓደ ስሳ፥ ሓደ ኸዓ ሚእቲ ዕፅፊ ፈረየ።” ⁹ከምዙይ ድማ በለ፦ “እዝኒ ዝሰምዕ ዘለዎ ይስማዕ።”

¹⁰በይኑ ምስ ኮነ ድማ፥ እቶም ኣብ ዙርያኡ ዝነበሩ ምስቶም ዓሰርተ ኽልተ ኾይኖም ብዛዕባ እቶም ምስላታት ሓተትዎ።

¹¹ንሱ ድማ ከምዙይ በሎም፦ “ንኣኻትኩም ምስጢር መንግስቲ ኣቦና ተውሂቡኩም ኣሎ፤ ንእቶም ኣብ ወፃኢ ዘለዉ ግና ኵሉ ነገር ብምስላታት እዩ ዝኸውን፤ ¹²ስለዙይ ‘እናረአዩ ኣየስተውዕሉን፥ እናሰምዑ ኸዓ ኣይርዱኡን፥ ተመሊሶም ድማ ይቕረ ኸይብሃለሎም’ ይኸውን።”

¹³ከምዙይ ድማ በሎም፦ “ነዝ ምስላ እዙይ ዘይትፈልጥዎ? እሞ ኸመይ ኢልኩም ነቶም ምስላታት ኵሎም ክትፈልጥዎም ኢኹም? ¹⁴እቲ ዘራኢ እቲ ቓል እዩ ዝዘርእ። ¹⁵እዚኣቶም ከዓ፥ እቲ ቓል ኣብ ጥቓ መንገዲ ዝተዘርአ እዮም፤ እንተ ሰምዕዎ፥ ሽዑ ንሽዑ ሰይጣን መፂኡ ነቲ ኣባታቶም ዝተዘርአ ቓል ይወስዶ። ¹⁶ከምኡ ድማ እቲ ኣብ ኰረቷ ቦታ ዝተዘርአ እዚኣቶም እዮም፤ ንሳቶም ነቲ ቓል ሰሚዖም ሽዑ ንሽዑ ብሓጐስ ይቕበልዎ፤ ¹⁷ኣባታቶም ግና ሱር የብሎምን እሞ ንቑሩብ ጊዜ ጥራሕ ይፀንሑ፤ ስለ እቲ ቓል መከራ ወይ ስደት ምስ መፀ ድማ ሽዑ ንሽዑ ይዓልዉ። ¹⁸ካልኦት ድማ እቶም ኣብ መንጎ እሾዅ ዝተዘርኡ እዮም፤ እዚኣቶም ነቲ ቓል ዝሰምዑ እዮም፤ ¹⁹ጓህይ እዛ ዓለም እዚኣን፥ ተንኰል ሃብትን፥ ትምኒት ካልእ ነገራትን ግና ኣትዮም ነቲ ቓል ይሓንቅዎ፤ ፍረ ዘይብሉ ድማ ይኸውን። ²⁰እዚኣቶም ከዓ፥ እቶም ኣብ ፅቡቕ ሓመድ ዝተዘርኡ እዮም፤ ንሳቶም ነቲ ቓል ሰሚዖም ይቕበልዎ፤ ፍረ ድማ ይህቡ፤ ሓደ ሰላሳ፥ ሓደ ስሳ፥ ሓደ ኸዓ ሚእቲ ዕፅፊ።”

ብርሃን ምእንቲ ኽበርህ እዩ ዝግበር

²¹ከምዙይ ድማ በሎም፦ “መብራህቲ ኣብ ቀዋሚ ቐንዲል ደኣ ይቕመጥ እምበር፥ ትሕቲ ኮፎሮ ወይ ኣብ ትሕቲ ዓራት ክቕመጥ መን መፂኡ የምፅእ? ²²ኵሉ ዝተኸወለ ኽግለፅ፥ ኵሉ ስዉር ከዓ ኽቅላዕ እዩ እምበር፥ ዘይግለፅ የለን። ²³እዝኒ ዝሰምዕ ዘለዎ ይስማዕ።”

²⁴ከምዙይ ድማ በሎም፦ “እትሰምዕዎ ተመልከቱ፤ በቲ እትዕቅኑሉ መዐቀኒ ኽዕቀነልኩም እዩ፤ ኽውሰኸልኩም ድማ እዩ። ²⁵እቲ ዘለዎ ኽውሰኸሉ እዩ እሞ፤ እቲ ዘይብሉ ግና፥ እቲ ዘለዎ እኳ ኽውሰደሉ እዩ።”

እቲ ዘርኢ ባዕሉ ይዓቢ

²⁶ከምዙይ ድማ በለ፦ “መንግስቲ ኣቦና ከምዙይ እያ፤ ሓደ ሰብ ኣብ ምድሪ ዘርኢ ይዘርእ፤ ²⁷ለይትን መዓልትን፥ ደቂሱ ኾነ ነቂሑ፥ እቲ ዘርኢ ይበቍልን ይዓብን፤ ንሱ ግና ከመይ ከም ዝዓቢ ኣይፈልጥን። ²⁸እታ ምድሪ ባዕላ ፍረ ተፍሪ፤ ቅድም ለምለም፥ ደሓር ጉምቦ፥ ደሓር ከዓ ዝፈረየ እኽሊ ኣብ ጉምቦ። ²⁹እቲ ፍረ ምስ በሰለ ግና፥ ጊዜ ዓፂድ መፂኡ እዩ እሞ፥ ሽዑ ንሽዑ ማዕፀድ ይሰድድ።”

ዘርኢ ኣድሪ

³⁰ከምዙይ ድማ በለ፦ “መንግስቲ ኣቦና ብምንታይ ክንመስላ ኢና? ወይ ብኣየናይ ምስላ ኽንገልፃ ኢና? ³¹ከም ዘርኢ ኣድሪ እያ፤ ንሱ ኣብ ምድሪ ኽዝራእ እንተሎ፥ ካብ ኵሉ ዘርኢ ዝንእስ እዩ፤ ³²ምስ ተዘርአ ግና ይዓቢ፤ ካብ ኵሉ ኣሕምልቲ ድማ ዝዓቢ ይኸውን፤ ኣዕዋፍ ሰማይ ኣብ ፅላሉ ኽሰፍራ ዝኽእሉ ዓበይቲ ጨናፍር ከዓ የውፅእ።”

³³ክሰምዑ ኸም ዝኽእሉ መጠን ድማ፥ ብብዙሕ ከምዙይ ዝበለ ምስላታት ነቲ ቓል ተዛረቦም። ³⁴ብዘይ ምስላ ድማ ኣይዛረቦምን ነበረ፤ ንደቀ መዛሙርቱ ግና በይኖም ኵሉ ይፈትሓሎም ነበረ።

ኢየሱስ ነቲ ህቦብላ የህድኦ

³⁵በታ መዓልቲ እቲኣ ድማ፥ ምስ መሰየ፥ “ናብታ ማዕዶ ንሰገር” በሎም።

³⁶ንሳቶም ከዓ ነቲ ህዝቢ ሓዲጎም፥ ከምቲ ዘለዎ ኣብ ጃልባ ወሰድዎ፤ ካልኦት ጃላቡ ኸዓ ምስኡ ነበራ። ³⁷ብርቱዕ ህቦብላ ንፋስ ድማ ተልዓለ፤ ማዕበል ከዓ ናብ ጃልባ ኣትዩ ነታ ጃልባ ኣብ ምምላእ በፅሐ። ³⁸ኢየሱስ ግና ኣብ ድሕሪት ጃልባ ኣብ ልዕሊ መተርኣስ ደቂሱ ነበረ፤ ንሳቶም ድማ ኣበራቢሮም “መምህር፥ ክንጠፍእ እንተለና ኣይግድሰካንዶ?” በልዎ።

³⁹ንሱ ድማ ተሲኡ ነቲ ንፋስ ገሰፆ፤ ነቲ ባሕሪ ኸዓ “ህዱእ! ፀጥ በል!” በሎ። እቲ ንፋስ ድማ ፀጥ በለ፤ ዓብዪ ህድኣት ከዓ ኮነ። ⁴⁰ከምዙይ ድማ በሎም፦ “ስለ ምንታይ ከምዙይ ትፈርሑ ኣለኹም? ክሳዕ ሕዚዶ እምነት የብልኩምን?”

⁴¹ብዙሕ ከዓ ፈርሑ፥ ንንሕድሕዶም ድማ “እዝ፥ ንፋስን ባሕርን እኳ ዝእዘዝዎ፥ መን ኮን ይኸውን?” ተበሃሃሉ።