ಲಾಬಾನನ ಮನೆಯಲ್ಲಿ ಅಸಮಾಧಾನ

ಲಾಬಾನನ ಮಕ್ಕಳು ಅವನ ಮೇಲೆ ಅಸಮಾಧಾನಗೊಳ್ಳುತ್ತಾರೆ, ಲಾಬಾನನ ಮುಖಭಾವ ಬದಲಾಗಿದೆ; ಆದ್ದರಿಂದ ನಮ್ಮ ತಂದೆಯ ಮಾತಿನಂತೆ ಯಾಕೋಬನು ಹೇಳದೆ ಕೇಳದೆ ಹೊರಟುಹೋಗುತ್ತಾನೆ — ರಾಹೇಲಳು ತನ್ನ ತಂದೆಯ ಮನೆದೇವತೆಗಳನ್ನು ಕದ್ದುಕೊಳ್ಳುತ್ತಾಳೆ. ಲಾಬಾನನು ಅವರನ್ನು ಹಿಡಿದು, ಹುಡುಕುತ್ತಾನೆ, ಏನೂ ಸಿಗುವುದಿಲ್ಲ. ಕಲ್ಲುಗಳ ಒಂದು ಕುಪ್ಪೆಯನ್ನು ಮೇರೆಯಾಗಿಟ್ಟು ಅವರು ಬೇರ್ಪಡುತ್ತಾರೆ.

ಅಧ್ಯಾಯ 31.

“ನಮ್ಮ ತಂದೆಗಿದ್ದ ಎಲ್ಲವನ್ನೂ ಯಾಕೋಬನು ತೆಗೆದುಕೊಂಡಿದ್ದಾನೆ; ನಮ್ಮ ತಂದೆಯದಾಗಿದ್ದ ಆಸ್ತಿಯಿಂದಲೇ ಅವನು ಈ ಸಂಪತ್ತನ್ನೆಲ್ಲಾ ಸಂಪಾದಿಸಿದ್ದಾನೆ” ಎಂದು ಲಾಬಾನನ ಮಕ್ಕಳು ಹೇಳಿಕೊಳ್ಳುವುದನ್ನು ಯಾಕೋಬನು ಕೇಳಿದನು. ಇದಲ್ಲದೆ ಯಾಕೋಬನು ಲಾಬಾನನ ಮುಖವನ್ನು ನೋಡಿದಾಗ, ಅದು ಮೊದಲಿನಂತೆ ತನ್ನ ಕಡೆಗೆ ಇರಲಿಲ್ಲ.

ಆಗ ನಮ್ಮ ತಂದೆ ಯಾಕೋಬನಿಗೆ, “ನಿನ್ನ ಪಿತೃಗಳ ದೇಶಕ್ಕೂ ಬಂಧುಗಳ ಬಳಿಗೂ ಹಿಂದಿರುಗು; ನಾನು ನಿನ್ನ ಸಂಗಡ ಇರುವೆನು” ಎಂದರು.

ಆದ್ದರಿಂದ ಯಾಕೋಬನು ಹೇಳಿಕಳುಹಿಸಿ, ಹೊಲದಲ್ಲಿದ್ದ ತನ್ನ ಮಂದೆಯ ಬಳಿಗೆ ರಾಹೇಲಳನ್ನೂ ಲೇಯಳನ್ನೂ ಕರೆಸಿದನು. ಅವನು ಅವರಿಗೆ, “ನಿಮ್ಮ ತಂದೆಯ ಮುಖವು ಮೊದಲಿನಂತೆ ನನ್ನ ಕಡೆಗೆ ಇಲ್ಲವೆಂದು ನಾನು ನೋಡುತ್ತೇನೆ; ಆದರೆ ನನ್ನ ತಂದೆಯ ದೇವರು ನನ್ನ ಸಂಗಡ ಇದ್ದರು. ನಾನು ನನ್ನ ಪೂರ್ಣ ಶಕ್ತಿಯಿಂದ ನಿಮ್ಮ ತಂದೆಗೆ ಸೇವೆಮಾಡಿದ್ದೇನೆಂದು ನಿಮಗೆ ಗೊತ್ತಿದೆ. ನಿಮ್ಮ ತಂದೆ ನನ್ನನ್ನು ಮೋಸಗೊಳಿಸಿ ನನ್ನ ಸಂಬಳವನ್ನು ಹತ್ತು ಸಾರಿ ಬದಲಾಯಿಸಿದನು; ಆದರೆ ಅವನು ನನಗೆ ಕೇಡುಮಾಡಲು ನಮ್ಮ ತಂದೆ ಬಿಡಲಿಲ್ಲ. ಅವನು, ‘ಚುಕ್ಕೆಚುಕ್ಕೆಯವುಗಳೇ ನಿನ್ನ ಸಂಬಳ’ ಎಂದರೆ, ಮಂದೆಯೆಲ್ಲಾ ಚುಕ್ಕೆಚುಕ್ಕೆಯ ಮರಿಗಳನ್ನು ಈಯಿತು; ‘ರೇಖೆರೇಖೆಯವುಗಳೇ ನಿನ್ನ ಸಂಬಳ’ ಎಂದರೆ, ಮಂದೆಯೆಲ್ಲಾ ರೇಖೆರೇಖೆಯ ಮರಿಗಳನ್ನು ಈಯಿತು. ಹೀಗೆ ನಮ್ಮ ತಂದೆ ನಿಮ್ಮ ತಂದೆಯ ಪಶುಗಳನ್ನು ತೆಗೆದು ನನಗೆ ಕೊಟ್ಟಿದ್ದಾರೆ. ಮಂದೆ ಕೂಡುವ ಕಾಲದಲ್ಲಿ ನಾನು ಕನಸಿನಲ್ಲಿ ಕಣ್ಣೆತ್ತಿ ನೋಡಲಾಗಿ, ಅವುಗಳನ್ನು ಏರುತ್ತಿದ್ದ ಹೋತಗಳು ರೇಖೆರೇಖೆಯವೂ ಚುಕ್ಕೆಚುಕ್ಕೆಯವೂ ಮಚ್ಚೆಮಚ್ಚೆಯವೂ ಆಗಿದ್ದವು. ಪಿತನ ದೂತನು ಕನಸಿನಲ್ಲಿ ನನಗೆ, ‘ಯಾಕೋಬನೇ’ ಎಂದರು; ಅದಕ್ಕೆ ನಾನು, ‘ಇಗೋ, ಇದ್ದೇನೆ’ ಎಂದೆನು. ಅದಕ್ಕೆ ಅವರು ಹೀಗೆಂದರು: ‘ಕಣ್ಣೆತ್ತಿ ನೋಡು; ಮಂದೆಯನ್ನು ಕೂಡುತ್ತಿರುವ ಹೋತಗಳೆಲ್ಲಾ ರೇಖೆರೇಖೆಯವೂ ಮಚ್ಚೆಮಚ್ಚೆಯವೂ ಚುಕ್ಕೆಚುಕ್ಕೆಯವೂ ಆಗಿವೆ; ಲಾಬಾನನು ನಿನಗೆ ಮಾಡುತ್ತಿರುವುದನ್ನೆಲ್ಲಾ ನಾನು ನೋಡಿದ್ದೇನೆ. ನೀನು ಸ್ತಂಭಕ್ಕೆ ಅಭಿಷೇಕಮಾಡಿ ನನಗೆ ಹರಕೆಹೊತ್ತ ಬೇತೇಲಿನ ಪಿತ ನಾನೇ. ಈಗ ಎದ್ದು, ಈ ದೇಶವನ್ನು ಬಿಟ್ಟು, ನಿನ್ನ ಬಂಧುಗಳ ದೇಶಕ್ಕೆ ಹಿಂದಿರುಗು’” ಎಂದನು.

ಅದಕ್ಕೆ ರಾಹೇಲಳೂ ಲೇಯಳೂ, “ನಮ್ಮ ತಂದೆಯ ಮನೆಯಲ್ಲಿ ನಮಗಿನ್ನೂ ಪಾಲಾಗಲಿ ಬಾಧ್ಯತೆಯಾಗಲಿ ಉಂಟೋ? ಅವನು ನಮ್ಮನ್ನು ಅನ್ಯರೆಂದು ಎಣಿಸುತ್ತಿಲ್ಲವೇ? ಅವನು ನಮ್ಮನ್ನು ಮಾರಿ ನಮ್ಮ ಹಣವನ್ನೂ ಸಂಪೂರ್ಣವಾಗಿ ನುಂಗಿಬಿಟ್ಟಿದ್ದಾನೆ. ನಮ್ಮ ತಂದೆ ಲಾಬಾನನಿಂದ ತೆಗೆದ ಸಂಪತ್ತೆಲ್ಲಾ ನಮ್ಮದೂ ನಮ್ಮ ಮಕ್ಕಳದೂ ಆಗಿದೆ. ಆದ್ದರಿಂದ ನಮ್ಮ ತಂದೆ ನಿನಗೆ ಹೇಳಿದ್ದನ್ನೆಲ್ಲಾ ಮಾಡು” ಎಂದರು.

ಆಗ ಯಾಕೋಬನು ಎದ್ದು, ತನ್ನ ಮಕ್ಕಳನ್ನೂ ಹೆಂಡತಿಯರನ್ನೂ ಒಂಟೆಗಳ ಮೇಲೆ ಕೂರಿಸಿದನು. ಕಾನಾನ್ ದೇಶದಲ್ಲಿದ್ದ ತನ್ನ ತಂದೆ ಇಸಾಕನ ಬಳಿಗೆ ಹೋಗುವುದಕ್ಕಾಗಿ, ಅವನು ತನ್ನ ಪಶುಗಳನ್ನೆಲ್ಲಾ ಹಾಗೂ ಪದ್ದನ್ ಅರಾಮಿನಲ್ಲಿ ಸಂಪಾದಿಸಿದ ಪಶುಗಳೇ ಮೊದಲಾದ ತಾನು ಸಂಪಾದಿಸಿದ ಆಸ್ತಿಯನ್ನೆಲ್ಲಾ ತೆಗೆದುಕೊಂಡನು. ಲಾಬಾನನು ತನ್ನ ಕುರಿಗಳ ಉಣ್ಣೆ ಕತ್ತರಿಸುವುದಕ್ಕೆ ಹೋಗಿದ್ದನು; ಆಗ ರಾಹೇಲಳು ತನ್ನ ತಂದೆಯ ಗೃಹದೇವತೆಗಳನ್ನು ಕದ್ದಳು. ಇದಲ್ಲದೆ ಯಾಕೋಬನು ತಾನು ಓಡಿಹೋಗುತ್ತಿದ್ದೇನೆಂದು ಅರಾಮ್ಯನಾದ ಲಾಬಾನನಿಗೆ ತಿಳಿಸದೆ ಅವನನ್ನು ವಂಚಿಸಿದನು. ಅವನು ತನಗಿದ್ದ ಎಲ್ಲವನ್ನೂ ತೆಗೆದುಕೊಂಡು ಓಡಿಹೋದನು; ಎದ್ದು, ಯೂಫ್ರೇಟೀಸ್ ನದಿಯನ್ನು ದಾಟಿ, ಗಿಲ್ಯಾದಿನ ಬೆಟ್ಟದ ಸೀಮೆಯ ಕಡೆಗೆ ಮುಖಮಾಡಿದನು.

ಲಾಬಾನನು ಬೆನ್ನಟ್ಟುವುದು

ಯಾಕೋಬನು ಓಡಿಹೋದನೆಂಬ ಸುದ್ದಿಯು ಮೂರನೆಯ ದಿನದಲ್ಲಿ ಲಾಬಾನನಿಗೆ ತಿಳಿಯಿತು. ಅವನು ತನ್ನ ಬಂಧುಗಳನ್ನು ಕರೆದುಕೊಂಡು, ಏಳು ದಿನ ಅವನನ್ನು ಬೆನ್ನಟ್ಟಿ, ಗಿಲ್ಯಾದಿನ ಬೆಟ್ಟದ ಸೀಮೆಯಲ್ಲಿ ಅವನನ್ನು ಹಿಡಿದನು.

ಆದರೆ ನಮ್ಮ ತಂದೆ ರಾತ್ರಿ ಕನಸಿನಲ್ಲಿ ಅರಾಮ್ಯನಾದ ಲಾಬಾನನ ಬಳಿಗೆ ಬಂದು, “ನೀನು ಯಾಕೋಬನ ಸಂಗಡ ಒಳ್ಳೆಯದನ್ನಾಗಲಿ ಕೆಟ್ಟದ್ದನ್ನಾಗಲಿ ಮಾತಾಡದಂತೆ ಎಚ್ಚರಿಕೆಯಾಗಿರು” ಎಂದರು.

ಯಾಕೋಬನು ಬೆಟ್ಟದಲ್ಲಿ ತನ್ನ ಗುಡಾರವನ್ನು ಹಾಕಿಕೊಂಡಿದ್ದನು; ಲಾಬಾನನು ಅವನನ್ನು ಹಿಡಿದನು. ಲಾಬಾನನೂ ಅವನ ಬಂಧುಗಳೂ ಗಿಲ್ಯಾದಿನ ಬೆಟ್ಟದಲ್ಲಿ ಅವನಿಗೆದುರಾಗಿ ತಮ್ಮ ಗುಡಾರ ಹಾಕಿದರು. ಲಾಬಾನನು ಯಾಕೋಬನಿಗೆ, “ನೀನೇನು ಮಾಡಿದೆ? ನನ್ನನ್ನು ಮೋಸಗೊಳಿಸಿ, ನನ್ನ ಹೆಣ್ಣುಮಕ್ಕಳನ್ನು ಯುದ್ಧದ ಸೆರೆಯವರಂತೆ ಹೊಡೆದುಕೊಂಡು ಬಂದಿದ್ದೀಯಲ್ಲಾ. ನನಗೆ ತಿಳಿಸದೆ ರಹಸ್ಯವಾಗಿ ಓಡಿಹೋಗಿ ನನ್ನನ್ನು ಯಾಕೆ ವಂಚಿಸಿದೆ? ನೀನು ತಿಳಿಸಿದ್ದರೆ ನಾನು ನಿನ್ನನ್ನು ಸಂತೋಷದಿಂದಲೂ ಹಾಡುಗಳಿಂದಲೂ ದಮ್ಮಡಿ ಕಿನ್ನರಿಗಳ ಸಂಗಡಲೂ ಬೀಳ್ಕೊಡುತ್ತಿದ್ದೆ. ನನ್ನ ಗಂಡುಮಕ್ಕಳನ್ನೂ ಹೆಣ್ಣುಮಕ್ಕಳನ್ನೂ ಮುದ್ದಿಟ್ಟು ಬೀಳ್ಕೊಡುವುದಕ್ಕೆ ನೀನು ನನಗೆ ಅವಕಾಶ ಕೊಡಲಿಲ್ಲವೇಕೆ? ಈಗ ನೀನು ಬುದ್ಧಿಹೀನತನದಿಂದ ವರ್ತಿಸಿದ್ದೀ.

ನಿನಗೆ ಕೇಡುಮಾಡುವ ಶಕ್ತಿ ನನ್ನ ಕೈಯಲ್ಲಿದೆ; ಆದರೆ ನಿನ್ನ ತಂದೆಯ ದೇವರು ನಿನ್ನೆ ರಾತ್ರಿ ನನಗೆ, ‘ನೀನು ಯಾಕೋಬನ ಸಂಗಡ ಒಳ್ಳೆಯದನ್ನಾಗಲಿ ಕೆಟ್ಟದ್ದನ್ನಾಗಲಿ ಮಾತಾಡದಂತೆ ಎಚ್ಚರಿಕೆಯಾಗಿರು’ ಎಂದು ಹೇಳಿದರು.

ನಿನ್ನ ತಂದೆಯ ಮನೆಯ ಮೇಲೆ ನಿನಗೆ ಅತ್ಯಧಿಕ ಹಂಬಲವಿದ್ದ ಕಾರಣ ಈಗ ನೀನು ಹೊರಟುಹೋಗಿದ್ದೀ ನಿಜ; ಆದರೆ ನನ್ನ ದೇವರುಗಳನ್ನು ಯಾಕೆ ಕದ್ದೆ?” ಎಂದನು.

ಅದಕ್ಕೆ ಯಾಕೋಬನು ಲಾಬಾನನಿಗೆ, “ನೀನು ನಿನ್ನ ಹೆಣ್ಣುಮಕ್ಕಳನ್ನು ನನ್ನಿಂದ ಬಲಾತ್ಕಾರವಾಗಿ ಕಸಿದುಕೊಂಡಾನೆಂದು ನಾನು ಭಯಪಟ್ಟೆನು. ನಿನ್ನ ದೇವರುಗಳು ಯಾರ ಬಳಿ ಸಿಕ್ಕುತ್ತವೋ ಅವನು ಬದುಕಬಾರದು. ನಮ್ಮ ಬಂಧುಗಳ ಮುಂದೆ ನಿನ್ನದೆಂಬುದನ್ನು ಗುರುತಿಸಿ ತೆಗೆದುಕೋ” ಎಂದನು. ರಾಹೇಲಳು ಅವುಗಳನ್ನು ಕದ್ದಿದ್ದಾಳೆಂದು ಯಾಕೋಬನಿಗೆ ತಿಳಿದಿರಲಿಲ್ಲ.

ಲಾಬಾನನು ಯಾಕೋಬನ ಗುಡಾರವನ್ನೂ ಲೇಯಳ ಗುಡಾರವನ್ನೂ ಇಬ್ಬರು ದಾಸಿಯರ ಗುಡಾರವನ್ನೂ ಹುಡುಕಿದನು; ಏನೂ ಸಿಕ್ಕಲಿಲ್ಲ. ಅವನು ಲೇಯಳ ಗುಡಾರವನ್ನು ಬಿಟ್ಟು ರಾಹೇಲಳ ಗುಡಾರವನ್ನು ಪ್ರವೇಶಿಸಿದನು. ರಾಹೇಲಳು ಆ ಗೃಹದೇವತೆಗಳನ್ನು ತೆಗೆದುಕೊಂಡು, ಒಂಟೆಯ ತಡಿಯಲ್ಲಿಟ್ಟು, ಅವುಗಳ ಮೇಲೆ ಕುಳಿತಿದ್ದಳು. ಲಾಬಾನನು ಗುಡಾರವನ್ನೆಲ್ಲಾ ಹುಡುಕಿದರೂ ಏನೂ ಸಿಕ್ಕಲಿಲ್ಲ. ಅವಳು ತನ್ನ ತಂದೆಗೆ, “ನನ್ನ ಒಡೆಯನೇ, ಕೋಪಿಸಬೇಡ; ನಾನು ನಿನ್ನ ಮುಂದೆ ಏಳಲಾರೆ, ಏಕೆಂದರೆ ನನಗೆ ಮುಟ್ಟಾಗಿದೆ” ಎಂದಳು. ಅವನು ಹುಡುಕಿದರೂ ಆ ಗೃಹದೇವತೆಗಳು ಸಿಕ್ಕಲೇ ಇಲ್ಲ.

ಆಗ ಯಾಕೋಬನು ಕೋಪಗೊಂಡು ಲಾಬಾನನ ಸಂಗಡ ಜಗಳವಾಡಿದನು. ಯಾಕೋಬನು ಲಾಬಾನನಿಗೆ, “ನೀನು ನನ್ನನ್ನು ಇಷ್ಟು ರೋಷದಿಂದ ಬೆನ್ನಟ್ಟುವುದಕ್ಕೆ ನನ್ನ ಅಪರಾಧವೇನು? ನನ್ನ ಪಾಪವೇನು? ನೀನು ನನ್ನ ಸಾಮಾನುಗಳನ್ನೆಲ್ಲಾ ಹುಡುಕಿದ್ದೀ; ನಿನ್ನ ಮನೆಯದಾದ ಏನನ್ನು ಕಂಡುಕೊಂಡೆ? ಅದನ್ನು ನನ್ನ ಬಂಧುಗಳ ಹಾಗೂ ನಿನ್ನ ಬಂಧುಗಳ ಮುಂದೆ ಇಲ್ಲಿ ಇಡು; ಅವರು ನಮ್ಮಿಬ್ಬರ ನಡುವೆ ತೀರ್ಪುಮಾಡಲಿ.

ಈ ಇಪ್ಪತ್ತು ವರ್ಷ ನಾನು ನಿನ್ನ ಸಂಗಡ ಇದ್ದೇನೆ; ನಿನ್ನ ಕುರಿಗಳೂ ಆಡುಗಳೂ ಗರ್ಭಪಾತವಾಗಲಿಲ್ಲ; ನಿನ್ನ ಮಂದೆಯ ಟಗರುಗಳನ್ನು ನಾನು ತಿನ್ನಲಿಲ್ಲ. ಮೃಗಗಳಿಂದ ಸೀಳಲ್ಪಟ್ಟವುಗಳನ್ನು ನಾನೆಂದೂ ನಿನ್ನ ಬಳಿಗೆ ತರಲಿಲ್ಲ; ಆ ನಷ್ಟವನ್ನು ನಾನೇ ಭರಿಸಿದೆನು. ಹಗಲಲ್ಲಿ ಕದ್ದದ್ದಾಗಲಿ ರಾತ್ರಿಯಲ್ಲಿ ಕದ್ದದ್ದಾಗಲಿ ಅದನ್ನು ನೀನು ನನ್ನ ಕೈಯಿಂದಲೇ ಕೇಳಿದೆ. ನಾನಂತೂ ಹಗಲಲ್ಲಿ ಬಿಸಿಲಿನಿಂದಲೂ ರಾತ್ರಿಯಲ್ಲಿ ಚಳಿಯಿಂದಲೂ ಬಳಲುತ್ತಿದ್ದೆ; ನನ್ನ ಕಣ್ಣುಗಳಿಗೆ ನಿದ್ರೆ ದೂರವಾಗಿತ್ತು. ಈ ಇಪ್ಪತ್ತು ವರ್ಷ ನಾನು ನಿನ್ನ ಮನೆಯಲ್ಲಿದ್ದೆ; ನಿನ್ನ ಇಬ್ಬರು ಹೆಣ್ಣುಮಕ್ಕಳಿಗಾಗಿ ಹದಿನಾಲ್ಕು ವರ್ಷವೂ ನಿನ್ನ ಮಂದೆಗಾಗಿ ಆರು ವರ್ಷವೂ ಸೇವೆಮಾಡಿದೆ; ನೀನಾದರೋ ನನ್ನ ಸಂಬಳವನ್ನು ಹತ್ತು ಸಾರಿ ಬದಲಾಯಿಸಿದೆ. ನನ್ನ ತಂದೆಯ ದೇವರು, ಅಬ್ರಹಾಮನ ದೇವರು, ಇಸಾಕನ ಭಯಾರಾಧ್ಯನು ನನ್ನ ಸಂಗಡ ಇಲ್ಲದಿದ್ದರೆ, ನೀನು ಈಗ ನಿಶ್ಚಯವಾಗಿ ನನ್ನನ್ನು ಬರಿಗೈಯಲ್ಲಿ ಕಳುಹಿಸಿಬಿಡುತ್ತಿದ್ದೆ. ನಮ್ಮ ತಂದೆ ನನ್ನ ಕಷ್ಟವನ್ನೂ ನನ್ನ ಕೈಗಳ ಪ್ರಯಾಸವನ್ನೂ ನೋಡಿ, ನಿನ್ನೆ ರಾತ್ರಿ ನಿನ್ನನ್ನು ಗದರಿಸಿದರು” ಎಂದನು. ^a

ಅದಕ್ಕೆ ಲಾಬಾನನು ಯಾಕೋಬನಿಗೆ, “ಈ ಹೆಣ್ಣುಮಕ್ಕಳು ನನ್ನವರು, ಈ ಮಕ್ಕಳು ನನ್ನವರು, ಈ ಮಂದೆಗಳು ನನ್ನವು; ನೀನು ಕಾಣುವುದೆಲ್ಲಾ ನನ್ನದೇ. ಆದರೆ ಈ ನನ್ನ ಹೆಣ್ಣುಮಕ್ಕಳಿಗಾಗಲಿ ಅವರು ಹೆತ್ತ ಮಕ್ಕಳಿಗಾಗಲಿ ನಾನು ಈ ಹೊತ್ತು ಏನು ಮಾಡಬಲ್ಲೆನು? ಬಾ, ನೀನೂ ನಾನೂ ಒಂದು ಒಡಂಬಡಿಕೆ ಮಾಡಿಕೊಳ್ಳೋಣ; ಅದು ನನಗೂ ನಿನಗೂ ನಡುವೆ ಸಾಕ್ಷಿಯಾಗಿರಲಿ” ಎಂದನು.

ಆಗ ಯಾಕೋಬನು ಒಂದು ಕಲ್ಲನ್ನು ತೆಗೆದುಕೊಂಡು ಸ್ತಂಭವಾಗಿ ನಿಲ್ಲಿಸಿದನು. ಯಾಕೋಬನು ತನ್ನ ಬಂಧುಗಳಿಗೆ, “ಕಲ್ಲುಗಳನ್ನು ಕೂಡಿಸಿರಿ” ಎಂದನು. ಅವರು ಕಲ್ಲುಗಳನ್ನು ತೆಗೆದುಕೊಂಡು ಒಂದು ಕುಪ್ಪೆಹಾಕಿ, ಆ ಕುಪ್ಪೆಯ ಬಳಿಯಲ್ಲಿ ಊಟಮಾಡಿದರು. ಲಾಬಾನನು ಅದಕ್ಕೆ ಯಗರ್ ಸಾಹದೂತಾ ಎಂದು ಹೆಸರಿಟ್ಟನು; ಆದರೆ ಯಾಕೋಬನು ಅದಕ್ಕೆ ಗಲೇದ್ ಎಂದು ಹೆಸರಿಟ್ಟನು. ಲಾಬಾನನು, “ಈ ಕುಪ್ಪೆ ಈ ಹೊತ್ತು ನನಗೂ ನಿನಗೂ ನಡುವೆ ಸಾಕ್ಷಿಯಾಗಿದೆ” ಎಂದನು. ಆದ್ದರಿಂದ ಅದಕ್ಕೆ ಗಲೇದ್ ಎಂದು ಹೆಸರಾಯಿತು. ಮತ್ತು ಮಿಚ್ಪಾ ಎಂತಲೂ ಹೆಸರಾಯಿತು; ಏಕೆಂದರೆ ಅವನು, “ನಾವು ಒಬ್ಬರಿಗೊಬ್ಬರು ಅಗಲಿರುವಾಗ ದೇವರು ನನಗೂ ನಿನಗೂ ನಡುವೆ ಕಾವಲಾಗಿರಲಿ. ನೀನು ನನ್ನ ಹೆಣ್ಣುಮಕ್ಕಳನ್ನು ಕಷ್ಟಪಡಿಸಿದರೆ, ಇಲ್ಲವೆ ಅವರಲ್ಲದೆ ಬೇರೆ ಹೆಂಡತಿಯರನ್ನು ಮಾಡಿಕೊಂಡರೆ, ನಮ್ಮ ಸಂಗಡ ಬೇರೆ ಯಾರೂ ಇಲ್ಲದಿದ್ದರೂ, ದೇವರೇ ನನಗೂ ನಿನಗೂ ನಡುವೆ ಸಾಕ್ಷಿ” ಎಂದನು. ಲಾಬಾನನು ಯಾಕೋಬನಿಗೆ, “ನಾನು ನನಗೂ ನಿನಗೂ ನಡುವೆ ಇಟ್ಟಿರುವ ಈ ಕುಪ್ಪೆಯನ್ನೂ ಈ ಸ್ತಂಭವನ್ನೂ ನೋಡು. ಈ ಕುಪ್ಪೆಯೂ ಸಾಕ್ಷಿ, ಈ ಸ್ತಂಭವೂ ಸಾಕ್ಷಿ: ನಾನು ಕೇಡುಮಾಡುವುದಕ್ಕೆ ಈ ಕುಪ್ಪೆಯನ್ನು ದಾಟಿ ನಿನ್ನ ಕಡೆಗೆ ಬರುವುದಿಲ್ಲ, ನೀನೂ ಈ ಕುಪ್ಪೆಯನ್ನೂ ಈ ಸ್ತಂಭವನ್ನೂ ದಾಟಿ ನನ್ನ ಕಡೆಗೆ ಬರುವುದಿಲ್ಲ. ಅಬ್ರಹಾಮನ ದೇವರೂ ನಾಹೋರನ ದೇವರೂ ಅವರ ತಂದೆಯ ದೇವರೂ ನಮ್ಮ ನಡುವೆ ತೀರ್ಪುಮಾಡಲಿ” ಎಂದನು. ಆಗ ಯಾಕೋಬನು ತನ್ನ ತಂದೆ ಇಸಾಕನ ಭಯಾರಾಧ್ಯನ ಹೆಸರಿನಲ್ಲಿ ಪ್ರಮಾಣಮಾಡಿದನು. ಯಾಕೋಬನು ಬೆಟ್ಟದಲ್ಲಿ ಬಲಿಯನ್ನು ಅರ್ಪಿಸಿ, ರೊಟ್ಟಿ ತಿನ್ನುವುದಕ್ಕೆ ತನ್ನ ಬಂಧುಗಳನ್ನು ಕರೆದನು; ಅವರು ರೊಟ್ಟಿ ತಿಂದು ಆ ಬೆಟ್ಟದಲ್ಲಿ ರಾತ್ರಿ ಕಳೆದರು. ಲಾಬಾನನು ಬೆಳಿಗ್ಗೆ ಬೇಗನೆ ಎದ್ದು, ತನ್ನ ಮೊಮ್ಮಕ್ಕಳನ್ನೂ ಹೆಣ್ಣುಮಕ್ಕಳನ್ನೂ ಮುದ್ದಿಟ್ಟು, ಅವರನ್ನು ಆಶೀರ್ವದಿಸಿ, ಅಲ್ಲಿಂದ ಹೊರಟು ತನ್ನ ಮನೆಗೆ ಹಿಂದಿರುಗಿದನು.