மாற்கு 1

1 ¹எங்கள் பிதாவின் குமாரனாகிய இயேசு கிறிஸ்துவினுடைய சுவிசேஷத்தின் ஆரம்பம். ^a a v1 சில பூர்வ பிரதிகளில் “எங்கள் பிதாவின் குமாரன்” என்பது காணப்படவில்லை. ²ஏசாயா தீர்க்கதரிசியின் புத்தகத்தில் எழுதியிருக்கிறபடி: “இதோ, உனக்கு முன்பாக நான் என் தூதனை அனுப்புகிறேன்; அவன் உன் வழியை ஆயத்தப்படுத்துவான். ³வனாந்தரத்திலே கூப்பிடுகிற ஒருவனுடைய சத்தம்: ‘கர்த்தருக்கு வழியை ஆயத்தப்படுத்துங்கள், அவருடைய பாதைகளைச் செவ்வைபண்ணுங்கள்.’”

⁴யோவான் வனாந்தரத்திலே ஞானஸ்நானங்கொடுத்து, பாவமன்னிப்புக்கென்று மனந்திரும்புதலின் ஞானஸ்நானத்தைப் பிரசங்கித்துக்கொண்டு வந்தான். ⁵யூதேயா தேசத்தார் அனைவரும், எருசலேம் நகரத்தார் யாவரும் அவனிடத்தில் போய், தங்கள் பாவங்களை அறிக்கையிட்டு, யோர்தான் நதியிலே அவனால் ஞானஸ்நானம் பெற்றார்கள். ⁶யோவான் ஒட்டகமயிர் உடையை அணிந்து, தன் அரையிலே தோல்கச்சையைக் கட்டிக்கொண்டு, வெட்டுக்கிளியையும் காட்டுத்தேனையும் புசித்து வந்தான். ⁷அவன் அறிவித்ததாவது: “என்னிலும் வல்லவர் ஒருவர் எனக்குப் பின்னாக வருகிறார்; நான் குனிந்து அவருடைய பாதரட்சையின் வாரை அவிழ்க்கிறதற்கும் பாத்திரன் அல்ல. ⁸நான் உங்களுக்கு ஜலத்தினாலே ஞானஸ்நானம் கொடுத்தேன்; அவரோ உங்களுக்குப் பரிசுத்த ஆவியானவரினாலே ஞானஸ்நானம் கொடுப்பார்.”

பிதாவானவர் தம்முடைய குமாரனைக் குறித்துப் பேசுகிறார்

⁹அந்நாட்களிலே இயேசு கலிலேயாவிலுள்ள நாசரேத்தூரிலிருந்து வந்து, யோர்தானிலே யோவானால் ஞானஸ்நானம் பெற்றார். ¹⁰அவர் ஜலத்திலிருந்து கரையேறினவுடனே, வானங்கள் திறக்கப்படுவதையும், பரிசுத்த ஆவியானவர் புறாவைப்போல் தம்மேல் இறங்குகிறதையும் கண்டார்.

¹¹அப்பொழுது: “நீர் என்னுடைய நேசகுமாரன், உம்மில் பிரியமாயிருக்கிறேன்” என்று வானத்திலிருந்து ஒரு சத்தம் உண்டாயிற்று.

¹²உடனே பரிசுத்த ஆவியானவர் அவரை வனாந்தரத்திற்குள் தள்ளிவிட்டார். ¹³அவர் வனாந்தரத்திலே நாற்பது நாள் இருந்து, சாத்தானால் சோதிக்கப்பட்டார்; அங்கே காட்டுமிருகங்களோடு இருந்தார், தூதர்கள் அவருக்குப் பணிவிடை செய்தார்கள்.

¹⁴யோவான் காவலில் வைக்கப்பட்டபின்பு, இயேசு கலிலேயாவுக்கு வந்து, எங்கள் பிதாவின் சுவிசேஷத்தைப் பிரசங்கித்து:

¹⁵“காலம் நிறைவேறிற்று, எங்கள் பிதாவின் ராஜ்யம் சமீபமாயிருக்கிறது; மனந்திரும்பி நற்செய்தியை விசுவாசியுங்கள்” என்றார்.

இயேசு தம்முடைய முதல் சீஷர்களை அழைக்கிறார்

¹⁶இயேசு கலிலேயாக் கடலோரமாய் நடந்துபோகையில், மீன்பிடிக்கிறவர்களாயிருந்த சீமோனும் அவன் சகோதரனாகிய அந்திரேயாவும் கடலிலே வலைபோடுகிறதைக் கண்டார்.

¹⁷இயேசு அவர்களை நோக்கி: “என் பின்னே வாருங்கள், உங்களை மனுஷரைப் பிடிக்கிறவர்களாக்குவேன்” என்றார்.

¹⁸உடனே அவர்கள் தங்கள் வலைகளை விட்டு, அவருக்குப் பின்சென்றார்கள்.

¹⁹அவர் சற்று அப்புறம் போனபோது, செபெதேயுவின் குமாரனாகிய யாக்கோபும் அவன் சகோதரனாகிய யோவானும் படகிலே வலைகளைப் பழுதுபார்த்துக்கொண்டிருக்கிறதைக் கண்டார். ²⁰உடனே அவர் அவர்களை அழைத்தார்; அவர்கள் தங்கள் தகப்பனாகிய செபெதேயுவைக் கூலிக்காரரோடு படகிலே விட்டு, அவருக்குப் பின்சென்றார்கள்.

இருளின்மேல் அதிகாரம்

²¹அவர்கள் கப்பர்நகூமுக்குப் போனார்கள். உடனே, ஓய்வுநாளிலே அவர் ஜெபஆலயத்தில் பிரவேசித்து உபதேசம்பண்ணத் தொடங்கினார். ²²அவருடைய உபதேசத்தைக்குறித்து அவர்கள் ஆச்சரியப்பட்டார்கள்; ஏனெனில் அவர் வேதபாரகரைப்போலல்ல, அதிகாரமுடையவராகவே அவர்களுக்கு உபதேசம்பண்ணினார். ²³அவர்களுடைய ஜெபஆலயத்திலே அசுத்த ஆவி பிடித்திருந்த ஒரு மனுஷன் உடனே கூக்குரலிட்டு: ²⁴“நசரேயனாகிய இயேசுவே, எங்களோடு உமக்கென்ன? எங்களை அழிக்கவா வந்தீர்? நீர் யார் என்று அறிவேன்; நீர் தேவனுடைய பரிசுத்தர்!” என்றான்.

²⁵அதற்கு இயேசு: “நீ பேசாமல் இவனைவிட்டுப் புறப்பட்டுப்போ!” என்று அதை அதட்டினார்.

²⁶அப்பொழுது அந்த அசுத்த ஆவி அவனை அலைக்கழித்து, மகா சத்தமிட்டுக் கூப்பிட்டு, அவனைவிட்டுப் புறப்பட்டது. ²⁷எல்லாரும் ஆச்சரியப்பட்டு: “இது என்ன? இது அதிகாரமுள்ள புதிய உபதேசமே; இவர் அசுத்த ஆவிகளுக்குங்கூடக் கட்டளையிடுகிறார், அவைகளும் இவருக்குக் கீழ்ப்படிகிறதே!” என்று ஒருவரோடொருவர் கேட்டுக்கொண்டார்கள். ²⁸உடனே அவருடைய கீர்த்தி கலிலேயாவைச் சுற்றியிருந்த திசைகளெங்கும் எங்கும் பரவிற்று.

சீமோனுடைய வீட்டிற்குச் சுகம் வருகிறது

²⁹அவர்கள் ஜெபஆலயத்தைவிட்டு வெளியே வந்தவுடனே, யாக்கோபோடும் யோவானோடுங்கூட சீமோன் அந்திரேயா என்பவர்களுடைய வீட்டிற்குப் போனார்கள். ³⁰சீமோனுடைய மாமி ஜுரமாய்க் கிடந்தாள்; உடனே அவர்கள் அவளைக்குறித்து அவருக்குச் சொன்னார்கள். ³¹அவர் அருகில் வந்து, அவளுடைய கையைப் பிடித்து, அவளைத் தூக்கிவிட்டார்; உடனே ஜுரம் அவளைவிட்டு நீங்கிற்று, அவள் அவர்களுக்குப் பணிவிடை செய்தாள்.

³²சாயங்காலமாகிச் சூரியன் அஸ்தமித்தபோது, வியாதிக்காரர் அனைவரையும், பிசாசு பிடித்தவர்களையும் அவரிடத்தில் கொண்டுவந்தார்கள். ³³ஊரார் அனைவரும் வாசற்படியிலே கூடிவந்தார்கள். ³⁴பலவித வியாதிகளால் வருந்திய அநேகரை அவர் சொஸ்தமாக்கி, அநேகம் பிசாசுகளையும் துரத்தினார்; பிசாசுகள் அவரை அறிந்திருந்தபடியால், அவைகள் பேசுகிறதற்கு அவர் இடங்கொடுக்கவில்லை.

இயேசு ஜெபிக்கத் தனிமையாகச் செல்கிறார்

³⁵அதிகாலையில், இருட்டோடே அவர் எழுந்து புறப்பட்டு, வனாந்தரமான ஒரு இடத்திற்குப் போய், அங்கே ஜெபம்பண்ணினார். ³⁶சீமோனும் அவனோடிருந்தவர்களும் அவரைத் தேடிச்சென்று, ³⁷அவரைக் கண்டபோது: “எல்லாரும் உம்மைத் தேடுகிறார்கள்” என்று அவரிடத்தில் சொன்னார்கள்.

³⁸அவர்: “அடுத்த ஊர்களிலும் நான் பிரசங்கம்பண்ணும்படி வேறே இடங்களுக்குப் போவோம், அதற்காகவே நான் வந்தேன்” என்றார்.

³⁹அப்படியே அவர் கலிலேயா முழுவதிலும் அவர்களுடைய ஜெபஆலயங்களில் பிரசங்கம்பண்ணி, பிசாசுகளைத் துரத்திக்கொண்டு போனார்.

குஷ்டரோகி சுத்தமாக்கப்படுகிறான்

⁴⁰அப்பொழுது குஷ்டரோகி ஒருவன் அவரிடத்தில் வந்து, முழங்கால்படியிட்டு: “உமக்குச் சித்தமானால், என்னைச் சுத்தமாக்க உம்மால் கூடும்” என்று அவரை வேண்டிக்கொண்டான்.

⁴¹இயேசு மிகுந்த மனதுருக்கமடைந்து, தம்முடைய கையை நீட்டி, அவனைத் தொட்டு: “எனக்குச் சித்தமுண்டு, சுத்தமாகு” என்றார்.

⁴²இப்படி அவர் சொன்னவுடனே குஷ்டரோகம் அவனைவிட்டு நீங்கிற்று, அவன் சுத்தமானான். ⁴³அவர் அவனைக் கண்டிப்பாய் எச்சரித்து, உடனே அவனை அனுப்பிவிட்டு:

⁴⁴“நீ இதை ஒருவருக்கும் சொல்லாதபடி எச்சரிக்கையாயிரு; ஆனாலும் போய், உன்னை ஆசாரியனுக்குக் காண்பித்து, உன் சுத்தமாகுதலைக்குறித்து மோசே கட்டளையிட்டவைகளை மக்களுக்குச் சாட்சியாகச் செலுத்து” என்றார்.

⁴⁵அவனோ புறப்பட்டுப்போய், அதை மிகுதியாய்ப் பிரசித்தப்படுத்தி, செய்தியைப் பரப்பினான்; அதினால் இயேசு வெளியரங்கமாய் ஊருக்குள் பிரவேசிக்கக்கூடாதபடியிருந்தது; வெளியே தனித்த இடங்களில் தங்கியிருந்தார். ஆயினும் எங்கும் இருந்து ஜனங்கள் அவரிடத்தில் வந்தார்கள்.