آتامیزین پادشاهلیغینین اشئتمک اوچون قولاقلاری وار
بئر قاییقدان تعلئم وره‌رک، عئسا دانیشیر کی، آتامیزین پادشاهلیغی نجه گلئر: یولون کنارینا، داشا، تئکانلارا و یاخشی تورپاغا دوشن توخوم، بئر چیراق، اَکئنچی یاتارکن بؤیویَن تاخیل، بئر خردل توخومو. سونرا او، شاگئردلرئنئن یقئن ائله اونلاری بوغاجاغینی دوشوندوکلری بئر طوفانی ساکئتلَشدئرئر.
4 1عئسا گئنه دهنز کناریندا تعلئم وردی. اونون اطرافینا اله بؤیوک بئر جاماعات ییغیلدی کی، او، سویون اوستونده‌کی بئر قاییغا مئنئب اوتوردو، بوتون جاماعات ایسه دهنز کنارینداکی قورودا ائدی. 2او، مثل‌لرله اونلارا چوخ شیلر اؤیرَتدی و تعلئم ورنده اونلارا ددی:
3«قولاق آسین! بئر اَکئنچی توخوم اَکمَیه چیخدی. 4او اَکَنده، بعضی توخوملار یولون کنارینا دوشدو و قوشلار گلئب اونلاری یدئلر. 5باشقا توخوملار چوخلو تورپاغی اولمایان داشلی یره دوشدو و تورپاغین درئنلئیی اولمادیغی اوچون تِز بئتدی. 6گون چیخاندا، بئتکئلر یاندی و کؤکلری اولمادیغی اوچون قورودولار. 7باشقا توخوملار تئکانلارین آراسینا دوشدو و تئکانلار بؤیویوب اونو بوغدو و محصول ورمه‌دی. 8باشقا توخوملار دا یاخشی تورپاغا دوشدو؛ بئتئب بؤیودو و اَکئلَن توخومدان اوتوز، آلتمیش، یوز قات محصول وردی.» 9سونرا ددی: «اشئتمک اوچون قولاغی اولان هرکس، قوی اشئتسئن.»
10او تک اولاندا، اطرافینداکیلار اون‌ائکی ائله بئرلئکده مثل‌لر حاقّیندا اوندان سوروشدولار.
11اونلارا ددی: «آتامیزین پادشاهلیغینین سئرّی سئزه ورئلئب، آمّا اشئکده‌کی‌لره هر شی مثل‌لرله گلئر، 12بله کی، ”باخسینلار آمّا گؤرمه‌سئنلر، اشئتسئنلر آمّا باشا دوشمه‌سئنلر، و دؤنوب باغیشلانماسینلار.“»
13اونلارا ددی: «بو مثلی باشا دوشمورسونوز؟ بس بوتون مثل‌لری نجه باشا دوشه‌جکسئنئز؟ 14اَکئنچی کلامی اَکئر. 15بونلار یولون کنارینداکی‌لاردیر کی، کلام اورادا اَکئلئر: اشئدن کئمی، شیطان دَرحال گلئر و اونلاردا اَکئلَن کلامی آپاریر. 16بونلار دا داشلی یرده اَکئلَنلردئر کی، کلامی اشئدن کئمی اونو شادلیقلا قبول ادئرلر. 17آمّا اؤزلرئنده کؤکلری یوخدور، آنجاق آز بئر زامان داوام گتئرئرلر؛ کلام اوچون موصئبت یا دا عذاب گلنده، دَرحال ائماندان دؤنورلر. 18باشقالاری دا تئکانلارین آراسیندا اَکئلَنلردئر. بونلار کلامی اشئدنلردئر، 19آمّا بو دؤورون قایغیلاری، وار-دؤولَتئن حئیله‌سی و باشقا شیلره اولان هوسلر گئرئب کلامی بوغور و او، بار ورمئر. 20بونلار دا یاخشی تورپاقدا اَکئلَنلردئر: کلامی اشئدئب قبول ادئرلر و بار ورئرلر؛ اوتوز، آلتمیش، یوز قات.»
ائشیق ساچماق اوچوندور
21اونلارا ددی: «مگر کئمسه چیراغی گتئرئر کی، اونو قابین یا دا یاتاغین آلتینا قویسون، چیراقدانین اوستونه یوخ؟ 22هچ بئر گئزلی شی یوخدور کی، آشکار اولماسین؛ هچ بئر سئرّ یوخدور کی، اوزه چیخماسین. 23اشئتمک اوچون قولاغی اولان هرکس، قوی اشئتسئن.»
24اونلارا ددی: «اشئتدئیئنئز شیلره دئقّت ادئن. ائشلتدئیئنئز اؤلچو ائله سئزه اؤلچوله‌جک و اوستونه ده آرتیریلاجاق. 25چونکی کئمده وار، اونا داها چوخ ورئله‌جک؛ کئمده یوخ، اوندا اولان دا الئندن آلیناجاق.»
توخوم اؤز-اؤزونه بؤیویور
26ددی: «آتامیزین پادشاهلیغی بونا بَنزه‌یئر: بئر آدام تورپاغا توخوم سَپئر. 27گجه-گوندوز، یاتسا دا، اویاق اولسا دا، توخوم بئتئب بؤیوک اولور، آمّا او نجه اولدوغونو بئلمئر. 28تورپاق اؤز-اؤزونه محصول ورئر؛ اَوّل جوجَرتی، سونرا سونبول، سونرا سونبولده‌کی دولو دَن. 29آمّا محصول یتئشنده، دَرحال اوراغی وورور، چونکی بئچئن واختی گلئب.»
خردل توخومو
30ددی: «آتامیزین پادشاهلیغینی نَیه بَنزه‌ده‌لئم، یا دا اونون اوچون نه مثل ائشلده‌لئم؟ 31او، خردل توخومونا بَنزه‌یئر کی، تورپاغا اَکئلنده بوتون توخوملارین لاپ کئچئیی‌دئر. 32آمّا اَکئلَن کئمی، بؤیویوب بوتون باغ بئتکئلرئنئن لاپ بؤیوکو اولور و بوداقلاری اله بؤیوک اولور کی، هاوانین قوشلاری اونون کؤلگه‌سئنده یووا قورا بئلرلر.»
33بله چوخلو مثل‌لرله کلامی اونلارا دانیشدی، نجه کی اشئده بئلئردئلر. 34اونلارا آنجاق مثل‌لرله دانیشیردی، آمّا تکلئکده اؤز شاگئردلرئنه هر شی ائضاح ادئردی.
عئسا طوفانی ساکئت ادئر
35او گون، آخشام دوشَنده، اونلارا ددی: «گلئن او بئری ساحئله کِچک.»
36اونلار جاماعاتی بوراخیب عئسانی اولدوغو کئمی قاییقدا اؤزلری ائله آپاردیلار، باشقا قاییقلار دا اونونلا ائدی. 37شئدّتلی بئر کولک طوفانی قالخدی. شپه‌لر قاییغین اوستونه ووردو، اله کی، قاییق آرتیق سو ائله دولوردو. 38آمّا عئسا قاییغین دالیندا یاستیغین اوستونده یاتمیشدی. اونو اویاتدیلار و ددئلر: «اوستاد، بئزئم اؤلدویوموزه اعتئنا اتمئرسن؟»
39او دوروب، کوله‌یه آجیقلانیب، دهنزه ددی: «ساکئت اول! سَس‌سئز اول!» کولک کَسئلدی و هر یَر لاپ ساکئتلَشدی. 40اونلارا ددی: «نئیه بله قورخورسونوز؟ حله ائمانینیز یوخدور؟»
41اونلار چوخ قورخوب بئربئرئندن سوروشدولار: «بس بو کئمدئر کی، حتّا کولک و دهنز ده اونا ائطاعت ادئر؟»
