Mako 3 FHB Father's Heart Bible™

3 ¹Jesu akapindazve musinagogi, uye paiva nomurume aiva noruoko rwakawonyana. ²Vakatarisisa kuti vaone kana aizoporesa murume uyu paSabata, kuti vapomere Jesu mhosva.

³Jesu akati kumurume aiva noruoko rwakawonyana, “Simuka uuye pakati pano.” ⁴Ipapo akavabvunza achiti, “Zvinotenderwa here paSabata kuita zvakanaka kana kuita zvakaipa, kuponesa upenyu kana kuuraya?” Asi vakaramba vakanyarara. ⁵Akavaringa-ringa nehasha, achishungurudzwa noukukutu hwemwoyo yavo, akati kumurume, “Tambanudza ruoko rwako.” Akarutambanudza, uye ruoko rwake rukaporeswa.

⁶Ipapo vaFarisi vakabuda, pakarepo vakatanga kurangana navaHerodhi kuti vangamuparadza sei.

Vazhinji Vanotevera Muporesi

⁷Jesu akaenda navadzidzi vake kugungwa; vanhu vazhinji vaibva kuGarirea vakamutevera, uyewo vaibva kuJudhea, ⁸vaibva kuJerusarema, kuIdhumea, mhiri kwaJorodhani, nedunhu rakapoteredza Tire neSidhoni—vakati vanzwa zvose zvaaiita, boka guru revanhu rakauya kwaari. ⁹Akaudza vadzidzi vake kuti vagadzirire igwa diki, nokuda kweboka revanhu, kuti varege kumutsikirira. ¹⁰Nokuti akanga aporesa vazhinji zvokuti vose vairwara vaisundidzana kuti vamubate. ¹¹Pose payaimuona mweya yakaipa, yaiwira pasi pamberi pake, ichidanidzira ichiti, “Ndimi Mwanakomana waMwari!” ¹²Asi akaiyambira zvikuru kuti irege kumuzivisa.

Vane Gumi Navaviri Vanogadzwa

¹³Jesu akakwira mugomo akadana vaaida; vakauya kwaari. ¹⁴Akagadza vane gumi navaviri, akavatumidza kuti vapostori, kuti vave naye uye kuti avatume kundoparidza, ¹⁵uye kuti vave nesimba rokudzinga madhimoni. ¹⁶Ava ndivo vane gumi navaviri vaakagadza: Simoni, waakatumidza zita rokuti Petro; ¹⁷Jakobho mwanakomana waZebhedhi, naJohani mununʼuna wake, avo vaakatumidza kuti Bhoanegesi, zvinoreva kuti Vanakomana veKutinhira; ¹⁸Andiriya, Firipi, Bhatoromeo, Mateo, Tomasi, Jakobho mwanakomana waArifiyo, Tadheo, Simoni muZiloti, ¹⁹naJudhasi Isikarioti, uyo akamutengesa.

Umambo Husingagoni Kuwa

²⁰Akaenda kumba; boka revanhu rakaunganazve, zvokuti iye navadzidzi vake vakatadza kunyange kudya. ²¹Hama dzake dzakati dzanzwa, dzakabuda kuti dzimubate, nokuti vaiti, “Apenga.” ²²Vanyori vakaburuka vachibva kuJerusarema vakati, “Ana Bheerizebhubhi,” uye, “Anodzinga madhimoni nesimba romuchinda wemadhimoni.”

²³Saka Jesu akavadanira kwaari akataura kwavari nemifananidzo achiti, “Satani angadzinga sei Satani? ²⁴Kana umambo hukazvipesanisa, umambo ihwohwo hahugoni kumira. ²⁵Uye kana imba ikazvipesanisa, imba iyoyo haigoni kumira. ²⁶Uye kana Satani akazvipikisa akazvipesanisa, haagoni kumira; kuguma kwake kwasvika. ²⁷Hapana munhu angapinda mumba momunhu ane simba akatora nhumbi dzake asina kutanga asunga munhu ane simba iyeye—ipapo ndipo paangapamba imba yake.

²⁸Ndinokuudzai chokwadi, zvivi zvose nokutuka kwose kunorwisa Mwari zvicharegererwa vana vavanhu, chimwe nechimwe chavanotaura, ²⁹asi ani naani anomhura Mweya Mutsvene haazombowani kuregererwa; ane mhosva yechivi chisingaperi,”

³⁰nokuti vakanga vachiti, “Ane mweya wakaipa.”

Mhuri yaBaba vedu

³¹Mai vake navanunʼuna vake vakasvika, vamire panze, vakatuma shoko kwaari, vachimudana. ³²Boka revanhu rakanga rakagara rakamukomberedza, rikati kwaari, “Tarirai, mai venyu navanunʼuna venyu vari panze, vari kukutsvakai.”

³³Akavapindura achiti, “Mai vangu navanunʼuna vangu ndivanaani?” ³⁴Akatarisa vaya vakanga vakagara vakamukomberedza, akati, “Ava ndivo mai vangu navanunʼuna vangu! ³⁵Ani naani anoita kuda kwaBaba vedu ndiye mununʼuna wangu nehanzvadzi yangu namai vangu.”